Śvińni znoŭ skrali jajki. Złyja ptuški stali źlejšymi.
Samaja papularnaja sieryja mabilnych hulniaŭ Angry Birds atrymała pierazapusk. Praź piać z pałovaj hod paśla vychadu aryhinalnaj hulni finy Rovio vypuścili Angry Birds 2.
Hulnia tradycyjna biaspłatnaja ź nienaviaźlivymi pakupkami bonusaŭ. Śviet «złych ptušak» całkam pieramalavany, dadałosia bahata animacyj. Uzroŭni ciapier padzielenyja na «pakoi».
Hałoŭny simvał hulni, čyrvonaja złaja ptuška, atrymała novuju zdolnaść «siłavoha šturška», padobnuju da takoj u «ptuški-džedaja» z Angry Birds: Star Wars. Staryja znajomyja, jak to sini «trajny vierabiejčyk» ci žoŭtaja «reaktyŭnaja bieražanka», taksama na miescy. Ciapier hulec moža abirać, jakuju z najaŭnych ptušak vykarystać dla prachodžańnia ŭzroŭniu.
Jak i ŭ mnostvie ŭmoŭna-biaspłatnych hulniaŭ, u Angry Birds jość abmiežavańnie: pravalić uzrovień možna tolki piać raz, zatym pryjdziecca dakupać dadatkovyja sproby. Biaspłatnaja novaja sproba «hienierujecca» za paŭhadziny. Hulnia nie patrabuje abaviazkovaha złučeńnia ź internetam.
Niahledziačy na davoli prostuju mulciašnuju hrafiku, hulnia pakul umudrajecca tarmazić na telefonie z adnym z samych mahutnych na siońnia pracesaraŭ, Snapdragon 810. Tym nie mieniej, ź ciaham času heta moža vypravicca, a ŭ kampiensacyju niazručnaściej aŭtary prapanujuć «pieršaprachodcam» unutryhulniovy bonus za prachodžańnie pieršaha naboru ŭzroŭniaŭ u bližejšyja dva tydni.
***
Z 2009 hoda vyjšła paŭtara dziasiatka hulniaŭ sieryi Angry Birds, sumarna ich zahruzili niekalki miljardaŭ raz. U sieryi vychodzili jak tradycyjnyja hałavałomki, tak i honki, rolevyja hulni, hałavałomki pa matyvach «Zornych vojnaŭ», stralałka pa matyvach «Transformieraŭ» i śpin-of, u jakim treba hulać za śvinak. Kala pałovy prybytku raspracoŭščyki atrymlivajuć ad prodažu realnych cacak pa matyvach sieryi. U śviecie dziejničajuć niekalki zabaŭlalnych parkaŭ Angry Birds Land. Pa matyvach hulni vychodzili karotkamietražnyja multfilmy. Sony zdymaje poŭnamietražny 3D-multfilm «Angry Birds», premjera pryznačanaja na 20 maja 2016 hoda.
Ciapier čytajuć
Maŭrykij, Siejšeły, Šry-Łanka i nie tolki: pahladzieli, kudy źbiehli ad biełaruskich marazoŭ praŭładnyja artysty i viadučyja14
Kamientary