Na Majdanie ŭ Kijevie patrabavali vyzvaleńnia minskich «hraficistaŭ» 

Na Majdanie Niezaležnaści ŭ Kijevie 29 žniŭnia adbyłasia akcyja salidarnaści ź minčanami, zatrymanymi pa «spravie ab hrafici».

Jak paviedamlaje pres-hrupa ruchu salidarnaści «Razam» va Ukrainie, kala dziasiatka aktyvistaŭ ruchu i ich ukrainskich adnadumcaŭ na praciahu dvuch hadzin trymali banier «Biełaruś maje być biełaruskaj», kab pakazać, «za što ŭ Biełarusi ŭzbudžajuć kryminalnyja spravy». Na akcyi vystupili staršynia ruchu salidarnaści «Razam» Viačasłaŭ Siŭčyk i pres-sakratar ruchu salidarnaści «Razam» va Ukrainie Aleh Aŭčyńnikaŭ.

Padčas akcyi siarod žurnalistaŭ raspaŭsiudžvałasia zajava arhanizacyi, u jakoj aktyvisty vitajuć vyzvaleńnie Mikałaja Statkieviča i hramadskich aktyvistaŭ Ihara Alinieviča, Jaŭhiena Vaśkoviča, Mikałaja Dziadka, Arcioma Prakapienku i Juryja Rubcova, ale miž tym zaścierahajuć «ad ejfaryi i nieabdumanych fraz, što ŭ Biełarusi vyzvalenyja ŭsie palitviaźni». Za kratami zastajucca pravaabaroncy Andrej Bandarenka i Michaił Žamčužny, spravy suprać jakich, jak ličać aktyvisty ruchu, «byli inśpiravanyja śpiecsłužbami» z metaj «razhromu pravaabarončaj arhanizacyi «Płatform inavejšn». 

«Taksama dzikim ź`iaŭlajecca vypadak uzbudžeńnia kryminalnaj spravy za hrafici patryjatyčnaha źmiestu suprać Viačasłava Kasinierava, Maksima Piakarskaha, Vadzima Žaromskaha i ich siabroŭ», — havorycca ŭ zajavie. 

Ruch salidarnaści patrabuje nieadkładnaha vyzvaleńnia zatrymanych za spravie ab hrafici, a taksama Andreja Bandarenki i Michaiła Žamčužnaha.

11 žniŭnia ŭ Minsku hałoŭnym upraŭleńniem pa baraćbie z arhanizavanaj złačynnaściu i karupcyjaj MUS z prymianieńniem siły byli zatrymanyja čaćviora minčan, jakim prad`iavili abvinavačańnie va ŭdziele ŭ niekalkich złačynnych epizodach, u tym liku naniasieńni hrafici «Biełaruś maje być biełaruskaj» z arnamientam i pierakreślenymi siarpom i mołatam, svastykaj, a taksama hrafici na byłoj vajennaj čaści z nadpisam «Revalucyja śviadomaści, jana ŭžo idzie…» z vyjavaj siłueta čałavieka, jaki kidaje butelku z zapalnaj sumieśsiu. Abodva epizody kvalifikavanyja jak «naŭmysnyja dziejańni, jakija supravadžalisia paškodžańniem čužoj majomaści nieŭstanoŭlenymi asobami, što hruba parušyli hramadski paradak i vykazali jaŭnuju niepavahu da hramadstva», raspačata sprava pavodle č. 2 art. 339 Kryminalnaha kodeksa (chulihanstva, učynienaje hrupaj asob). 

Akramia taho, zatrymanych padazrajuć u tym, što jany vymazali farbaj sacyjalny banier z vyjavaj supracoŭnikaŭ milicyi pa vuł. Hareckaha ŭ Minsku, što paciahnuła materyjalnuju škodu na 2,2 młn. rubloŭ.

Dvum z čatyroch padazronych — Maksimu Piakarskamu i Vadzimu Žaromskamu — 20 žniŭnia prad`iaŭleny abvinavačańni ŭ chulihanstvie, učynienym hrupaj asob. Ci prad`iaŭleny abvinavačańni Viačasłavu Kasinieravu, jaki znachodzicca ŭ balnicy z dvajnym pierałomam skivicy, atrymanym u vyniku dziejańniaŭ supracoŭnikaŭ MUS, nieviadoma. Pa danych pravaabaroncaŭ, Jarasłaŭ Uljanienkaŭ zastajecca ŭ statusie padazronaha.

Zasnavalnik kulturna-aśvietnaj ustanovy «Płatform inaviejšn» viciabčanin Michaił Žamčužny 10 lipienia 2015 hoda byŭ pryhavorany da šaści hadoŭ pazbaŭleńnia voli ŭ kałonii strohaha režymu. Jon abvinavačvaŭsia pa artykułach 376 (č.1, č.2), 375 (č.1) i 431 (č.1, č.2) Kryminalnaha kodeksa: naŭmysnaje abviaščeńnie źviestak, jakija składajuć słužbovuju tajnu; niezakonnaje nabyćcio (vyrab) srodkaŭ dla niepubličnaha atrymańnia infarmacyi, jakaja składaje słužbovuju tajnu; dača chabaru. Dla Žamčužnaha heta ŭžo druhi termin: z 2007 hoda pa 2012-y jon adbyvaŭ pakarańnie pa ekanamičnym artykule. Mienavita ŭ suviazi ź nieadbytym pa pieršym pryhavory dadatkovym pakarańniem (2 hady i 8 miesiacaŭ pazbaŭleńnia prava zajmacca arhanizacyjna-pravavoj dziejnaściu) Michaił nie trapiŭ pad amnistyju. Nieadbytaje pa papiarednim pryhavory dadatkovaje pakarańnie dałučana da novaha pryhavoru suda.

Žamčužny byŭ zatrymany nieŭzabavie paśla vyniasieńnia pryhavoru pa spravie byłoha kiraŭnika «Płatform inaviejšn» Andreja Bandarenki. 12 žniŭnia 2014 hoda sud Kastryčnickaha rajona Minska pryznaŭ Bandarenku vinavatym va ŭčynieńni chulihanstva, złosnaha chulihanstva i asabliva złosnaha chulihanstva (čč. 1, 2 i 3 artykuła 339 KK). Jaho pryhavaryli da čatyroch hadoŭ pazbaŭleńnia voli ŭ kałonii ŭzmocnienaha režymu, ale ŭ suviazi z amnistyjaj termin byŭ skaročany da troch hadoŭ. 

Kulturna-aśvietnaja ŭstanova «Płatform inaviejšn» zajmajecca abaronaj pravoŭ čałavieka ŭ miescach pazbaŭleńnia voli. Jana stvoranaja na bazie infarmacyjna-aśvietnaj ustanovy «Płatforma», jakaja ŭ kastryčniku 2012 hoda była likvidavanaja rašeńniem Minskaha haspadarčaha suda.

• 0
• 0
• 0
• 0
• 0
• 0
• 0
• 0