U Rasii nazirajecca ŭzmacnieńnie adtoku prafiesijanałaŭ u roznych śfierach z-za recesii, mižnarodnaj izalacyi i žorstkaha rehulavańnia internetu, piša ŭ paniadziełak Bloomberg.
Bloomberg nazyvaje niekalki prafiesij, u jakich adbyvajecca «ŭciečka mazhoŭ». Havorka idzie pra technałahičnuju, finansavuju i jurydyčnuju śfiery. U jakaści prykładu ahienctva pryvodzić kiraŭnika prajektaŭ i veb-raspracoŭnika ŭ startap Coub Ihara Hładkabarodava, jaki pryniaŭ rašeńnie źjechać u ZŠA. Pavodle jaho słoŭ,
«piać hadoŭ tamu jašče była nadzieja, što ŭsio źmienicca ŭ lepšy bok, ale ciapier zrazumieła, što Rasija sutyknułasia z doŭhim sistemnym kryzisam».
Ambicyjny prajekt u technałahičnaj śfiery, technapark «Skołkava», staŭ, pa słovach byłoha dyrektara pa raźvićci technaparka Maksima Kisialova, «inkubataram dla emihrantaŭ». Vykanaŭčy dyrektar kłastara infarmacyjnych technałohij «Skołkava» Ihar Bahačoŭ stavicca da adjezdu śpiecyjalistaŭ pa-fiłasofsku, padkreślivajučy, što Rasija «nie moža razburyć rynkavyja miechanizmy i viarnuć savieckija časy, kali chakieistam z SSSR zabaraniali hulać u NCHŁ».
Jašče adna vobłaść, dzie sutyknulisia z adjezdam prafiesijanałaŭ, — heta bankaŭskaja śfiera, jakaja akazałasia pad udaram z-za sankcyj ZŠA i Jeŭrasajuza, piša Bloomberg. Ahienctva pryvodzić słovy Vitala Bajkina, supracoŭnika Hazprambanka, jaki vyrašyŭ źjechać u ZŠA dla vučoby ŭ ńju-jorkskaj biźnies-škole.
«Rynak kapitału ŭ Rasii praktyčna skončyŭsia. Ja nie baču šlachoŭ dla palapšeńnia situacyi ŭ bližejšyja hady», — zajaviŭ Bajkin.
Bloomberg taksama kanstatuje, što raście kolkaść tych, chto pakidaje Rasiju pa palityčnych matyvach. «Palityka Kramla prymušaje adukavany kłas vybirać — albo šychtavacca pad ściaham vajny z Zachadam, albo źjazdžać», — kaža palitołah z Maskvy Alaksandr Marozaŭ, jaki pryniaŭ rašeńnie źjechać na pastajannaje miesca žycharstva ŭ Hiermaniju.
Pa słovach advakata z Tel-Aviva Eli Hiervica, jaki dapamahaje hramadzianam Rasii atrymać izrailskaje hramadzianstva, kolkaść zvarotaŭ da jaho pavialičyłasia, paśla taho jak Rasija dałučyła Krym u sakaviku 2014 hoda i jaje adnosiny z Zachadam dasiahnuli najnižejšaj kropki z časoŭ chałodnaj vajny. Hiervic adznačaje, što bolš za 90% tych, chto źviartajecca da jaho za dapamohaj u atrymańni hramadzianstva Izraila, — «paśpiachovyja, zamožnyja ludzi». Pa słovach Hiervica, ciapier uzrovień emihracyi ŭ kolkasnym dačynieńni nižejšy, čym u pieršyja postsavieckija hady, ale značna vyšejšy, kali hladzieć pa ŭzroŭni dachodu tych, chto źjazdžaje. Kiraŭnik ministerstva absorbcyi Izraila (adkazvaje za palityku ŭ halinie imihracyi) skazaŭ, što ŭ apošni čas kolkaść zapytaŭ na hramadzianstva z boku Rasii padvoiłasia ŭ paraŭnańni z pačatkam 2000-ch i vyrasła na 30% u paraŭnańni z kryzisnym 2009 hodam.
Hod tamu Rasstat zafiksavaŭ rekordnuju za 15 hadoŭ chvalu emihracyi z Rasii: tady sa studzienia pa žnivień z Rasii emihravała 203 659 čałaviek. Za ŭvieś 2013 hod Rasiju pakinuła 186 382 čałavieki.
Kamientary