У Расіі назіраецца ўзмацненне адтоку прафесіяналаў у розных сферах з-за рэцэсіі, міжнароднай ізаляцыі і жорсткага рэгулявання інтэрнэту, піша ў панядзелак Bloomberg.
Bloomberg называе некалькі прафесій, у якіх адбываецца «ўцечка мазгоў». Гаворка ідзе пра тэхналагічную, фінансавую і юрыдычную сферы. У якасці прыкладу агенцтва прыводзіць кіраўніка праектаў і вэб-распрацоўніка ў стартап Coub Ігара Гладкабародава, які прыняў рашэнне з'ехаць у ЗША. Паводле яго слоў,
«пяць гадоў таму яшчэ была надзея, што ўсё зменіцца ў лепшы бок, але цяпер зразумела, што Расія сутыкнулася з доўгім сістэмным крызісам».
Амбіцыйны праект у тэхналагічнай сферы, тэхнапарк «Сколкава», стаў, па словах былога дырэктара па развіцці тэхнапарка Максіма Кісялёва, «інкубатарам для эмігрантаў». Выканаўчы дырэктар кластара інфармацыйных тэхналогій «Сколкава» Ігар Багачоў ставіцца да ад'езду спецыялістаў па-філасофску, падкрэсліваючы, што Расія «не можа разбурыць рынкавыя механізмы і вярнуць савецкія часы, калі хакеістам з СССР забаранялі гуляць у НХЛ».
Яшчэ адна вобласць, дзе сутыкнуліся з ад'ездам прафесіяналаў, — гэта банкаўская сфера, якая аказалася пад ударам з-за санкцый ЗША і Еўрасаюза, піша Bloomberg. Агенцтва прыводзіць словы Віталя Байкіна, супрацоўніка Газпрамбанка, які вырашыў з'ехаць у ЗША для вучобы ў нью-ёркскай бізнес-школе.
«Рынак капіталу ў Расіі практычна скончыўся. Я не бачу шляхоў для паляпшэння сітуацыі ў бліжэйшыя гады», — заявіў Байкін.
Bloomberg таксама канстатуе, што расце колькасць тых, хто пакідае Расію па палітычных матывах. «Палітыка Крамля прымушае адукаваны клас выбіраць — альбо шыхтавацца пад сцягам вайны з Захадам, альбо з'язджаць», — кажа палітолаг з Масквы Аляксандр Марозаў, які прыняў рашэнне з'ехаць на пастаяннае месца жыхарства ў Германію.
Па словах адваката з Тэль-Авіва Элі Гервіца, які дапамагае грамадзянам Расіі атрымаць ізраільскае грамадзянства, колькасць зваротаў да яго павялічылася, пасля таго як Расія далучыла Крым у сакавіку 2014 года і яе адносіны з Захадам дасягнулі найніжэйшай кропкі з часоў халоднай вайны. Гервіц адзначае, што больш за 90% тых, хто звяртаецца да яго за дапамогай у атрыманні грамадзянства Ізраіля, — «паспяховыя, заможныя людзі». Па словах Гервіца, цяпер узровень эміграцыі ў колькасным дачыненні ніжэйшы, чым у першыя постсавецкія гады, але значна вышэйшы, калі глядзець па ўзроўні даходу тых, хто з'язджае. Кіраўнік міністэрства абсорбцыі Ізраіля (адказвае за палітыку ў галіне іміграцыі) сказаў, што ў апошні час колькасць запытаў на грамадзянства з боку Расіі падвоілася ў параўнанні з пачаткам 2000-х і вырасла на 30% у параўнанні з крызісным 2009 годам.
Год таму Расстат зафіксаваў рэкордную за 15 гадоў хвалю эміграцыі з Расіі: тады са студзеня па жнівень з Расіі эмігравала 203 659 чалавек. За ўвесь 2013 год Расію пакінула 186 382 чалавекі.
Цяпер чытаюць
«Лукашэнка проста не ведае». Ябацьку, які выкладаў у тыкток відэа пра булінг дачкі, пасадзілі на паўтара месяца8
Каментары