U druhim telezvarocie Taćciana Karatkievič zaklikała žančyn pravieści vybary sumlenna POŬNAJE VIDEA

Siońnia a pałovie vośmaj adbyŭsia druhi vystup kandydata ŭ prezidenty Taćciany Karatkievič. Poŭnuju viersiju minułaha vystupu možna pahladzieć tut.

Hetym razam Taćciana Karatkievič zakranuła ekanamičnyja, adukacyjnyja i sacyjalnyja pytańni. Naprykancy jana zaklikała žančyn pravieści vybary sumlenna. 

«Pahladzicie vakoł: usio pamianiałasia za 20 hadoŭ akramia ŭłady. Siońnia narod i kraina pieraraśli svaju ŭładu», — zajaviła Karatkievič. —

Dziaržaŭnaja mašyna ŭzoru 1996 hoda hłuchnie, nie pracuje ŭ 2015 hodzie, značyć, pryjšoŭ čas i jaje źmianiać. Ułada pavinna być nie tormazam, jak ciapier, a ruchavikom raźvićcia, jak budzie pry novym prezidencie». 

«Nasamreč ludzi nie bajacca pieramien, naadvarot, jany žadajuć ich. Adziny, chto ich baicca, — heta moj kankurent na hetych vybarach Alaksandr Łukašenka.

Tamu što lubyja pieramieny pamienšać kantrol ułady nad ekanomikaj, hramadstvam i čałaviekam», — zajaviła Karatkievič.

Kažučy pra «mirnyja pieramieny» ŭ ekanomicy, jana padkreśliła: «Dać volu aktyŭnamu, pradprymalnamu čałavieku, jaki choča i moža pracavać na ziamli, na zavodzie, umieje arhanizoŭvać vytvorčaść ci akazvać pasłuhi. Treba dać mahčymaść ludziam adkryvać svaju spravu i samastojna zabiaśpiečvać siabie. Pracavać na siabie, a nie na čužoha dziadźku ci čynoŭnika». Pa jaje słovach, krainu z kryzisu vyviedzie pryvatny siektar. 

Źviarnuła jana ŭvahu i na prablemu rehijonaŭ: «My zrobim usio, kab raźvivać rehijony, stvarać infrastrukturu, padtrymlivać maładych śpiecyjalistaŭ i maładyja siemji. Praz vyłučeńnie ziamli i lhotnych kredytaŭ dla budaŭnictva doma. Ale rabić heta budziem razumna, z pryciahnieńniem biźniesu i inviestycyj. Takija prajekty vyhadnyja ŭsim — i ludziam, i dziaržavie, i biźniesu».

Taksama Karatkievič abiacaje zrabić usio, kab viarnuć prestyž prafiesii nastaŭnika i zrabić adukacyju sučasnaj. 

Dla hetaha «treba pierastać izalavać našu adukacyju ad sučasnaha śvietu», kaža jana. A nastaŭnika «treba vyzvalić ad masy administracyjnych i ideałahičnych zadač», bo najpierš jon pavinien «vučyć i atrymlivać za heta hodnuju zarpłatu».

Dla tych, chto pačaŭ zadumvacca pra svaju staraść, Karatkievič prapanoŭvaje «ŭvieści nazapašvalnuju sistemu, adkryć niedziaržaŭnyja piensijnyja fondy dla dadatkovych piensijnych źbieražeńniaŭ». 

Taksama jana prapanoŭvaje źnizić adličeńni ŭ sacyjalny fond pry pryjomie na pracu žančyn, u jakich dvoje i bolš dziaciej, što «budzie vyhadna i pradpryjemstvam, i dazvolić žančynam pracavać». Akramia taho, jana abiacaje damahacca roŭnaj apłaty pracy mužčyn i žančyn. «Siońnia heta vialikaja raźbiežka — na 33%. Roŭnaja apłata budzie havaryć pra roŭnaść mahčymaściaŭ i pra ŭzajemapavahu».

Naprykancy vystupu Karatkievič zaklikała vybarčyja kamisii «ličyć hałasy biełarusaŭ sumlenna, adkryta i nie zakryvać vočy na padman». 

Kandydat źviarnułasia da členaŭ učastkovych kamisij, bolšaść ź jakich — žančyny. «Vybary prezidenta — heta nie mieniej važna, čym siamja, tamu što heta naša Radzima, naša kraina, naša ahulnaja budučynia. My ničoha nie damožamsia, kali nie budziem sumlennymi. Ja viedaju, jak vy chvalujeciesia ab tym, što čakaje nas napieradzie, jakaja budučynia ŭ našych dziaciej. Ja prašu vas ličyć hałasy biełarusaŭ sumlenna, adkryta i nie zakryvać vočy na padman. Heta siońnia nadzvyčaj važna. Heta — momant iściny». 

«Pakul niezadavolenaść vykazvajecca tolki na kuchni, vaša mierkavańnie nikoli nie budzie ŭličvacca. Treba pryjści i prahałasavać. Heta vaš zakonny i biaśpiečny šlach pačać pieramieny — u kabincy vy adny, adzin na adzin sa svaim sumleńniem. Dajcie start pieramienam», — hetymi słovami Karatkievič zaklikała biełarusaŭ pryjści na vybarčyja ŭčastki 11 kastryčnika. 

Apytanka

• 0
• 0
• 0
• 0
• 0
• 0
• 0
• 0