Novaja palaŭničaja sprava. Dvoje adsiedziać za ŭsich?
U sudzie Dobrušskaha rajona Homielskaj vobłaści zaviaršajecca razhlad hučnaj kryminalnaj spravy ab niezakonnym palavańni ŭ zonie adsialeńnia Vietkaŭskaha rajona z udziełam słužbovych asob.
KDB sumiesna z MUS vyjaviŭ hrupu brakańjeraŭ, u jakuju ŭvachodzili słužbovyja asoby Dziaržaŭnaj inśpiekcyi achovy žyviolnaha i raślinnaha śvietu pry prezidencie, Biełaruskaha tavarystva palaŭničych i rybałovaŭ, UUS Homielskaha abłvykankama i inšyja žychary Homielskaj vobłaści.
7 śniežni 2014 h. brakańjeraŭ zatrymali supracoŭniki KDB i hrupy «A» z dokazami złačynstva pry pieravozcy niezakonna zdabytaha miasa čatyroch łasioŭ. Pry ahladzie žylla adnaho z brakańjeraŭ było kanfiskavana čatyry karabiny, vosiem adzinak palaŭničaj hładkastvolnaj zbroi, pnieŭmatyčnaja vintoŭka i bolš za 300 patronaŭ da naraznoj zbroi. Suma naniesienaj navakolnamu asiarodździu škody skłała 540 młn rubloŭ.
U dačynieńni da ŭdzielnikaŭ niezakonnaha palavańnia, u tym liku troch supracoŭnikaŭ Dziaržinśpiekcyi achovy žyviolnaha i raślinnaha śvietu, piaci supracoŭnikaŭ UUS Homielskaha abłvykankama i jehiera Vietkaŭskaha śpieclashasa byli raspačatyja kryminalnyja spravy.
Adnak sudzili tolki dvuch abvinavačanych, jakija, pa viersii śledstva, byli arhanizatarami niezakonnaha palavańnia: jehiera śpieclashasa i jaho syna, jaki pracavaŭ namieśnikam načalnika mižrajonnaj inśpiekcyi achovy žyviolnaha i raślinnaha śvietu.
Abodva abvinavačvajucca pa č. 4 art. 282 Kryminalnaha kodeksa (niezakonnaje palavańnie z vykarystańniem miechaničnaha naziemnaha, vodnaha abo pavietranaha transpartnaha srodku z pryčynieńniem škody ŭ asabliva bujnym pamiery) i č. 2 art. 295 (niezakonnaje zachoŭvańnie bojeprypasaŭ). Taksama syn jehiera abvinavačvajecca ŭ złosnym chulihanstvie: padčas bojki kala sielskaha kłuba jon złamaŭ skivicu niepaŭnaletniamu.
Usiaho pa spravie ab niezakonnym palavańni prachodzili 20 čałaviek. Spravu adnaho ź ich vynieśli ŭ asobny praces pa pryčynie chvaroby, a ŭ dačynieńni da bolšaści ŭdzielnikaŭ palavańnia spynili kryminalny pieraśled praz amnistyju pa niereabilitujučych padstavach. Usie abvinavačanyja kampiensavali škodu.
U dačynieńni da dvuch arhanizataraŭ palavańnia kryminalny pieraśled nie spynieny, pakolki jany abvinavačvajucca taksama pa artykule ab niezakonnym zachoŭvańni bojeprypasaŭ, jaki nie padpadaje pad amnistyju.
Śviedkami ŭ sudzie vystupali amnistavanyja ŭdzielniki palavańnia, u tym liku były načalnik DAI Vietkaŭskaha RAUS i supracoŭniki DAI.
Dziaržabvinavaŭca zajaviła na sudzie, što vina baćki i syna była dakazanaja ŭ poŭnym abjomie, i paprasiła prysudzić jehiera da šaści hadoŭ pazbaŭleńnia voli z kanfiskacyjaj majomaści i skaracić termin pakarańnia pa amnistyi na hod.
Namieśnika načalnika inśpiekcyi prakuror paprasiła prysudzić da šaści z pałovaj hadoŭ pazbaŭleńnia voli z kanfiskacyjaj majomaści i taksama skaracić termin pakarańnia pa amnistyi na hod.
Aŭtamabil «UAZ» z numarnym znakam «SIERIEHA», jaki naležyć abvinavačanamu synu jehiera, dziaržabvinavaŭca paprasiła kanfiskavać u dachod dziaržavy jak pryładu ździajśnieńnia złačynstva, a taksama paprasiła kanfiskavać usiu zbroju, kanfiskavanuju padčas pieratrusaŭ va ŭdzielnikaŭ niezakonnaha palavańnia.
Abodva abvinavačanyja nie pryznali svaju vinu. Jehier tolki častkova pryznaŭ vinu ŭ niezakonnym palavańni. Jaho advakat zajaviła, što jašče da zakančeńnia śledstva škoda była całkam vypłačana, źmiakčalnaj akaličnaściu źjaŭlajecca toje, što mužčyna źjaŭlajecca paciarpiełym ad katastrofy na ČAES, tamu jana paprasiła vyzvalić padabaronnaha ad pakarańnia pa amnistyi.
Što tyčycca niezakonnaha zachoŭvańnia bojeprypasaŭ, to ich abvinavačvany vydaŭ supracoŭnikam KDB dobraachvotna, tamu advakat ličyć, što pa dadzienym artykule padabaronnaha nieabchodna apraŭdać.
Advakat syna jehiera adznačyła, što jon byŭ tolki ŭdzielnikam, a nie arhanizataram palavańnia, nie stralaŭ u žyvioł i nie braŭ dla siabie miasa zabitych łasioŭ. Pa słovach advakata, mužčyna maje tolki stanoŭčyja charaktarystyki, byŭ adnym z najlepšych kiraŭnikoŭ inśpiekcyi, u jaho byŭ dobry karjerny rost, ale niezakonnaja palavańnie pierakreśliła ŭsiu jaho karjeru, i heta stała dla jaho dobrym urokam. Tamu advakat taksama prapanavała vyzvalić padabaronnaha pa amnistyi.
Pa słovach advakata, abvinavačvany nie viedaŭ, što zachoŭvaje bajavyja, a nie palaŭničyja patrony, tamu pavinien być apraŭdany, jak i pa artykule za chulihanstva, pakolki dakładna nie dakazana, što mienavita jon nanosiŭ udary.
Apošniaje słova abvinavačanych i prysud pa spravie čakajecca ŭ listapadzie.
Kamientary