У судзе Добрушскага раёна Гомельскай вобласці завяршаецца разгляд гучнай крымінальнай справы аб незаконным паляванні ў зоне адсялення Веткаўскага раёна з удзелам службовых асоб.
КДБ сумесна з МУС выявіў групу браканьераў, у якую ўваходзілі службовыя асобы Дзяржаўнай інспекцыі аховы жывёльнага і расліннага свету пры прэзідэнце, Беларускага таварыства паляўнічых і рыбаловаў, УУС Гомельскага аблвыканкама і іншыя жыхары Гомельскай вобласці.
7 снежні 2014 г. браканьераў затрымалі супрацоўнікі КДБ і групы «А» з доказамі злачынства пры перавозцы незаконна здабытага мяса чатырох ласёў. Пры аглядзе жылля аднаго з браканьераў было канфіскавана чатыры карабіны, восем адзінак паляўнічай гладкаствольнай зброі, пнеўматычная вінтоўка і больш за 300 патронаў да наразной зброі. Сума нанесенай навакольнаму асяроддзю шкоды склала 540 млн рублёў.
У дачыненні да ўдзельнікаў незаконнага палявання, у тым ліку трох супрацоўнікаў Дзяржінспекцыі аховы жывёльнага і расліннага свету, пяці супрацоўнікаў УУС Гомельскага аблвыканкама і егера Веткаўскага спецлясгаса былі распачатыя крымінальныя справы.
Аднак судзілі толькі двух абвінавачаных, якія, па версіі следства, былі арганізатарамі незаконнага палявання: егера спецлясгаса і яго сына, які працаваў намеснікам начальніка міжраённай інспекцыі аховы жывёльнага і расліннага свету.
Абодва абвінавачваюцца па ч. 4 арт. 282 Крымінальнага кодэкса (незаконнае паляванне з выкарыстаннем механічнага наземнага, воднага або паветранага транспартнага сродку з прычыненнем шкоды ў асабліва буйным памеры) і ч. 2 арт. 295 (незаконнае захоўванне боепрыпасаў). Таксама сын егера абвінавачваецца ў злосным хуліганстве: падчас бойкі каля сельскага клуба ён зламаў сківіцу непаўналетняму.
Усяго па справе аб незаконным паляванні праходзілі 20 чалавек. Справу аднаго з іх вынеслі ў асобны працэс па прычыне хваробы, а ў дачыненні да большасці ўдзельнікаў палявання спынілі крымінальны пераслед праз амністыю па нерэабілітуючых падставах. Усе абвінавачаныя кампенсавалі шкоду.
У дачыненні да двух арганізатараў палявання крымінальны пераслед не спынены, паколькі яны абвінавачваюцца таксама па артыкуле аб незаконным захоўванні боепрыпасаў, які не падпадае пад амністыю.
Сведкамі ў судзе выступалі амніставаныя ўдзельнікі палявання, у тым ліку былы начальнік ДАІ Веткаўскага РАУС і супрацоўнікі ДАІ.
Дзяржабвінаваўца заявіла на судзе, што віна бацькі і сына была даказаная ў поўным аб'ёме, і папрасіла прысудзіць егера да шасці гадоў пазбаўлення волі з канфіскацыяй маёмасці і скараціць тэрмін пакарання па амністыі на год.
Намесніка начальніка інспекцыі пракурор папрасіла прысудзіць да шасці з паловай гадоў пазбаўлення волі з канфіскацыяй маёмасці і таксама скараціць тэрмін пакарання па амністыі на год.
Аўтамабіль «УАЗ» з нумарным знакам «СЕРЕГА», які належыць абвінавачанаму сыну егера, дзяржабвінаваўца папрасіла канфіскаваць у даход дзяржавы як прыладу здзяйснення злачынства, а таксама папрасіла канфіскаваць усю зброю, канфіскаваную падчас ператрусаў ва ўдзельнікаў незаконнага палявання.
Абодва абвінавачаныя не прызналі сваю віну. Егер толькі часткова прызнаў віну ў незаконным паляванні. Яго адвакат заявіла, што яшчэ да заканчэння следства шкода была цалкам выплачана, змякчальнай акалічнасцю з'яўляецца тое, што мужчына з'яўляецца пацярпелым ад катастрофы на ЧАЭС, таму яна папрасіла вызваліць падабароннага ад пакарання па амністыі.
Што тычыцца незаконнага захоўвання боепрыпасаў, то іх абвінавачваны выдаў супрацоўнікам КДБ добраахвотна, таму адвакат лічыць, што па дадзеным артыкуле падабароннага неабходна апраўдаць.
Адвакат сына егера адзначыла, што ён быў толькі ўдзельнікам, а не арганізатарам палявання, не страляў у жывёл і не браў для сябе мяса забітых ласёў. Па словах адваката, мужчына мае толькі станоўчыя характарыстыкі, быў адным з найлепшых кіраўнікоў інспекцыі, у яго быў добры кар'ерны рост, але незаконная паляванне перакрэсліла ўсю яго кар'еру, і гэта стала для яго добрым урокам. Таму адвакат таксама прапанавала вызваліць падабароннага па амністыі.
Па словах адваката, абвінавачваны не ведаў, што захоўвае баявыя, а не паляўнічыя патроны, таму павінен быць апраўданы, як і па артыкуле за хуліганства, паколькі дакладна не даказана, што менавіта ён наносіў удары.
Апошняе слова абвінавачаных і прысуд па справе чакаецца ў лістападзе.
Каментары