Ukrainskaja dziaŭčynka, žyćcio jakoj vyratavali bresckija daktary, raniej žyła za 7 km ad Zaparožskaj AES
U Breście lekary dziciačaj abłasnoj balnicy vyratavali žyćcio 14-hadovaj Ani Ćviatkovaj, jakaja pierajechała z baćkami z Dnieprapiatroŭskaj vobłaści. Joj rekamiendavana prajści abśledavańnie i, chutčej za ŭsio, spatrebicca apieracyja.
U balnicu Aniu dastavili ŭ ciažkim stanie ranicaj 13 kastryčnika. Napiaredadni ŭ jaje rezka pavysiłasia tempieratura, vanitavała z kryvioju.
«Tut surjoznaje zachvorvańnie piečani, — paviedamiŭ zahadčyk chirurhičnaha adździaleńnia balnicy Siarhiej Hałubicki. — U dziaŭčynki była značnaja strata kryvi — kala paŭtara litra. Spatrebiłasia pieralivańnie kryvi, a taksama zamianialniki kryvi, darahija preparaty. Joj patrebna dalejšaje abśledavańnie ŭ Minsku, dzie mahčyma praviadzieńnie apieracyi».
Pavodle śpiecyjalista, kryvaciok moža paŭtarycca ŭ luby momant i kožny paŭtorny pahražaje nie tolki paharšeńniem stanu dziciaci, ale i niebiaśpiečny dla jaje žyćcia.
Uličvajučy, što junaja pacyjentka i jaje baćki — hramadzianie Ukrainy, im daviałosia častkova apłacić znachodžańnie ŭ dziciačaj abłasnoj balnicy. Abśledavańnie ŭ staličnym dziciačym chirurhičnym centry i apieracyja, pavodle zakanadaŭstva Biełarusi, taksama nie buduć biaspłatnymi.
U Kamianiecki rajon ŭkrainskaja siamja, u jakoj vychoŭvajucca čaćviora dziaciej, pierajechała na pačatku kastryčnika.
U Ani jość dva braty, 16 i 4 hadoŭ, i paŭtarahadovaja siastryčka. Baćka Siarhiej Mikałajevič uładkavaŭsia na pracu ŭ miascovuju haspadarku, jakaja dała pierasialencam žyllo.
«Kažuć, što biez apieracyi ŭ našym vypadku naŭrad ci abydziecca. Ale najpierš treba prajści abśledavańnie, daviedacca, što heta za zachvorvańnie i čym jano spravakavana, — raspavioŭ baćka. — Va Ukrainie Ania była na abśledavańni, ale pra toje, što za chvaroba, lekary ničoha kankretnaha nam nie kazali. My nie viedali, kudy źviartacca. Va Ukrainie zaraz inšyja prablemy, nie miedycynskija».
«My žyli za 7 kiłamietraŭ ad Zaparožskaj AES, — rastłumačyŭ Siarhiej Mikałajevič. — U Ani byli častyja hałaŭnyja boli. Ale z momantu našaha pierasialeńnia jaje stan, zdavałasia, narmalizavaŭsia, jana ni na što nie skardziłasia.
Ekałohija, my ŭsie heta adčuvajem, tut značna lepš, čym u horadzie Marhaniec, dzie my žyli da pierajezdu».
Baćka maje namier telefanavać u Respublikanski centr dziciačaj chirurhii. Jon źviarnuŭsia ŭ Hienieralnaje konsulstva Ukrainy ŭ Breście z prośbaj akazać materyjalnuju dapamohu.
Rachunak dla zboru srodkaŭ na lačeńnie Ani pakul nie adkryty.
Kamientary