Ministerstva ŭnutranych spraŭ Čechii admoviłasia zajmacca spravaj ab nadańni aktyvistu biełaruskaj apazicyi Alaksieju Šydłoŭskamu palityčnaha prystanišča.
Jak paviedamiŭ BiełaPAN A. Šydłoŭski, jamu patłumačyli, što ŭ adpaviednaści z Dublinskim pahadnieńniem zajmacca spravaj ab pradastaŭleńni palityčnaha prystanišča pavinna kraina, jakaja vydała bolš doŭhaterminovuju vizu.
«Na toj momant u mianie dziejničała hadavaja litoŭskaja viza, a češskaja była vydadziena tolki na try dni. Niezrazumieła tolki, navošta mianie było trymać u łahiery dla biežancaŭ paŭtara miesiaca», — padkreśliŭ jon.
A. Šydłoŭski paviedamiŭ, što z Čechii jon byŭ vysłany ŭ Litvu, adnak litoŭskija ŭłady nie viedali padrabiaznaści jaho spravy i chacieli nakiravać u Biełaruś.
«U vyniku mnie ŭdałosia damovicca, kab mianie nakiravali va Ŭkrainu», — zaznačyŭ jon.
Aktyvist apazicyi pakul nie źbirajecca viartacca ŭ Biełaruś.
«Mianie aryštujuć užo na miažy, ja ŭniesieny ŭ adpaviedny śpis. Moj advakat daviedaŭsia, što ja abjaŭleny ŭ vyšuk pa Biełarusi, a sprava ŭ dačynieńni da mianie znachodzicca ŭ zakansiervavanym stanie. Ciapier u mianie skončyŭsia termin dziejańnia litoŭskaj vizy. Budu sprabavać znoŭ atrymać češskuju vizu, hetym razam farmalnych pryčyn admović u razhladzie maj spravy nie budzie», — paviedamiŭ jon.
A. Šydłoŭski vymušany byŭ prasić palityčnaje prystanišča paśla taho, jak u Biełarusi ŭ jaho dačynieńni ŭ kancy 2007 hoda była raspačata sprava na padstavie č. 3 art. 339 Kryminalnaha kodeksa (chulihanstva), zhodna ź jakoj jamu pahražaje da 10 hadoŭ pazbaŭleńnia voli. Kryminalnaja sprava była adkryta paśla bojki ŭ mahazinie, što ŭźnikła paśla svarki z pradaŭcom z‑za partreta Alaksandra Łukašenki. A.Šydłoŭski zajaŭlaje, što bojka była spravakavana.
U lutym 1998 hoda A.Šydłoŭski byŭ asudžany da 1,5 hoda pazbaŭleńnia voli pa abvinavačańni ŭ złosnym chulihanstvie za naniasieńnie antyprezidenckaha hrafici na ścieny damoŭ u Stoŭbcach Minskaj vobłaści. U 2001 hodzie za ŭdzieł u dziejnaści niezarehistravanaha maładziožnaha ruchu «Zubr» jon byŭ asudžany da dvuch hadoŭ papraŭčych rabot i vyklučany ź Instytuta sučasnych viedaŭ.
Kamientary