Biełaruś praciahnuła da 31 śniežnia 2027 hoda zabaronu na ŭvoz praź litoŭska-biełaruskuju miažu aŭtatranspartam šerahu tavaraŭ, jakija ŭvoziacca dla realizacyi abo spažyvańnia na terytoryi krainy. Zroblena heta pastanovaj Saŭmina ad 30 sakavika 2026 hoda № 145, apublikavanaj siońnia na Nacyjanalnym pravavym partale.
Zdymak ilustracyjny. Fota: «Naša Niva»
Takaja zabarona ŭpieršyniu była ŭviedziena z 1 krasavika 2024 hoda terminam na paŭhoda. Potym jana trojčy praciahvałasia na anałahičny pieryjad. Ciapier ža, atrymlivajecca, jaje prałanhavali adrazu na hod i dzieviać miesiacaŭ.
Zabarona tyčycca na hety momant takich tavaraŭ, jak:
- vody minieralnyja i hazavanyja;
- vody inšyja;
- vody, uklučajučy minieralnyja i hazavanyja, jakija ŭtrymlivajuć dabaŭki cukru ci inšych padsałodžvalnych abo smaka-aramatyčnych rečyvaŭ;
- biezałkaholnaje piva;
- piva soładavaje;
- viny vinahradnyja naturalnyja, uklučajučy macavanyja; susła vinahradnaje;
- viermuty i vinahradnyja naturalnyja viny inšyja z dadavańniem raślinnych abo aramatyčnych rečyvaŭ u sasudach jomistaściu 2 ł abo mienš;
- napoi inšyja zbrodžanyja (naprykład, sidr, sidr hrušavy, napoj miadovy, sake); sumiesi sa zbrodžanych napojaŭ i sumiesi zbrodžanych napojaŭ i biezałkaholnych napojaŭ, u inšym miescy nie nazvanyja;
- śpirt etyłavy i inšyja śpirtavyja nastojki, denaturavanyja, luboj kancentracyi;
- vocat i jaho zamieńniki;
- šyny i pakryški pnieŭmatyčnyja humovyja;
- užyvanyja častki i prynaležnaści transpartnych srodkaŭ.
Zabarona nie raspaŭsiudžvajecca, siarod inšych vyklučeńniaŭ, na tavary, jakija ŭvoziacca fizičnymi asobami dla asabistaha karystańnia.
Kamientary