Biełaruski padletak viadzie tyktok pra žyćcio na chutary i sabraŭ amal 400 tysiač padpisčykaŭ
Niekalki hadoŭ tamu šmatdzietnaja siamja pierajechała z horada na chutar pad Ašmianami: adnavili napaŭrazburanuju chatu, zaviali vialikuju haspadarku. Kali starejšy syn, 17‑hadovy Ženia, zavioŭ błoh «PRO Chutar», jaho padtrymali i va ŭsim dapamahajuć z kantentam. Vydańnie Times.by daviedałasia, jak źjaŭlajucca tyja samyja roliki dla TikTok i ŭ jakich umovach žyvuć žyvioły — hałoŭnyja hieroi videa.
Zdymać videa Ženia pačaŭ jašče ŭ 10 hadoŭ. Spačatku heta byli prostyja roliki biez asablivaj idei, ale z časam jon staŭ vučycca mantažu i pracy z kantentam.
«Ja zdymaju dla dušy, heta prynosić mnie zadavalnieńnie. Da svajho kanała ja staŭlusia vielmi raŭniva i starajusia davać ludziam jakasny kantent, jaki jany zmohuć pahladzieć», — raspaviadaje błohier.
Vialikaja siamja i niezvyčajnaja haspadarka
Ideja zavieści haspadarku ŭźnikła ŭ baćkoŭ Ženi daŭno. Kali źjaviłasia mahčymaść, jany adrazu nabyli dom u zacišnym miescy. Jak uzhadvaje sam błohier, raniej tut była vioska, ale z časam bolšaść žycharoŭ źjechali, chaty źnieśli. U vyniku zastalisia ŭsiaho dźvie chaty — ich siamja i vykupiła.
Akramia zvykłych kurej, kačak, trusoŭ, karoŭ, u niezvyčajnaj haspadarcy na chutary žyvuć aviečka, janot, dzikabraz i paŭliny.
Šmat kamientaryjaŭ u błohu źbiraje voślik pa mianušcy Hrej, i heta zrazumieła: vialikija vyraznyja vočy sami prosiacca ŭ kadr. Adnak pryčyn dla smutku niama — dla jaho stvoranyja ŭsie nieabchodnyja ŭmovy. U budučyni na vośliku płanujuć katać dziaciej, raskazaŭ Ženia. Praŭda, jaho jašče treba navučyć, dy i vytrymlivaje jon nie bolš za 40 kiłahramaŭ.
Nievierahodnaj pryhažości fazany, paŭliny i navat kury na chutary — parodzistyja. Ženia pravodzić ekskursiju i raskazvaje, pavodle jakoha pryncypu jany raźmieščanyja ŭ ptušniku. Naprykład, u valjery z paŭlinami paviercham vyšej žyvuć biełyja hałuby — takoje susiedstva daje mahčymaść ptuškam adčuvać siabie ŭ biaśpiecy i nie zaminać adzin adnamu. Paŭliny z fazanami terytoryju nie zmohuć padzialić, tamu dla ich siamja pabudavała roznyja valjery.
«Praktyčna ŭsie ptuški kamiery nie bajacca, bo my ź imi z samaha naradžeńnia. A voś z paŭlinami, jakich my zabirali ŭžo darosłymi, znajści kantakt značna składaniej», — adznačaje błohier.
Dzimon, błakitnaja karova Iłvi i cikaŭnaja Belis
Ženia pakazaŭ zahony sa śvińniami. Zazirnuli i da trusoŭ. Siamja daŭno šukaje čystaparodnaha vienskaha błakitnaha trusa — znajšli tolki trusichu.
«Znajści ich u Biełarusi — sapraŭdny kvest! A vieźci z-za miažy ciažka: šmat papiarovaj ciahaniny», — zaŭvažaje błohier.
Pasiadzieli i ŭ znajomym padpisčykam traktary Dzimonie. Nazvali jaho ŭ honar siabra siamji. Traktar vybirali staranna, hałoŭny kryteryj — pamier kabiny.
«Moj rost — 198 sm, tataŭ — 205 sm, i ŭ kitajski my b nie ŭleźli», — śmiajecca Ženia.
Vybar prypaŭ na traktar «Biełarus» — jon vydatna spraŭlajecca z zadačami na chutary.
Ženia pakazaŭ karoŭnik, jaki jany pabudavali sami. Z-za aharodžy ŭ hety čas za haściami sočyć cikaŭnaja aviečka Belis — ulubionka siamji i častaja hierainia błoha ŭ TikTok.
«Našy karovy nas viedajuć i kamunikujuć z nami», — adznačaje Ženia. Charaktar va ŭsich rozny: błakitnaja karova Iłvi, naprykład, lubić abdymacca. A rudaja Biełka hetaha rabić ni za što nie budzie.
Ekzatyčnyja hadavancy: dzikabraz na fiermie
Voś kaho sustreć nie čakali, dyk heta dzikabraza! Navat takomu ekzatyčnamu źviarku znajšłosia svajo ŭtulnaje i čystaje miesca. Trymać jaho davoli składana. Sietku, jakoj była zakrytaja bramka valjera, dzikabraz prahryz. Tamu pa-nad joj pryjšłosia macavać list mietału. Tyja ihołki, jakija dzikabraz vypuściŭ pabačyŭšy haściej, — miakkija i ełastyčnyja.
«A pad imi ŭ jaho jość ćviordyja ihołki, jakimi jon i abaraniajecca. Niebiaśpiečnym jon moža być tolki dla nieaściarožnych haściej, a svaich haspadaroŭ žyviolina prymaje», — raspaviadaje błohier.
Hości spynilisia kala valjera janota pa mianušcy Nota. Janoty sami pa sabie ručnyja i łaskavyja, ale im patrebien čas, kab pryvyknuć da novych znajomych. Užo praź niekalki chvilin Nota siadzieła na kaleniach u haspadara.
Niahledziačy na miły vyhlad, heta dzikaja žyvioła z vostrymi zubami. Ženia papiaredžvaje: zdymać Notu treba aściarožna — janoty lubiać usio chapać, tamu mikrafon ci telefon mohuć chutka apynucca ŭ łapkach.
Darečy, usie razam sačyli za losam janota-nielehała Sieni (Jasienii) z Amieryki. Navat jeździli jaho praviedać — dumali zabrać na chutar. Adnak rehistracyja i karancin takoj žyvioliny — praces niachutki. A paśla vyśvietliłasia, što Sienia i ŭvohule dziaŭčynka.
«A ŭ kampaniju Noty bolš padyšoŭ by samiec», — kaža Ženia.
Z takoj kolkaściu žyvioł pracy na chutary chapaje ŭsim. U siamji starajucca raźmierkavać abaviazki, kab dahladać žyvioł było zručniej, ale strohaha padziełu niama. Kali chtości zaniaty, jaho zaŭsiody mohuć padmianić.
Siamiejny prajekt
U kanała «PRO Chutar» amal 400 tysiač padpisčykaŭ, i mnohija ź cikavaściu sočać za tym, što adbyvajecca ŭ haspadarcy: padpisčyki viedajuć žyvioł pa imionach.
Niahledziačy na toje što błoh viadzie Ženia, heta ŭ niejkim sensie siamiejny prajekt. Sam jon zajmajecca i mantažom svaich rolikaŭ — robić heta prosta ŭ telefonie. A sa zdymkami čaściej za ŭsio dapamahaje mama, vystupajučy ŭ roli apieratara.
«Ja liču, što ŭsio atrymałasia tamu, što syšłosia šmat faktaraŭ. U pieršuju čarhu — padtrymka siamji. A jašče — ćviordaja ŭpeŭnienaść u sabie», — kaža juny błohier.
Kožnaje videa — heta nie prosta kadry z žyćcia, a pradumanaja historyja. Časta idei prydumlajucca ŭsioj siamjoj: za ahulnym stałom kožny prapanuje svaje varyjanty, paśla čaho vybirajecca lepšy.
Pry hetym błoh nie źjaŭlajecca krynicaj dachodu: Ženia śviadoma nie imkniecca da manietyzacyi, choć časam u siecivie ludzi sami prapanujuć dapamohu — finansavuju ci ŭ vyhladzie padarunkaŭ.
Ženia adznačaje, što było b zdorava mieć siarod padpisčykaŭ ludziej, jakija raźbirajucca ŭ žyviołahadoŭli:
«Zaŭsiody pryjemna, kali čałaviek, jaki viedaje spravu, moža dać słušnuju paradu. Dzialicca vopytam karysna!»
A pakul na dapamohu prychodzić internet. Kali źjaŭlajecca novy hadavaniec, raskazvaje Ženia, byvaje naohuł niezrazumieła, jak jaho dahladać. Błohier prahladaje ŭsiu dastupnuju infarmacyju.
«U kožnaj žyvioły svaje ŭmovy pražyvańnia, jość šmat niuansaŭ. I heta adnosicca i da pabudovy valjeraŭ, i da ŭtrymańnia».
Kankurencyi juny błohier nie baicca:
«Błohaŭ pra sielskuju haspadarku šmat, ale mnohija pracujuć na kolkaść, a nie na jakaść. Heta niadrenna — prosta im tak padabajecca. U ich taki styl, a ŭ mianie — inšy».
Vučoba i płany na budučyniu
Ženia vučycca na buchhałtara ŭ Ašmianskim kaledžy. Rašeńnie ab vybary prafiesii jon pryniaŭ za niekalki dzion, ale pra svoj vybar nie škaduje.
«Pieršapačatkova ja nie viedaŭ, kudy iści. I ŭ dziaviatym kłasie hetaje pytańnie było dla mianie pakutaj. U vyniku ja zrazumieŭ, što treba pastavicca da hetaha praściej. Ja vyvučyŭ, što mohuć dać u našym kaledžy, i vybraŭ buchhałteryju. Papiarovaja praca mnie taksama padabajecca, dy i na chutary heta potym spatrebicca», — upeŭnieny błohier.
Nie mara, a meta
Ženia chacieŭ by zrabić tut sapraŭdnuju ahrasiadzibu. Takuju, kab luby achvotny zmoh pryjechać i asabista ŭbačyć usich nasielnikaŭ chutara.
Darohi da doma pakul niama — dabiracca davodzicca naprastki praz pole. Ale samo miesca padychodzić vydatna — cichi kavałačak pryrody siarod lasoŭ i paloŭ. I, niby ŭ paćvierdžańnie hetych słoŭ, u momant zdymki prosta nad chutaram pralatajuć čarody pieralotnych ptušak.
Kolki kaštuje leŭ i dzie kupić viarbluda? Biełaruska 18 hadoŭ tamu pierajechała ŭ viosku i zaviała zaasad
Z valjera zaasadu na vačach u naviedvalnikaŭ uciakła vaŭčyca. Administracyja: Ničoha strašnaha, jana sama baicca ludziej
U Mahiloŭskim zaasadzie źjaviŭsia redki bieły viarblud
Pry hrodzienskaj trasie kala Vałožyna možna rehularna nazirać za statkam zubroŭ VIDEA
Kamientary