Karatkievič zaklikała pradprymalnikaŭ brać aktyŭny ŭdzieł u budučaj parłamienckaj kampanii
Aktyvistka kampanii «Havary praŭdu» Taćciana Karatkievič 11 studzienia naviedała antykryzisny forum pradprymalnikaŭ, jaki prachodziŭ u Minsku, i zaklikała pradstaŭnikoŭ małoha biźniesu ŭziać aktyŭny ŭdzieł u vybarach u Pałatu pradstaŭnikoŭ.
Jak paviedamiła palityk BiełaPAN, u hutarcy z pradprymalnikami jana vykazała svaju pazicyju pa ŭźnikłych u ich prablemach. «Ja rada, što jany prajaŭlajuć salidarnaść, sustrakajucca, vypracoŭvajuć ahulnaje pałažeńnie ab tym, jak vychodzić z prablem, jakija isnujuć siońnia ŭ asiarodździ pradprymalnikaŭ», — skazała Karatkievič.
Jana zaklikała pradprymalnikaŭ praciahvać udzielničać u dyjałohach z savietami pa raźvićci pradprymalnictva, deputatami, «kab danosić svaju pazicyju da pradstaŭnikoŭ ułady i inšych hramadskich dziejačaŭ». Akramia taho, ličyć Karatkievič, pradprymalnikam nieabchodna źviarnucca pa padtrymku da hramadstva, jakoje, na dumku aktyvistki, nie da kanca razumieje prablemy pradprymalnictva.
«Ja prapanavała pradprymalnikam aktyŭna ŭdzielničać u parłamienckaj kampanii, abaviazkova padrychtavać svaich kandydataŭ u deputaty i prapanavała taksama ŭklučycca ŭ śpis» TaK! «, jaki ja siońnia farmiruju», — raskazała Karatkievič.
Na jaje dumku, dziaržava pavinna zaachvočvać pradprymalnikaŭ i razhladać ich jak ludziej, zdolnych arhanizavać samazaniataść, a nie «krynicu lohkich hrošaj», jakija možna atrymać pavyšeńniem padatkaŭ, uviadzieńniem novych štrafaŭ i h.d. Akramia taho, u kryzisny čas dziaržava pavinna stvarać umovy dla zabieśpiačeńnia samazaniataści ludziej, ličyć Karatkievič.
U śpis kampanii «Havary praŭdu» «TaK! Za mirnyja pieramieny» uvachodzić bolš za 20 čałaviek, a z ulikam lidaraŭ arhanizacyi — kala 30. Pavodle słoŭ Karatkievič, śpis farmirujecca niezaležna ad partyjnaści i palityčnych pohladaŭ hramadzian, abjadnoŭvajučy nie arhanizacyi, a ludziej.
Vybary ŭ Pałatu pradstaŭnikoŭ pavinny adbycca nie paźniej za 11 vieraśnia, pryznačyć ich varta da 10 červienia. Deputaty abirajucca pa mažarytarnaj sistemie ŭ 110 akruhach.
«Dla Kijeva było b lepš, kab Biełarusi nie isnavała naohuł». Vialikaja razmova z ukrainskim palitołaham Jaŭhienam Mahdam8
Kamientary