U zabitym kamandziru DNR apaznali kryminalnika z Mahilova
Niadaŭna rasijskija ŚMI paviedamili pra toje, što ŭ Daniecku nieviadomy snajpier zabiŭ padpałkoŭnika DNR Jaŭhiena K. z pazyŭnym «Kot». Jak vyśvietliŭ «Biełaruski partyzan», zabity kamandzir bajevikoŭ — žychar Mahilova, jaki adpraviŭsia vajavać na ŭschod Ukrainy ŭ mai 2014 hoda.
Miedyjnyja resursy sieparatystaŭ DNR aceńvajuć zasłuhi hramadzianina Biełarusi K. vielmi vysoka. Jon byŭ namieśnikam kambryha niejkaj «100-j motastrałkovaj bryhady».
«Jaŭhien Jurjevič prajšoŭ praktyčna ŭsie klučavyja bai za svabodu našaj maładoj Respubliki. Zmahaŭsia za «likvidacyju katłoŭ» na miažy z RF, udzielničaŭ u abaronie Šachciorska i Savur-Mahiły, u nastupie na paŭdniovym učastku, u bajach za aeraport, atrymaŭ ranieńnie», — pišuć pra jaho miedyi sieparatystaŭ.
«Kot byŭ sapraŭdnym vajskoŭcam, jaki prajšoŭ haračyja kropki na Paŭnočnym Kaŭkazie. I kali navisła pahroza samomu isnavańniu ruskaha Danbasa, jon biez usialakich sumnievaŭ staŭ na jaho abaronu. Viečnaja pamiać tabie, vierny syn svabodnaha Stepa» — zajaviŭ miascovym žurnalistam niechta Alaksandr Maciušyn, pazyŭny «Varah».
Sapraŭdy, K. udzielničaŭ navat u vajennym paradzie, jaki atrady sieparatystaŭ zładzili ŭ centry Daniecka, išoŭ na čale kałony svajho bataljona. Na fota — jon u centry.
Pa fatahrafijach, jakija jon časam vykładvaŭ u sacyjalnaj sietcy «Adnakłaśniki», vidać, što na Danbas Konanaŭ pryjechaŭ litaralna adrazu, jak Rasija pačała tam śpiecapieracyju.
Jon lubiŭ fatahrafavacca na fonie darahich inšamarak sa zbrojaj. Na adnoj z fatahrafij jon staić la inšamarki z čačenskimi numarami i ŭ kamientary pad fatahrafijaj napisaŭ, što «heta Čačnia pryjechała na Danbas».
Staronka K. u «Adnakłaśnikach» była zamaskiravanaja pad nik «111111111». Niechta apošni raz zachodziŭ na jaje 10 studzienia. Ale heta dakładna jaho staronka, bo siarod jaho siabroŭ šmat žycharoŭ Mahilova. Taksama jon pakazaŭ svajactva z dvuma svaimi bratami, adzin ź jakich skončyŭ Mahiloŭskuju škołu milicyi i chavajecca pad nikam «Dziadzia Vania». Choć, miarkujučy pa ŭsim, heta jaho zvodnyja braty, narodžanyja ŭ druhoj siamji baćki.
U pierapiscy pad fatahrafijami siabry nazyvali jaho Ženiem. Klikali pryjechać na radzimu i vypić harełki.
Jaŭhien Konanaŭ adkazvaje, što ciapier jaho novaja radzima — heta DNR.
Jak nam raspaviali ludzi, jakija viedali K. pa Mahilovie, u zahinułaha «padpałkoŭnika DNR» bahataja bijahrafija.
U Mahilovie siarod siabroŭ u jaho była mianuška Koša. Jon ros adzin z maci, jakaja ŭ 90-ch hadach pracavała kamiercyjnym dyrektaram na rehienieratarnym zavodzie. Žyli jany ŭ centry, nasuprać haścinicy «Mahiloŭ».
Adsłužyŭšy ŭ desantnych vojskach u Marjinaj Horcy jon viarnuŭsia dadomu, ale na hramadziancy žyćcio nie vielmi załadziłasia. Jaŭhien K. rana ažaniŭsia, u Mahilovie ŭ jaho zastalisia dźvie dački.
Susiedzi K. raspaviali, što ŭ Mahilovie jon byŭ sudzimy za razboj. Hetym možna rastłumačyć, čamu siarod jaho siabroŭ u «Adnakłaśnikach» jość vidavočna ludzi z kryminalnym minułym i sudzimyja.
Paśla hetych pieršych niepryjemnaściaŭ K. źjechaŭ u Maskvu na budoŭlu zarablać hrošy. Jaho pasadzili ŭ Rasii, ale niejkim dziŭnym čynam jon apynuŭsia ŭ Daniecku.
Tut jon sustreŭ žančynu i zavioŭ novuju siamju. U žniŭni ŭ Daniecku ŭ K. naradziŭsia syn. U Mahiloŭ jon dakładna ŭžo viartacca nie źbiraŭsia.
Ci Jaŭhien K. zahinuŭ ad kuli ŭkrainskaha snajpiera? Ci jaho śmierć — vynik razborak ŭnutry bajevikoŭ?
Tak sumna skončyŭsia los «sałdata ŭdačy» z Mahilova. Pachavajuć jaho pad Danieckam.
Heta ŭžo nie pieršaja śmierć hramadzian Biełarusi, jakija adpraŭlajucca vajavać za sieparatystaŭ DNR / ŁNR.
Jość siarod najomnikaŭ i žančyny, jak snajpierka z Barysava, ślady jakoj pakul źnikli.
«Dla Kijeva było b lepš, kab Biełarusi nie isnavała naohuł». Vialikaja razmova z ukrainskim palitołaham Jaŭhienam Mahdam21
Kamientary