Miemaryjalnaja doška Valancinu Bialkieviču siońnia adkrytaja ŭ Minsku pa adrasie vulica Enhielsa, 34, dzie žyŭ hety viadomy biełaruski futbalist.
Siońnia Valancinu Bialkieviču spoŭniłasia b 43 hady. Jon pajšoŭ z žyćcia 1 žniŭnia 2014 hoda.
Futbołam jon pačaŭ zajmacca niedaloka ad doma — na stadyjonie «Dynama» ŭ dziciača-junackaj škole prasłaŭlenaha staličnaha kłuba. Pieršy trenier Michaił Bratčenia razhledzieŭ talent techničnaha paŭabaroncy, jaki ŭ 1991 hodzie debiutavaŭ u minskim «Dynama» ŭ 1/16 finału rozyhryšu Kubka Savieckaha Sajuza. U składzie minčan Bialkievič staŭ piacirazovym čempijonam i dvuchrazovym uładalnikam Kubka Biełarusi. U 1996 hodzie Valancin Bialkievič pierajšoŭ u lepšy kłub Ukrainy - kijeŭskaje «Dynama», dzie adrazu staŭ adnym ź lidaraŭ, potym byŭ kapitanam kamandy. Razam z kijeŭskimi dynamaŭcami Valancin Bialkievič 8 razoŭ zavajoŭvaŭ zołata ŭkrainskaha čempijanatu i 7 razoŭ Kubak krainy. U 1999 hodzie hulaŭ za kijeŭskaje «Dynama» ŭ paŭfinale samaha prestyžnaha kłubnaha turniru Staroha Śvietu — Lizie čempijonaŭ.
U składzie nacyjanalnaj zbornaj Biełarusi Valancin Bialkievič pravioŭ 56 matčaŭ, zabiŭšy 10 miačoŭ. Hulniavuju karjeru jon zaviaršyŭ u 2009 hodzie ŭ bakinskim «Intery», paśla čaho pracavaŭ u trenierskich štabach maładziožnych kamand kijeŭskaha «Dynama». Valancin Bialkievič nie raz pryznavaŭsia lepšym futbalistam Biełarusi i čempijanatu Ukrainy.
U cyrymonii ŭziali ŭdzieł svajaki i siabry Valancina Bielkieviča, pradstaŭniki Minharvykankama, Ministerstva sportu i turyzmu, asacyjacyi «Biełaruskaja fiederacyja futboła», vieterany i balelščyki FK «Dynama-Minsk» i inšych biełaruskich futbolnych kłubaŭ. U piatnicu, 29 studzienia, u minskim futbolnym maniežy adbudziecca matč pamiaci, u jakim na pole vyjduć kamandy vieteranaŭ kijeŭskaha «Dynama» i siabroŭ Valancina Bialkieviča.
Kamientary