U favory va ŭładaŭ. Čyža ŭ niefarmalnaj kamandzie Łukašenki źmianiŭ Mašenski
Asnoŭny ŭładalnik «Santa Bremara» i «Savuškina pradukta» Alaksandr Mašenski ŭsio čaściej źjaŭlajecca ŭ kampanii prezidenta na zabaŭlalnych mierapryjemstvach. Pra heta raspaviali infarmavanyja krynicy.
Učorašniaje paviedamleńnie pra zatrymańnie Juryja Čyža naradziła pytańnie, chto ž zaniaŭ jaho miesca ŭ kamandzie prezidenta, jakaja supravadžaje Alaksandra Łukašenku na adpačynku, kancertach i inšych padobnych mierapryjemstvach.
«Mašenskaha stali čaściej pryciahvać. Nakolki viedaju, jon byŭ u Sočy [padčas karotkaterminovaha adpačynku prezidenta]. Jon, Šakucin, Zacharaŭ, Ciacieryn… Nu heta značyć tradycyjnaja hrupa padtrymki ź biźniesmienaŭ, spartsmienaŭ, siabroŭ, pryhožych dziaŭčat», — kaža infarmavanaja krynica.
Zrešty, surazmoŭcy nahadvajuć, što ni dla kaho nie było sakretam, što «Alaksandr Michajłavič byŭ u favory va ŭładaŭ». «Moža, nie ŭsie jaho inicyjatyvy znachodzili padtrymku i jamu nie ŭsio było dazvolena, ale jaho ŭvachodžańnie ŭ hetuju «tusoŭku» — heta nie siensacyja», miarkujuć krynicy.
U 2010 hodzie Alaksandr Mašenski uvachodziŭ u lik davieranych asob kandydata ŭ prezidenty Alaksandra Łukašenki. Paśla hetaha biznesmena chacieli zrabić nieŭjaznym u Jeŭrasajuz. Ale jamu ŭdałosia abaranicca, raźviejać sumnieńni i, bolš za toje, naładzić pastaŭki svajoj pradukcyi ŭ ES.
«Usim viadoma, što Alaksandr Ryhoravič [Łukašenka] dapamoh Mašenskamu adkryć dźviery na rasijski rynak. Kali ich nie puskali ź vialikimi abjomami ŭ Rasiju, mienavita ŭmiašalnictva Łukašenka spryjała hetamu. Heta adna z pryčyn jakaja jość siońnia status-kvo», — nahadvaje surazmoŭca.
Pa vynikach 2014 hoda vyručka chołdynhu Alaksandra Mašenskaha pieravysiła miljard dalaraŭ. Tolki «Savuškin pradukt» i «Santa Bremar» akumulavali 480 i 442 młn dalaraŭ adpaviedna, piša «Ježiednievnik», pavodle viersii jakoha Mašenski zaniaŭ treciaje miesca ŭ rejtynhu samych upłyvovych biełaruskich biźniesmienaŭ. Paśla ŭviadzieńnia Rasijaj praduktovaha embarha ŭ dačynieńni da zachodnich krain pazicyi małočnaha i rybnaha biznesaŭ pradprymalnika z Bresta jašče bolš ŭzmacnilisia.
Nielha nie zhadać pra hramadskuju dziejnaść Alaksandra Mašenskaha. Biznesmen źjaŭlajecca členam Savieta pa raźvićci pradprymalnictva ŭ Biełarusi i Savieta pa raźvićci ekspartu i tavarapravodnaj sietki za miažoj, źjaŭlajecca hanarovym konsułam Isłandyi ŭ Biełarusi i staršynioj Biełaruskaj fiederacyi viesłavańnia, uvachodzić u naziralnuju radu Banka raźvićcia.
Alaksandr Mašenski pakul niedastupny dla kamientaroŭ.
Ciapier čytajuć
U Biełarusi množacca placoŭki dla tancaŭ na śviežym pavietry — pahladzicie, jak adpalvajuć razam moładź i piensijaniery ŭ Sierabrancy8
Kamientary