«Z Banderaj Ukrainu ŭ ES nie prymuć»: u Polščy pryhrazili błakavać šlach Ukrainy ŭ Jeŭrasajuz
Ministr nacyjanalnaj abarony Polščy Uładzisłaŭ Kasiniak-Kamyš zajaviŭ, što jaho kraina nie pahodzicca na ŭstupleńnie Ukrainy ŭ Jeŭrapiejski sajuz, kali Kijeŭ nie spynić ušanoŭvać šerah histaryčnych dziejačaŭ, piša RBK-Ukraina.
Padčas razmovy čynoŭnik adznačyŭ, što Ukraina sutykniecca z surjoznymi prablemami na šlachu da ŭstupleńnia ŭ Jeŭrapiejski sajuz, kali praciahnie vykarystoŭvać AUN i UPA ŭ jakaści nacyjanalnych simvałaŭ.
«My (u ES) nie pavinny ŭzvodzić na pjedestał tych, chto razburaje jeŭrapiejskaje supracoŭnictva. Z Banderaj Ukraina nie ŭstupić u Jeŭrapiejski sajuz. Nichto nie budzie ŭkazvać nam, jak hałasavać adnosna ŭstupleńnia toj ci inšaj krainy ŭ Jeŭrapiejski sajuz», — skazaŭ jon.
Taksama Kasiniak-Kamyš pahadziŭsia ź mierkavańniem, što ŭ Kijevie nibyta isnujuć siły, jakija nie chočuć, kab Ukraina stała členam Jeŭrasajuza.
Akramia taho, jon adznačyŭ, što kožnaja kraina pry ŭstupleńni ŭ ES pavinna vykonvać strohija patrabavańni, u tym liku ŭ pytańniach histaryčnaj pamiaci. Pavodle jaho słoŭ, nielha budavać supracoŭnictva ŭ miežach Jeŭrasajuza na pavazie da asobaŭ abo ruchaŭ, jakija vyklikajuć bol, nieprymańnie i raspaŭsiudžvajuć niapraŭdu pra susiednija krainy.
U kancy maja prezident Ukrainy Uładzimir Zialenski padpisaŭ ukaz ab prysvajeńni adnamu z padraździaleńniaŭ najmieńnia «imia Hierojaŭ UPA».
Paśla hetaha prezident Polščy Karal Naŭrocki pazbaviŭ Zialenskaha Ordena Biełaha Arła, paśla čaho pamiž ukrainskim i polskim bakami pačalisia ŭzajemnyja admovy ad dziaržaŭnych uznaharod.
Na hetym fonie lidar polskaj partyi «Prava i spraviadlivaść» Jarasłaŭ Kačyński zaklikaŭ Varšavu zabłakavać novyja raŭndy pieramoŭ ab ustupleńni Ukrainy ŭ Jeŭrapiejski sajuz.
Taksama dniami byli apublikavanyja vyniki apytańnia, pavodle jakich bolšaść hramadzian Polščy vystupajuć suprać ustupleńnia Ukrainy ŭ Jeŭrasajuz.
Kamientary
Zhodna ź im padzialili Biełaruś i Ukrainu .
palaki i rasiejcy kampensacyju zapłaciać akupavanym krainam ?
[Zredahavana]