Kandydat u deputaty, lidar BNF Alaksiej Janukievič u svaim vystupie na telekanale «Biełaruś-3» zaklikaŭ nakiravać ekanomiku i źniešniuju palityku krainy ad Rasii da krain Zachadu.
Janukievič pačaŭ z tezisa pra toje, što za 25 hadoŭ «ekanomika krainy całkam vyčarpana».
— I heta nie tolki śćvierdžańnie apazicyjnych albo niezaležnych analitykaŭ. Pra heta adkryta napisaŭ cełuju knihu były daradca prezidenta pa ekanamičnych pytańniach Kirył Rudy. To bok vycisnuć niešta novaje z hetaj administracyjna kamandnaj sistemy bolš užo niemahčyma.
Pamyłkaj nazvaŭ lidar BNF staŭku na rasijski rynak. Pavodle jaho słoŭ, ekanomika Rasiei pad sankcyjami bolš nie maje resursaŭ, kab davać Biełarusi tannyja naftu i haz i kuplać biełaruskuju pradukcyju.
— Biełarusy robiać dobra i jakasna, adnak nie tanna. I siońnia u rasiejskaha rynka niama hrošaŭ, kab nabyvać našuju pradukcyju.
Janukievič zaklikaŭ kardynalna źmianiać nie tolki ekanamičnuju, ale i źniešniuju palityku. Partyja BNF idzie na vybary z płatformaj «Dla biełarusaŭ», raspavioŭ palityk. Heta značyć, što ŭsio, što robicca ŭ krainie, pavinna rabicca dla našaha naroda, rastłumačyŭ jon.
Janukievič nazvaŭ try asnoŭnyja kroki, nieabchodnyja dla vypraŭleńnia situacyi. Pa-pieršaje, patrebny sistemnyja ekanamičnyja i administracyjnyja reformy — «dać bolš svabody ludziam, biznesu, rehijonam, sudam». Pa-druhoje — adkryvacca śvietu.
— Nam treba pryciahnuć tyja sacyjalnyja i ekanamičnyja standarty, technałohii, jakija jość u krainach Jeŭropy i Złučanych Štatach Amieryki. Dziela hetaha treba adkryć našu miažu na Zachad i ŭvieści kantrol na miažy z Rasiejaj, praź jakuju vielmi lohka traplajuć u Biełaruś nielehalnyja mihranty, złačynnaść i narkotyki.
Pa-treciaje, krainie patrebna nacyjanalnaja kansalidacyja, ličyć Janukievič.
— Kali vy žyviacie siońnia ŭ Biełarusi, kali vy lubicie hetuju krainu, my ŭsie pavinny być razam. My, biełarusy, ščaślivaja nacyja. My majem svaju dziaržavu, my majem pracavitych ludziej, my majem cudoŭnuju ziamlu. I na siońniašni momant u biełarusaŭ jość siła, na jakuju jany mohuć raźličvać, jakaja abaronić ich nacyjanalnyja intaresy. Hetaja siła — partyja BNF.
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ3
Kamientary