«Biellehpram» za prychod pryvatnikaŭ u halinu

Ale z umovami, adna ź jakich — «płacić zarobki ŭ pamiery, jaki vyznačaje prezydent». Pry hetym staršynia kancernu Eduard Naryškin vykazaŭsia za stvareńnie mechanizmaŭ finansavaj matyvacyi kiraŭnikoŭ pradpryjemstvaŭ «Biellehpramu».

Pradpryjemstvy kancernu «Biellehpram» demanstrujuć nievysokija, adnak pazytyŭnyja pakazčyki rostu, paviedamiŭ na pres‑kanferencyi staršynia kancernu Eduard Naryškin. Pa jaho słovach, u toj čas, jak eŭrapiejskija vytvorcy apošnija čatyry hady zaznajuć padzieńnie vytvorčaści na 10‑15% u hod, biełaruskija pradpryjemstvy demanstrujuć rost na 3‑5%. Pa vynikach minułaha hodu prybytak pradpryjemstvaŭ kancernu skłaŭ Br2,7 trłn (105% ad uzroŭniu 2006 hodu pry zaplanavanych 109%). Usiaho było vyrablena tavaraŭ na sumu Br 2 trłn. Rentabelnaść pa vynikach hodu dasiahnuła 9,6% ( rost skłaŭ 1,2%). Kolkaść stratnych pradpryjemstvaŭ skaraciłasia z 40 da 22. Staršynia kancernu zajaviŭ, što pavodle papiarednich raźlikaŭ rentabelnaść vytvorčaści budzie raści. Jon nazvaŭ i pryčyny takoha aptymizmu: «Ja hłyboka pierakanany, što Alaksandar Łukašenka, urad i kraina dali nam unikalnuju mahčymaść za bližejšyja 2‑3 hady reanimavać halinu». Adkazvajučy na pytańnie, ci zastajecca aktualnaj pahroza z boku imparcioraŭ zamiežnych tavaraŭ, sp. Naryškin adznačyŭ, što kankurencyja — heta tolki plus dla vytvorcaŭ, i dziakujučy biesprecedentnaj padtrymcy z boku ŭładaŭ, kancernu zastajecca prosta dobra pracavać.

Siarod asnoŭnych zadačaŭ, što stajać pierad kancernam, jaho kiraŭnik adznačyŭ navučańnie sučasnym metadam pracy top‑menedžeraŭ, stvareńnie mechanizmaŭ finansavaj matyvacyi kiraŭnikoŭ i specyjalistaŭ pradpryjemstvaŭ, padtrymku ajčynnych dyzajneraŭ.

Prahučała j pytańnie ekspartu ŭ krainy Eŭropy. Pavodle E. Naryškina, sankcyi EZ pryviali da skaračeńnia ekspartu pradukcyi ŭ krainy Eŭropy. «Skłalisia takija ŭmovy, što nam zručniej pracavać u rehijonach, dzie palityka‑ekanamičny klimat dla nas bolš spryjalny, ale heta nie aznačaje, što nia treba prasoŭvacca i na eŭrapiejskim nakirunku» — adznačyŭ kiraŭnik «Biellehpramu». Pry hetym, pa jaho infarmacyi, rost ekspartu ŭ Rasieju skłaŭ 118%.

Na siońnia nazirajecca pieranos vytvorčaści eŭrapiejskaj pradukcyi lohkaj pramysłovaści ŭ krainy Azii, najpierš u Kitaj. Hatovy pradukt, vyrableny ŭ hetaj krainie kaštuje hetulki ž, u kolki dla biełaruskaha pradpryjemstva abychodziacca nieabchodnyja dla vytvorčaści materyjały. U takich umovach, usio bolš biełaruskich vytvorcaŭ raźmiaščajuć u Kitai zamovy na vypusk svaich brendaŭ.

Čynoŭnik raspavioŭ taksama pra perspektyvy vypusku ajčynnych džynsaŭ. Pavodle jaho słovaŭ, na bazie Baranavickaha vytvorčaha bavaŭnianaha abjadnańnia adna z tureckich kampanijaŭ, pry pasrednictvie belhijskich partneraŭ naładzić vypusk džynsaŭ. Pikantnaść sytuacyi ŭ tym, što turecki investar pieršapačatkova vykazvaŭ cikavaść da budaŭničaj sfery, ale jamu prapanavali dla pačatku ŭkłaści hrošy ŭ baranavickaje pradpryjemstva.

Admiena instytutu «załatoj akcyi» vitajecca kiraŭnictvam kancernu, zapeŭniŭ sp. Naryškin. My tolki vitajem prychod pryvatnikaŭ u halinu i nie źbirajemsia trymacca za svaje pradpryjemstvy, padkreśliŭ čynoŭnik. Na jaho dumku, mienavita pryvatnik zdolny najbolš efektyŭna pracavać na hetym rynku. Adnak, dziaržava maje prava dyktavać svaje ŭmovy: efektyŭnaja praca, zachavańnie i stvareńnie pracoŭnych miescaŭ, vypłata padatkaŭ, a taksama naličeńnie zarobkaŭ u pamiery, jaki «vyznačaje prezydent». Pra hetym Eduard Naryškin paraiŭ nie čakać napłyvu prapanovaŭ z boku investaraŭ, zvažajučy na vysokija zatraty vytvorčaści. Taksama jon nazvaŭ pieraacenienymi asnoŭnyja fondy pradpryjemstvaŭ: «Tolki fondavy rynak zmoža ŭrehulavać hetuju sytuacyju».

U Biełarusi zastajecca mahčymym raźmiaščeńnie vytvorčaściaŭ eŭrapiejskich kampanijaŭ, što zajmajucca vyrabam pradukcyi tak zvanaj chutkaj mody (fast fashion)

Kažučy pra specyfiku dačynieńniaŭ z ustanovami Minhandlu, staršynia kancernu pryznaŭ najaŭnaść peŭnych składanaściaŭ. Pavodle jaho, kancern rehularna znajomić usie zacikaŭlenyja koły z asartymentam pradukcyi, ale paśla sutykajecca z adsutnaściu zamovaŭ. Čynoŭnik miarkuje, što źjaŭleńnie na biełaruskim rynku sietki hipermarkietaŭ, ź ichniaj handlovaj palitykaj, patrabuje ad pradpryjemstvaŭ lohkaj pramysłovaści i handlovych arhanizacyjaj abjadnańnia namahańniaŭ.

• 0
• 0
• 0
• 0
• 0
• 0
• 0
• 0