Były pałkoŭnik HRU Papoŭ stvaryŭ firmu ŭ Polščy i ciorsia kala apazicyi. Ale padazreńni vyklikaje nie tolki jon

U raśledavańni partała Disinfo Digest (prajekta Fondu INFO OPS Polska, jaki śpiecyjalizujecca na daśledavańni ŭpłyvu zamiežnaj prapahandy i dezynfarmacyi na polskuju infarmacyjnuju prastoru) raskazvajecca pra polskija kampanii, jakija mohuć być častkaj zakanśpiravanaj sistemy biełaruskich i rasijskich śpiecsłužb.

Papoŭ — architektar infrastruktury prykryćcia

Centralnaj fihuraj u rasśledavańni vystupaje Uładzimir Papoŭ. U minułym jon padpałkoŭnik Hałoŭnaha raźviedupraŭleńnia Biełarusi, adznačany ŭznaharodami za biezdakornuju słužbu, i supracoŭnik asabliva davieranaj Słužby achovy prezidenta. Jaho karjera była źviazana z apieracyjami najvyšejšaha dziaržaŭnaha ŭzroŭniu: ad achovy vizitaŭ Uładzimira Pucina da ŭdziełu ŭ evakuacyi zrynutaha prezidenta Kyrhyzstana.

Paśla 2020 hoda, pavodle rasśledavańnia, Papoŭ sprabavaŭ infiltravacca ŭ asiarodździe biełaruskaj apazicyi, jakaja apynułasia na vyhnańni ŭ Polščy. Ź im ščylna kantaktavaŭ i paźniej tajamniča źnikły Anatol Kotaŭ. 

Z pašpartnaj bazy, zdabytaj «Kibierpartyzanami», vynikaje, što Papoŭ mieŭ pašparty prykryćcia na roznyja imiony, u ich jon atrymlivaŭ vizy i vyjazdžaŭ, u tym liku ŭ Jeŭrasajuz.

Papoŭ i Kotaŭ u svoj čas razam zasnavali TAA «Spadčyna2019» («Naśledije2019»).

Pavialičyć

Aŭtary źviartajuć uvahu, što ŭ 2022 hodzie Papoŭ prysutničaŭ na Forumie demakratyčnych sił u Varšavie— mutnaj inicyjatyvie Valeryja Capkały, Dźmitryja Bałkunca i Volhi Karač, skiravanaj suprać Śviatłany Cichanoŭskaj i Paŭła Łatuški. Na dumku polskaha vydańnia, dla byłoha aficera heta mahło być nie palityčnaje mierapryjemstva, a mahčymaść sabrać infarmacyju pra pradstaŭnikoŭ biełaruskaj apazicyi, ich kantakty i ŭzajemaadnosiny.

Aŭtary rasśledavańnia ŭ suviazi z forumam asabliva źviartajuć uvahu na postać Dźmitryja Bałkunca.

Pavialičyć

Jašče adnym epizodam rasśledavańnia stała kampanija NOAB, zarehistravanaja Papovym u Varšavie ŭ listapadzie 2023 hoda.

Jon zarehistravaŭ jaje pad ułasnym imieniem, nie na pašpart prykryćcia — na paru z małodšym synam jak tavarystva z abmiežavanaj adkaznaściu.

Firma była stvorana z kapitałam 5000 złotych (kala 1150 jeŭra), pracavała praź virtualny ofis i pry hetym užo ŭ pieršy hod pakazała dachodu kala paŭmiljona złotych (kala 150 tysiač dalaraŭ) biez prykmiet realnaj haspadarčaj dziejnaści. Heta charakterna dla struktur, pryznačanych dla lehalizacyi srodkaŭ na patreby ahientury.

Technałahičnuju padtrymku stvoranaj Papovym struktury, pa mierkavańni aŭtaraŭ, zabiaśpiečvaŭ jaho syn Maksim, jaki žyvie ŭ Varšavie. Raniej jon pracavaŭ u kampanii Synesis, viadomaj raspracoŭkaj sistemy KIPOD — płatformy dla masavaha nazirańnia, bijamietryi i aŭtamatyčnaha raspaznavańnia tvaraŭ.

Pavialičyć

Nieprykmietnaja kampanija GameMod

U rasśledavańni raskazvajecca taksama pra kampaniju GameMod, zarehistravanuju ŭ Polščy i źviazanuju z adnajmiennaj biełaruskaj firmaj — rezidentam Parka vysokich technałohij u Minsku. Aficyjna kampanija zajmajecca raspracoŭkaj kampjutarnych i kansolnych hulniaŭ na zakaz.

Žurnalisty źviartajuć uvahu, što siarod asob, źviazanych z polskaj kampanijaj, zhadvajecca Dźmitryj Pabiaržyn, były pres-sakratar KDB Biełarusi.

Da taho, jak źjavicca ŭ Polščy pad svajoj ciapierašniaj nazvaj, kampanija pracavała ŭ Minsku jak YURANEX-security, adnym ź jaje kiraŭnikoŭ byŭ Alaksandr Ramanoŭski, jakoha žurnalisty nazyvajuć čałaviekam, źviazanym ź biełaruskim KDB.

Źmiena profilu — ad kampanii ŭ śfiery biaśpieki da raspracoŭščyka kampjutarnych hulniaŭ — supała, pavodle ich viersii, sa źjaŭleńniem u prajekcie ludziej, bijahrafii jakich źviazanyja ź biełaruskimi siłavymi strukturami.

Pavialičyć

Pry hetym aŭtary pryznajuć, što paśla 2020 hoda mnohija biełaruskija IT-kampanii sapraŭdy pieranosili častku biznesu ŭ krainy Jeŭrasajuza, kab zachavać dostup da zachodnich klijentaŭ i finansavych servisaŭ. Takaja praktyka sama pa sabie nie vyklikaje padazreńniaŭ.

Adnak padobnaja schiema moža vykarystoŭvacca i jak prykryćcio, kali siarod bienieficyjaraŭ akazvajucca byłyja supracoŭniki śpiecsłužbaŭ abo ludzi, źviazanyja ź imi.

Aŭtary vykazvajuć mierkavańnie, što hulniavaja industryja moža być zručnym asiarodździem dla padobnych apieracyj. Jana dazvalaje lehalna najmać techničnych śpiecyjalistaŭ, arhanizoŭvać mižnarodnyja kamandy, padtrymlivać šyrokija prafiesijnyja kantakty i pieramiaščać supracoŭnikaŭ pamiž krainami, nie vyklikajučy padazreńniaŭ. Na ich dumku, mienavita takija lehalnyja struktury mohuć vykarystoŭvacca jak prykryćcio dla dziejnaści, jakaja vychodzić daloka za miežy raspracoŭki kampjutarnych hulniaŭ.

Čytajcie taksama: Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia

• 10
• 0
• 4
• 12
• 1
• 0
• 7
• 0