Mižnarodny forum ananimnych ałkaholikaŭ upieršyniu projdzie ŭ Homieli

Upieršyniu ŭ Homieli projdzie mižnarodny forum ananimnych ałkaholikaŭ. Mierapryjemstva, pryśviečanaje šaścihodździu ŭtvareńnia ruchu ŭ Homieli, płanujecca pravieści 3—4 vieraśnia. Jaho ŭdzielnikami buduć ludzi z roznych haradoŭ Biełarusi, Rasii, Ukrainy, krain Bałtyi i inšych dziaržaŭ. Takija sustrečy dazvalajuć atrymać novyja viedy i vopyt, vyrašyć šmatlikija prablemy, adčuć adzinstva členaŭ ruchu, paviedamili arhanizatary.

U Homieli piarvičnaja arhanizacyja respublikanskaha hramadskaha abjadnańnia «Centralnaja słužba ananimnych ałkaholikaŭ» była zarehistravanaja ŭ śniežni 2010 hoda. U horadzie prachodziać schody dźviuch hrup ananimnych ałkaholikaŭ, a taksama hrupy Ał-Anon (dla členaŭ siemjaŭ ałkaholikaŭ). Na hety momant u Biełarusi ŭ haradach, pasiołkach i vioskach dziejničajuć 80 hrup AA, jakija naviedvajuć bolš za dźvie tysiačy čałaviek. U śviecie kala čatyroch miljonaŭ čałaviek vyzdaraŭlivajuć dziakujučy prahramie AA, adznačajuć arhanizatary forumu.

Ananimnyja ałkaholiki — heta sadružnaść, što abjadnoŭvaje mužčyn i žančyn, jakija dzielacca svaim vopytam, siłami i nadziejami z metaj dapamahčy sabie i inšym pazbavicca ad ałkahalizmu, kažuć členy ruchu. Adzinaja ŭmova dla členstva ŭ AA — heta žadańnie kinuć pić. Členy AA nie płaciać ni ŭstupnych, ni členskich uznosaŭ. Hrupy sami siabie ŭtrymlivajuć na ŭłasnyja dobraachvotnyja achviaravańni. AA nie źviazana ni ź jakoj-niebudź siektaj, vieravyznańniem, palityčnym kirunkam, arhanizacyjaj abo ustanovaj, nie ŭstupaje ŭ palemiku pa jakich by tam ni było pytańniach, nie padtrymlivaje i nie vystupaje suprać čyich by tam ni było intaresaŭ. Hałoŭnaja meta AA — zastavacca ćviarozymi i dapamahčy inšym ałkaholikam zdabyć ćviarozaść.

«Na žal, šyrokaja hramadskaść u Biełarusi pakul praktyčna nie znajomaja z prahramaj AA. Dastatkova časta źjaŭlajucca pamyłkovyja publikacyi ab AA abo uźnikajuć iłžyvyja tłumačeńni pryncypaŭ sadružnaści, tamu forumy i inšyja padobnyja da ich sustrečy pravodziacca nie tolki dla samich ałkaholikaŭ, ale i dla infarmavańnia hramadskaści, — kaža homielski ananimny ałkaholik Ihar. — AA zacikaŭleny ŭ dalejšym raspaŭsiudžvańni svaich idej. Uličvajučy, što ałkahalizm źjaŭlajecca hłabalnaj prablemaj, heta mahło b unieści značny ŭkład u vyzdaraŭleńnie hramadstva. Dziakujučy prahramie AA ŭžo siońnia sotni hramadzian Biełarusi, mnohija ź jakich ličylisia raniej bieznadziejna chvorymi, majuć mahčymaść žyć ćviarozym paŭnavartasnym žyćciom».

• 0
• 0
• 0
• 0
• 0
• 0
• 0
• 0