Uvieś skład staličnaj milicyi jašče da pačatku śviatkavańnia Dnia Minska i prymierkavanaha da jaho Minskaha paŭmarafonu, jakija projduć 3 i 4 vieraśnia, budzie pieraviedzieny na ŭzmocnieny varyjant niasieńnia słužby z kruhłasutačnaj achovaj.
Pra heta zajaviŭ 30 žniŭnia na pres-kanfierencyi ŭ Minsku namieśnik načalnika ŭpraŭleńnia achovy pravaparadku i prafiłaktyki HUUS Minharvykankama Andrej Bakač.
«U miescach praviadzieńnia śviatočnych mierapryjemstvaŭ budzie pracavać ŭzmocnienaja achova», — paviedamiŭ pradstaŭnik milicyi.
Pavodle jaho słoŭ, miescy masavych mierapryjemstvaŭ buduć aharodžanyja, prachod da ich budzie ažyćciaŭlacca praz kantrolna-prapusknyja punkty. Bakač paabiacaŭ, što takich KPP budzie dastatkova dla bieśpieraškodnaha propusku haradžan da miescaŭ masavych mierapryjemstvaŭ.
Jon nahadaŭ, što na masavyja mierapryjemstvy nie buduć prapuskać ludziej u stanie ałkaholnaha i narkatyčnaha apjanieńnia. Udzielnikaŭ śviataŭ buduć praviarać na najaŭnaść chałodnaj i ahniastrelnaj zbroi, vybuchovych rečyvaŭ, mulažoŭ abo imitataraŭ zbroi, bojeprypasaŭ. Zabaroniena taksama prachodzić z «pradmietami, zdolnymi nanieści cialesnyja paškodžańni», ź viełasipiedami i svojskimi žyviołami.
«Hramadzianie pavinny minimizavać kolkaść ručnoj pakłažy, u tym liku vialikich pamieraŭ. Kala Pałaca sportu buduć raźmieščany kamiery zachoŭvańnia, kudy budzie mahčymaść zdać vialikuju ručnuju pakłažu, zaplečniki i sumki», — skazaŭ Bakač.
Jon taksama adznačyŭ, što dla paźbiahańnia čerhaŭ kala KPP lepš pryjści zahadzia — za 20—30 chvilin da pačatku mierapryjemstvaŭ.
Jak paviedamili pradstaŭniki MNS i miedycynskaj słužby, na śviacie buduć dziažuryć padraździaleńni MNS i bryhady chutkaj miedycynskaj dapamohi. Na Minskim paŭmarafonie taksama buduć dziažuryć vałanciory ź liku studentaŭ apošniaha kursu mieduniviersiteta.
Nahadajem, asnoŭnyja padziei śviatkavańnia 949-hodździa Minska projduć 3 vieraśnia i buduć skancentravany na placoŭcy kala Pałaca sportu i ŭ Vierchnim horadzie. Zavieršycca dzień muzyčna-piratechničnym fiejervierk-šou (pačatak a 22 hadzinie).
Ciapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii13
Kamientary