Try minčanki adpraŭlajucca ŭ kruhaśvietnaje padarožža, kab raskazać śvietu pra Biełaruś

Ź Minska 14 kastryčnika startuje pieršaje kruhaśvietnaje padarožža vyklučna žanočaj kamandy pad łozunham «Sustreniemsia ŭ Biełarusi!», paviedamili na pres-kanfierencyi ŭ Minsku arhanizatary prajekta. Padarožnica Kaciaryna Biahun i dźvie jaje dački Alisa i Elizabiet udzielničajuć u narodnym prajekcie Begoonok, jaki maje na mecie raskazać śvietu pra Biełaruś i zaprasić jaje naviedać.

Pavialičyć

Pavodle słoŭ Kaciaryny Biahun, udzielničajučy ŭ hetym prajekcie, jaje siam`ia vyrašyła vykanać svaju daŭniuju maru — pabyvać u kruhaśvietnym padarožžy, a zaadno stać pieršaj u śviecie žanočaj kamandaj, jakaja jaho ździejśnić pa ŭsich mižnarodnych praviłach. Było vyrašana, što stavić zadaču naviedać jak maha bolš krain niama sensu: nie chopić pašparta na vizy i štampy. Tamu, skazała Biahun, treba ździejśnić pravilnuju kruhaśvietku: naviedać usie piać kantynientaŭ, prajści pa ziamli ci vadzie 40 tys. kiłamietraŭ, vykarystoŭvajučy samalot tolki dla pieramiaščeńnia z adnaho kantynienta na druhi, pierasiekčy ŭsie mierydyjany, dvojčy pierasiekčy ekvatar, pabyvać u dvuch procilehłych punktach płaniety. Akramia taho, vandroŭnicy chočuć paznajomicca z kožnaj krainaj znachodžańnia, a nie prosta adznačycca tam.

Ź Minska kamanda adpravicca praz usiu Rasiju ŭ Manholiju, dalej u Kitaj. Kitajskuju vizu žančyny zrabili zahadzia, a astatnija źbirajucca atrymlivać pa chodzie ruchu, tym samym dakazvajučy, što «ź biełaruskim pašpartam u śviecie niama miežaŭ».

Dalejšy maršrut: Tybiet, Niepał, Indyja, V`ietnam, Łaos i Kambodža, dzie jany sustrenuć Novy hod. U 2017 hodzie kruhaśvietka praciahniecca: Tajłand, Małajzija, Indaniezija, Aŭstralija, Paŭdniovaja Amieryka, ZŠA, Ispanija. Biahun adznačyła, što ŭ pracesie płany mohuć pamianiacca, adnak viarnucca ŭ Minsk kamanda źbirajecca ŭ červieni.

Adzin z partnioraŭ padarožža, dyrektar rekłamnaha ahienctva NEF TBWA Aleh Ramanaŭ paviedamiŭ, što na ŭsim praciahu vandroŭki žančynam abiacali akazvać padtrymku praz konsulstvy ŭ roznych krainach MZS Biełarusi i departamient pa hramadzianstvie i mihracyi MUS.

«U darozie vandroŭnicy buduć sustrakacca ź biełaruskimi dyjasparami, žurnalistami, pradstaŭnictvami biełaruskich kampanij, buduć pakazvać roliki pra Biełaruś, razdavać suvieniry i zaprašać u hości, — skazaŭ jon. — My chočam vyklikać mižnarodny rezanans, kab heta padarožža pryniesła bonusy Biełarusi, kab jak maha bolš ludziej daviedałasia pra jaje i naviedała. Ciapier, jak nikoli, my pavinny zajavić pra siabie, pra toje, što my — jeŭrapiejskaja sučasnaja kraina ź cikavymi, vydatnymi ludźmi — ścirajem miežy i pavinny chutčej intehravacca ŭ suśvietnuju supolnaść, kab siudy pryjazdžali ludzi, prychodzili inviestycyi, biełaruskija tavary stanavilisia ŭ śviecie peŭnym brendam».

Ramanaŭ adznačyŭ, što padarožža — pryvatnaja inicyjatyva, adnak luby achvočy moža finansava padtrymać kamandu. Dla hetaha z 15 kastryčnika kraŭndfandynhavaja płatforma talaka.by ab`iaŭlaje zbor srodkaŭ. U prodaž pastupiać suvieniry ź simvolikaj prajekta. Atrymanyja srodki ad ich realizacyi pojduć na padtrymku padarožnikaŭ i aśviatleńnie prajekta ŭ mižnarodnych vydańniach.

Padčas padarožža ŭdzielnicy buduć vieści dziońniki, zdymać roliki. Videaspravazdačy, fotamateryjały buduć vykładvacca na sajcie prajekta «Biełaruś bieź miežaŭ» (belarusbezgranic.by) i ŭ sacyjalnych sietkach.

• 0
• 0
• 0
• 0
• 0
• 0
• 0
• 0