Alaksandr Łukašenka i Redžep Taip Erdahan kanstatujuć pazityŭnuju dynamiku raźvićcia ŭsiebakovaha supracoŭnictva pamiž Biełaruśsiu i Turcyjaj. Pra heta havorycca ŭ sumiesnym kamiunikie, padpisanym prezidentami 11 listapada pa vynikach pieramoŭ u Minsku.
«Prezidenty kanstatavali pazityŭnuju dynamiku raźvićcia ŭsiebakovaha supracoŭnictva pamiž Biełaruśsiu i Turcyjaj i prajavili ŭzajemnuju zacikaŭlenaść u dalejšym padtrymańni rehularnaha dvuchbakovaha palityčnaha dyjałohu na ŭsich uzroŭniach, uklučajučy samy vysoki», — havorycca ŭ dakumiencie.
U kamiunikie padkreślivajecca, što baki adznačyli novyja mahčymaści raźvićcia handlova-ekanamičnych adnosin u suviazi z členstvam Biełarusi ŭ Jeŭrazijskim ekanamičnym sajuzie, a taksama najaŭnaściu ŭ Turcyi mytnaha sajuza ź Jeŭrapiejskim sajuzam.
Łukašenka rašučym čynam asudziŭ sprobu vajennaha pieravarotu ŭ Turcyi i vykazaŭ słovy padtrymki abranamu demakratyčnym šlacham uradu. U svaju čarhu Erdahan vykazaŭ zadavalnieńnie ŭ suviazi «z prychilnaściu Biełarusi demakratyčnym pryncypam».
Łukašenka i Erdahan padkreślili prychilnaść vykanańniu ahulnapryznanych normaŭ mižnarodnaha prava, metaŭ i pryncypaŭ AAN, umacavańnie centralnaj roli hetaj arhanizacyi ŭ zabieśpiačeńni padtrymańnia miru i biaśpieki, procidziejańni sučasnym vyklikam i pahrozam, mirnaha ŭrehulavańnia mižnarodnych kanfliktaŭ.
«Tolki bieśpieraškodny, raŭnapraŭny i kanstruktyŭny dyjałoh moža spryjać urehulavańniu mižnarodnych roznahałośsiaŭ», — skazana ŭ kamiunikie.
Kiraŭniki Biełarusi i Turcyi «asudzili lubyja vidy teraryzmu, padkreślili važnaść mižnarodnaha ŭzajemadziejańnia ŭ baraćbie ź mižnarodnym teraryzmam, transnacyjanalnaj arhanizavanaj złačynnaściu, nielehalnaj mihracyjaj».
Łukašenka i Erdahan ličać nieabchodnym pašyrać i pahłyblać dvuchbakovyja suviazi ŭ kaardynacyi i raźvićci supracoŭnictva ŭ źniešniaj palitycy, uklučajučy ŭzajemnuju padtrymku kandydatur u ramkach mižnarodnych arhanizacyj.
Jany vykazali zacikaŭlenaść u pavieličeńni abjomaŭ i dyviersifikacyi struktury ŭzajemnaha tavaraabarotu, sumiesnym pošuku novych śfier ekanamičnaha ŭzajemadziejańnia, va ŭmacavańni vytvorčaj kaapieracyi, prasoŭvańni sumiesna vyrablenaj pradukcyi na rynki trecich krain.
Heta pieršy vizit u Biełaruś Erdahana, abranaha prezidentam Turcyi ŭ žniŭni 2014 hoda. U krasaviku hetaha hoda Erdahan i Łukašenka sustrakalisia ŭ Stambule ŭ ramkach samitu Arhanizacyi isłamskaha supracoŭnictva, jaki biełaruski aficyjny lidar naviedaŭ pa zaprašeńni tureckaha kiraŭnictva. Padčas pieramoŭ Łukašenka prapanavaŭ «aktualizavać paradak dnia biełaruska-tureckaha supracoŭnictva, ažyćciaviŭšy pierazahruzku pa šerahu kankretnych kirunkaŭ z akcentam na handli i ekanomicy», havaryłasia ŭ paviedamleńni pres-słužby prezidenta Biełarusi. Tady ž Erdahan paćvierdziŭ hatoŭnaść naviedać Minsk.
Vialikaja hutarka z Alinaj Koŭšyk — pra intervju z Padsasonnym, skandał z Kulejem i reformy na «Biełsacie»20
Kamientary