Mižnarodny valutny fond prapanuje karennym čynam pierahledzieć sistemu kiravańnia siektaram dziaržaŭnych pradpryjemstvaŭ Biełarusi. Pavodle infarmacyi BiełaPAN, adpaviednyja zachady fond prapanuje biełaruskim uładam zrabić užo ŭ 2017 hodzie.
Nahadajem, z 2 pa 15 listapada ŭ Biełarusi pracavała misija MVF, jakaja vyvučała pytańni dziejnaści siektara dziaržpradpryjemstvaŭ.
Pavodle infarmacyi BiełaPAN, prapanovy piersanału MVF zaklučajucca ŭ tym, kab pieradać usie dziaržpradpryjemstvy Biełarusi ad ministerstvaŭ i kancernaŭ pad kiravańnie adzinaha dziaržorhana — Dziaržaŭnaha kamiteta pa majomaści. Akramia hetaha, valutny fond rekamienduje raspracavać u 2017 hodzie i pryniać kompleksny zakon ab dziaržpradpryjemstvach, u jakim buduć prapisanyja adzinyja pryncypy kiravańnia dziaržsiektaram.
«Vykanańnie rekamiendacyj MVF patrabuje hłabalnych źmienaŭ. Kab raspracavać adziny dakumient pa kiravańni siektaram dziaržpradpryjemstvaŭ, nieabchodna pravieści reviziju ŭsiaho zakanadaŭstva — u nas haliny pa-roznamu rehulujucca. U terminy, jakija akreślivaje MVF, heta nierealna zrabić», — ličyć ekśpiert BiełaPAN u finansavych kołach, znajomy z prapanovami fondu.
Varta adznačyć, što pytańnie ab refarmavańni dziaržpradpryjemstvaŭ źjaŭlajecca siońnia klučavym sprečnym pytańniem u pieramovach biełaruskich uładaŭ z MVF ab zaklučeńni novaj kredytnaj prahramy.
Pavodle infarmacyi BiełaPAN, u kastryčniku piersanał MVF u Vašynhtonie paviedamiŭ biełaruskamu boku ab tym, što ŭ vypadku ŭrehulavańnia sprečnych momantaŭ pytańnie ab pačatku novaj kredytnaj prahramy ź Biełaruśsiu moža być razhledžanaje vykanaŭčym savietam dyrektaraŭ fondu ŭ śniežni 2016-ha abo studzieni 2017 hoda.
«Razhlad hetaha pytańnia zaležyć ad taho, kali buduć zavieršanyja pieramovy pa novaj prahramie», — rastłumačyŭ ekśpiert u finansavych kołach.
Miž tym biełaruskija ekanamisty ličać, što da kanca hetaha hoda novaja kredytnaja prahrama Biełarusi z MVF zaklučanaja nie budzie.
«Sihnałaŭ na karyść taho, što isnuje palityčnaja vola vykonvać rekamiendacyi MVF i refarmavać sistemu kiravańnia dziaržsiektaram, pakul nie źjaviłasia. Na isnaj sistemie kiravańnia dziaržsiektaram pabudavanaja ciapierašniaja ekanamičnaja madel, i mianiać jaje siońnia hatoŭnaści niama», — miarkuje navukovy supracoŭnik Biełaruskaha ekanamičnaha daśledča-adukacyjnaha centra (BEROC) Dźmitryj Kruk.
Pry hetym ekśpiert ličyć, što ŭ 2017 hodzie stupień zdolnaści damaŭlacca ŭ biełaruskaha boku moža ŭzraści. «Kali płaciažy pa dziarždoŭhu buduć pryvodzić da značnaha źmianšeńnia zołatavalutnych reziervaŭ, pazicyja Biełarusi ŭ pieramovach z valutnym fondam moža źmianicca, i hatoŭnaść pryniać umovy kredytora moža być vyšejšaj», — adznačyŭ Kruk.
Naziralniki čakajuć, što biełaruski bok budzie šukać ekanamičnuju dapamohu ŭ Rasii, jakaja ŭ adroźnieńnie ad MVF razhladaje pytańnie vydzialeńnia hrošaj Biełarusi nie tolki ŭ ekanamičnaj, ale i ŭ palityčnaj płoskaści.
«U Rasii nabližajecca prezidenckaja kampanija (vybary projduć u sakaviku 2018 hodu), i, zychodziačy z unutrypalityčnych i hieapalityčnych mierkavańniaŭ, rasijskija ŭłady akažuć ekanamičnuju padtrymku Biełarusi», — prahnazuje staršy analityk foreks-brokiera Forex Club Valeryj Pałchoŭski.
Kali takuju padtrymku biełaruski bok atrymaje, ličyć jon, hatoŭnaść aficyjnaha Minska prymać ŭmovy MVF budzie minimalnaj.
Jak paviedamlałasia raniej, 22 listapada zapłanavanyja pieramovy prezidentaŭ Biełarusi i Rasii. Padčas razmovy z rasijskimi žurnalistami na minułym tydni Alaksandr Łukašenka adznačyŭ, što na sustrečy z Uładzimiram Pucinym płanuje «cichieńka abmierkavać i damovicca» pa najvažniejšych pytańniach dvuchbakovych adnosin.
-
ŠI-hihant Anthropic padaŭ zajaŭku na IPO, apiaredziŭšy OpenAI
-
«Santa Bremar» choča adsudzić pravy na brend u viadomaha rasijskaha vytvorcy, jakoha pryznali ekstremisckim za padtrymku USU
-
Amierykanskamu ŭłaśniku parku «Suła», vychadcu ź Biełarusi, pradali budynki byłoha jaŭrejskaha hieta ŭ Navahrudku
Ciapier čytajuć
«Sojevyja ekstremisty pavinny adpracavać misku kłubnic». Skardziŭsia na ŭmovy pracy ŭ KDB, a ciapier uciuchvaje treninhi siłavikam — chto taki Anton Šabunievič1818
Kamientary