Міжнародны валютны фонд прапануе карэнным чынам перагледзець сістэму кіравання сектарам дзяржаўных прадпрыемстваў Беларусі. Паводле інфармацыі БелаПАН, адпаведныя захады фонд прапануе беларускім уладам зрабіць ужо ў 2017 годзе.
Нагадаем, з 2 па 15 лістапада ў Беларусі працавала місія МВФ, якая вывучала пытанні дзейнасці сектара дзяржпрадпрыемстваў.
Паводле інфармацыі БелаПАН, прапановы персаналу МВФ заключаюцца ў тым, каб перадаць усе дзяржпрадпрыемствы Беларусі ад міністэрстваў і канцэрнаў пад кіраванне адзінага дзяржоргана — Дзяржаўнага камітэта па маёмасці. Акрамя гэтага, валютны фонд рэкамендуе распрацаваць у 2017 годзе і прыняць комплексны закон аб дзяржпрадпрыемствах, у якім будуць прапісаныя адзіныя прынцыпы кіравання дзяржсектарам.
«Выкананне рэкамендацый МВФ патрабуе глабальных зменаў. Каб распрацаваць адзіны дакумент па кіраванні сектарам дзяржпрадпрыемстваў, неабходна правесці рэвізію ўсяго заканадаўства — у нас галіны па-рознаму рэгулююцца. У тэрміны, якія акрэслівае МВФ, гэта нерэальна зрабіць», — лічыць эксперт БелаПАН у фінансавых колах, знаёмы з прапановамі фонду.
Варта адзначыць, што пытанне аб рэфармаванні дзяржпрадпрыемстваў з'яўляецца сёння ключавым спрэчным пытаннем у перамовах беларускіх уладаў з МВФ аб заключэнні новай крэдытнай праграмы.
Паводле інфармацыі БелаПАН, у кастрычніку персанал МВФ у Вашынгтоне паведаміў беларускаму боку аб тым, што ў выпадку ўрэгулявання спрэчных момантаў пытанне аб пачатку новай крэдытнай праграмы з Беларуссю можа быць разгледжанае выканаўчым саветам дырэктараў фонду ў снежні 2016-га або студзені 2017 года.
«Разгляд гэтага пытання залежыць ад таго, калі будуць завершаныя перамовы па новай праграме», — растлумачыў эксперт у фінансавых колах.
Між тым беларускія эканамісты лічаць, што да канца гэтага года новая крэдытная праграма Беларусі з МВФ заключаная не будзе.
«Сігналаў на карысць таго, што існуе палітычная воля выконваць рэкамендацыі МВФ і рэфармаваць сістэму кіравання дзяржсектарам, пакуль не з'явілася. На існай сістэме кіравання дзяржсектарам пабудаваная цяперашняя эканамічная мадэль, і мяняць яе сёння гатоўнасці няма», — мяркуе навуковы супрацоўнік Беларускага эканамічнага даследча-адукацыйнага цэнтра (BEROC) Дзмітрый Крук.
Пры гэтым эксперт лічыць, што ў 2017 годзе ступень здольнасці дамаўляцца ў беларускага боку можа ўзрасці. «Калі плацяжы па дзярждоўгу будуць прыводзіць да значнага змяншэння золатавалютных рэзерваў, пазіцыя Беларусі ў перамовах з валютным фондам можа змяніцца, і гатоўнасць прыняць умовы крэдытора можа быць вышэйшай», — адзначыў Крук.
Назіральнікі чакаюць, што беларускі бок будзе шукаць эканамічную дапамогу ў Расіі, якая ў адрозненне ад МВФ разглядае пытанне выдзялення грошай Беларусі не толькі ў эканамічнай, але і ў палітычнай плоскасці.
«У Расіі набліжаецца прэзідэнцкая кампанія (выбары пройдуць у сакавіку 2018 году), і, зыходзячы з унутрыпалітычных і геапалітычных меркаванняў, расійскія ўлады акажуць эканамічную падтрымку Беларусі», — прагназуе старшы аналітык форэкс-брокера Forex Club Валерый Палхоўскі.
Калі такую падтрымку беларускі бок атрымае, лічыць ён, гатоўнасць афіцыйнага Мінска прымаць ўмовы МВФ будзе мінімальнай.
Як паведамлялася раней, 22 лістапада запланаваныя перамовы прэзідэнтаў Беларусі і Расіі. Падчас размовы з расійскімі журналістамі на мінулым тыдні Аляксандр Лукашэнка адзначыў, што на сустрэчы з Уладзімірам Пуціным плануе «ціхенька абмеркаваць і дамовіцца» па найважнейшых пытаннях двухбаковых адносін.
Каментары