Dyrektar Liceja BDU patłumačyŭ, čamu zrezali słynnuju viarbu ŭ dvoryku ŭstanovy
Viarba była ŭlubionym miescam adpačynku liceistaŭ.
«Pavažanaja licejskaja supolnaść, sa škadavańniem i prykraściu mušu rastłumačyć, što ž stałasia z našaj viarboj, — piša ŭ liście, apublikavanym u fejsbuku Liceja BDU jaho dyrektar Makar Šnip. — Na pačatku navučalnaha hodu padčas ahladu raślin na terytoryi Liceja ekołah paviedamiła nam, što viarba znachodzicca ŭ vielmi niebiaśpiečnym stanoviščy.
My nie zusim pavieryli hetamu, tamu źviarnulisia pa prafiesijnuju ekśpiertyzu ŭ Instytut ekśpierymientalnyj bataniki Akademii navuk. Praviedzienaja jaho supracoŭnikami ekśpiertyza paćvierdziła našy chvalavańni.
Zhodna z vynikami daśledavańnia, taŭščynia zdarovaj častki draŭniny ŭ asnovie stvała skłała ad 5 da 8 sm, u toj čas jak pavinna być u luboj kropcy pierymietra nie mienš 1/6 (20 sm) ad dyjamietra stvała. Draŭnina akazałasia paškodžanaja drevarujnujučym hrybam (Bjerkandera dymčataja), jaki vyklikaŭ šyrokaje stvałavoje hnillo.
Śpiecyjalisty Instytuta ekśpierymientalnaj bataniki najstojliva raili nie hulacca ź losam i dumać ab vydaleńni dreva. Kab kančatkova ŭpeŭnicca ŭ biezvychodnaści, my źviarnulisia da supracoŭnikaŭ Bataničnaha sada — ci mahčyma sprabavać vylečyć dreva? Na žal, ich adkaz byŭ admoŭny — takoje staroje dreva ź vialikimi paškodžańniami vyratavać nie ŭdasca.
U takich umovach, kali lubimaje i šanavanaje mnohimi vypuskami dreva stała ŭjaŭlać pahrozu dla siońniašniaha Liceja, vyjście i rašeńnie dla mianie było adno — vielmi ciažkaje i prykraje…
Usio žyvoje naradžajecca i pamiraje. I naradžajecca iznoŭ. Na miescy viarby budzie inšaje dreva. Kali i jakoje — budziem vyrašać ź liceistami i śpiecyjalistami-batanikami razam. I, mnie zdajecca, budučyja pakaleńni liceistaŭ pabudujuć svaju mifałohiju vakoł svajho dreva. Simvały Liceja nie źniknuć, pakul nie źniknie licejskaja salidarnaść i uzajemapadtrymka», — piša dyrektar Liceja Makar Šnip.
Kamientary