Z 16 pa 19 sakavika ŭ staličnym kinateatry «Dom kino» projdzie retraśpiektyva prajekta «Niezaležny pozirk», kinaalmanacha najlepšych karotkamietražnych filmaŭ niezaležnych biełaruskich režysioraŭ. U hetym hodzie ŭ ramkach prajekta, jaki prachodzić užo druhi raz, u hledačoŭ budzie mahčymaść ubačyć filmy-ŭdzielniki i łaŭreaty MMKF «Listapad» i inšych mižnarodnych fiestyvalaŭ: «Dušy miortvyja», «Sałamanka» i «Dvaccaćšasnaccać».
«Dušy miortvyja» — drama režysiora i dramaturha Viktara Krasoŭskaha, jakaja stała najlepšaj hulniavoj karcinaj Nacyjanalnaha konkursu «Listapad-2016». Film raspaviadaje pra adzin dzień z žyćcia rabotnikaŭ biełaruskaha pradpryjemstva, mnohija ź jakich — ludzi ź invalidnaściu. Pakul rabotniki rychtujucca da śviata, ich načalnik płanuje skaračeńnie, paśla jakoha mnohija zastanucca biez pracy. Ale sacyjalnaja prablematyka nie adzinaja kaštoŭnaść stužki: «Dušy miortvyja» źniatyja adnym kadram, biez mantažnych źlepak. Film zavajavaŭ ŭznaharody na niekalkich mižnarodnych kinafiestyvalach, a staršynia žury Nacyjanalnaha konkursu MMKF «Listapad» Natalla Drozd adznačyła: «Dušy miortvyja» — mocnaja darosłaja praca ź idejaj i kancepcyjaj. Časta sacyjalnaje kino skočvajecca ŭ «płakatnaść», ale hetaja praca na vielmi vysokim prafiesijnym uzroŭni». Hałoŭnyja roli ŭ filmie vykanali biełaruskija akciory teatra i kino Pavieł Charłančuk, Hienadź Famin, Maksim Brahiniec i inšyja.
Film «Sałamanka» biełarusaŭ Rusłana Fiadotava i Alaksandry Kułak — adzin z dakumientalnych «chitoŭ» minułaha hoda, premjera jakoha adbyłasia na fiestyvali IDFA ŭ Amsterdamie — takich sabie «Kanach» dakumientalistyki. Zatym film praciahnuŭ svajo šeście pa najbujniejšych mižnarodnych forumach, a na «Listapadzie» atrymaŭ try pryzy, u tym liku za najlepšy dakumientalny film Nacyjanalnaha konkursu. Karcinu, jakaja raspaviadaje ab zakrytaj relihijnaj supołcy, krytyki paraŭnoŭvajuć z «Biełaj stužkaj» Michaela Chaniekie i «Maŭklivym śviatłom» Rejhadasa Karłasa. Znakamity dakumientalist Vital Manski nazvaŭ jaje «adnym z samych vizualna i estetyčna cikavych filmaŭ za apošnija hady».
Postapakaliptyčnaja prytča «Dvaccaćšasnaccać» Andreja Kryvieckaha i Dźmitryja Račkoŭskaha apaviadaje pra žyćcio apošniaha čałavieka na Ziamli paśla hibieli cyvilizacyi. Cikava, što režysiory filma — teatralnyja akciory, a scenar filma napisaŭ papularny biełaruski akcior, režysior i dramaturh Dźmitryj Bahasłaŭski. Dla ŭsich aŭtaraŭ heta debiut u kino, jaki adrazu akazaŭsia paśpiachovym: film uziaŭ udzieł nie tolki ŭ «Listapadzie», ale i ŭ mižnarodnych kinafiestyvalach Azii, Amieryki i Jeŭropy.
«U biełaruskim kino zaraz źjaŭlajucca vydatnyja raboty, źniatyja niezaležna, biez padtrymki dziaržavy i bujnych kampanij. Filmy aktyŭna ŭdzielničajuć u fiestyvalach u Biełarusi i za miažoj, ale chaciełasia b, kab i ŭ masavaj aŭdytoryi była mahčymaść ź imi paznajomicca. My ŭpeŭnienyja, što hledačoŭ, jakija pryjduć na pakaz, čakajuć kiniematahrafičnyja adkryćci», — kaža kuratar prajekta Mikałaj Łaŭraniuk.
Na prezientacyi prajekta 16 sakavika filmy prezientujuć sami aŭtary i ŭ publiki budzie mahčymaść abmierkavać ź imi ŭbačanyja tvory.
U najbližejšy čas prajekt «Niezaležny pozirk» stanie rehularnym i pieraniasiecca ŭ kinateatr «Biełaruś». Z 30 sakavika pa 2 krasavika tam projduć pakazy filma «Kachańnie i partniorstva» Mikity Łaŭreckaha — lidara biełaruskaha niezaležnaha «mambłkora».
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza19
Kamientary