Jak Centrvybarkam naličyŭ 115 tysiač čałaviek na vulicach Homiela — dziŭnyja ličby vybaraŭ
Štučnyja vysokija ličby jaŭki — heta adzin z hałoŭnych sposabaŭ manipulacyj na biełaruskich vybarach.
Niesapraŭdnyja aficyjnyja pakaźniki jaŭki jašče bolej vidavočnyja, kali ich vyvučać nie pa abłaściach, a pa asobnych vybarčych akruhach. Asabliva pa akruhach haradoŭ. Kali ŭ adnym haradskim rajonie ŭpiaciora bolej «žaŭrukoŭ», a ŭ susiednim rajonie taho samaha horada vybarcy masava imknucca na ŭčastki pierad samym ich zakryćciom, dyk, značyć, ličby niasłušnyja.
Hety materyjał hruntujecca na aficyjnych dadzienych CVK pa jaŭcy na parłamienckich vybarach 2012 hoda. Raniej uvahu na toje źviarnuŭ u svaim błohu elektaralny hieohraf Kirejeŭ. Kali vieryć aficyjnym dadzienym, dyk žychary roznych častak Bieraścia, Mahilova, Viciebska, Babrujska dy inšych haradoŭ žyvuć u roznych časavych pajasach. Nižej tolki dva dobryja prykłady pa Bieraści i Homieli.
Chacia pavodle kolkaści vybarcaŭ akruhi Brest-Centralny i Brest-Uschodni vielmi blizkija (63 tysiačy i 59 tysiač vybarcaŭ, adpaviedna), z samaha ranku 23 vieraśnia 2012 hoda na ŭčastki pryjšli amal 2000 žycharoŭ pieršaj i tolki kala 350 druhoj akruhi.
U asnoŭny dzień hałasavańnia na vybarach-2012 pamiž 8 i 10 hadzinami ranicy adna pałova Bresta (žychary akruhaŭ Zachodniaj i Centralnaj) hałasavała ŭ šeść (!) razoŭ čaściej za druhuju pałovu horada (Uschodniaja i Pamiežnaja akruhi).
| Bresckaja akruha | Jaŭka za 5 dzion daterminovaha hałasavańnia | Jaŭka na 10 hadzin dnia, z ulikam daterminovaha | Jaŭka pamiž 8 i 10 hadzinami asnoŭnaha dnia hałasvańnia | Kolkaść vybarcaŭ, jakija prahałasavali z 8 da 12 hadzin |
| Zachodniaja №1 | 22,1% | 25,4% | 3,3% | 2323 |
| Centralnaja №2 | 23,8% | 26,8% | 3% | 1900 |
| Uschodniaja №3 | 26,4% | 27,2% | 0,6% | 356 |
| Pamiežnaja №4 | 30,8% | 31,3% | 0,5% | 319 |
Zaŭvaha: Kolkaść tych, chto prahałasavaŭ, vyličanaja na padstavie aficyjnych ličbaŭ vybarcaŭ u akruhach i pakaźnikaŭ jaŭki, akruhlenych da adnoj dziasiataj doli pracenta. U suviazi z hetym paznačanaja ličba tych, chto prahałasavaŭ, moža roźnicca ad umoŭna realnaj ličby na paru dziasiatkaŭ čałaviek. Ale vidavočna, što heta pryncypova nie ŭpłyvaje na vialikuju roźnicu ŭ jaŭcy pa rajonach horada.
Jość i inšyja bresckija prykłady, kali aficyjnyja ličby nie dajuć rady. Naprykład, u apošnija dźvie hadziny vybaraŭ (ad 18 da 20 hadzinaŭ) žychary Zachodniaj vybarčaj akruhi horada jak byccam hałasavali ŭ čatyry razy radziej za bieraściejcaŭ ź inšych troch akruhaŭ.
Ale ž chiba samyja niejmaviernyja dadzienyja jaŭki na vybarach-2012 u Homieli. Hamielčuki prahałasavali tak niepadobna da inšych biełaruskich vybarcaŭ, byccam jany žyvuć na inšaj płaniecie.
Hladzicie sami. Na 10 hadzin asnoŭnaha dnia hałasvańnia ličby jaŭki ŭ Homieli byli samyja małyja (kala 20%, z ulikam daterminovaha hałasavańnia) siarod usich inšych vialikich haradoŭ, u tym liku i Minska. Ale ž, jak śviedčać aficyjnyja dadzienyja, žychary Homiela, asabliva Centralnaj vybarčaj akruhi, zrabili niejmaviernuju jaŭku pamiž 10 i 12 hadzinami dnia, biehma pabiehšy hałasavać.
Ujavicie sabie hetuju karcinu i natoŭpy na vulicach, dvarach i vybarčych učastkach horada. Aficyjnyja ličby havorać, što pamiž 10 i 12 hadzinami dnia prahałasavali ažno 115 tysiač hamielčukoŭ!
Jak byccam amal 60% homielskich vybarcaŭ, što pryjšli hałasavać 23 vieraśnia 2012 hoda (biez uliku daterminovaha), zrabili heta pamiž 10 i 12 hadzinami dnia.
A siarod žycharoŭ Centralnaj akruhi Homiela za hetyja dźvie hadziny jak byccam addało svoj hołas bolš za 35% ad usich vybarcaŭ, 50% ad usich, chto prahałasavaŭ (razam z daterminovym), i bolš jak 80% ad tych, chto pryjšoŭ hałasavać u asnoŭny dzień!
Taki raskład hałasavańnia ŭ Homieli nie paćviardžajecca nijakimi nazirańniami i nie paddajecca nijakim tłumačeńniam. Aprača adnaho: hetyja ličby jaŭki štučnyja, niesapraŭdnyja. Napeŭna, reahujučy na zaŭvahi ci niezadavaleńnie «źvierchu» z nahody małych ličbaŭ jaŭki na 10 hadzin, adkaznyja za stvareńnie homielskich ličbaŭ asoby vyrašyli chucieńka papravić situacyju, dy nadta pierastaralisia.
Pavodle aficyjnych ličbaŭ Centrvybarkama: jaŭka pa homielskich akruhach 23 vieraśnia 2012 hoda ŭ asobnyja pieryjady času
| Homielskaja akruha | Ahulnaja ličba vybarcaŭ | Prahałasavali daterminova | Prahałasavali ad 8 da 10 hadzin dnia | Prahałasavali ad 10 da 12 hadzin dnia | Prahałasavali ad 12 da 20 hadzin | Vynikovaja jaŭka | ||||
| % | Ličba | % | Ličba | % | Ličba | % | Ličba | |||
| Jubilejnaja | 63449 | 21,5% | 13619 | 0,4% | 2538 | 29,2% | 18527 | 15,8% | 10025 | 66,9% |
| Sielmašaŭskaja | 67840 | 19,6% | 13281 | 0,7% | 4749 | 31,8% | 21573 | 19,5% | 13229 | 71,6% |
| Centralnaja | 64522 | 19,9% | 12776 | 0,8% | 5162 | 35,3% | 22776 | 7,9% | 5097 | 63,9% |
| Savieckaja | 67892 | 19,9% | 13501 | 0,6% | 4074 | 30,5% | 20707 | 18% | 12221 | 69% |
| Pramysłovaja | 65622 | 20,0% | 13109 | 1,2% | 7875 | 31,8% | 20868 | 16% | 10500 | 69% |
| Navabielickaja | 74986 | 19,0% | 14016 | 2,3% | 9748 | 15% | 11248 | 19,9% | 14922 | 56,2% |
| Razam | 404,311 | 80,302 | 34,146 | 115,699 | 65,994 | |||||
Zaŭvaha: Ličba tych, chto prahałasavaŭ daterminova, u dastupnych aficyjnych dadzienych adlustravanyja až da čałavieka. Ličby tych, chto hałasavaŭ u roznyja pieryjady času ŭ asnoŭny dzień hałasavańnia, padličanyja na padstavie aficyjnych ličbaŭ vybarcaŭ i pakaźnikaŭ jaŭki, akruhlenych da adnoj dziasiataj doli pracenta. U suviazi z hetym, paznačanaja ličba moža adroźnivacca ad umoŭnaj realnaj ličby na niekalki dziasiatkaŭ čałaviek.
Z tablicy da taho ž vynikaje roźnica dadzienych pa Navabielickaj akruzie ad inšych. U joj jaŭka na daterminovym hałasavańni byli blizkaja da toj, što i ŭ inšych rajonach horada. Zranicy (ad 8 da 10 hadzin) asnoŭnaha dnia hałasavańnia jaje vybarcy, pavodle aficyjnych dadzienych, byli kudy bolej aktyŭnymi za žycharoŭ inšych rajonaŭ Homiela. Ale ž paśla 10 hadzin jaŭka pa akruzie była nie takoj vysokaj, i ŭ vyniku stała adnoj z najmienšych u krainie.
Sprava ŭ tym, što Navabielickaja akruha na vybarach-2012 stała asablivaj, bo praŭładny kandydat Ihar Prakapienka, były pamočnik Łukašenki, napiaredadni vybaraŭ raptam źniaŭ svaju kandydaturu. U vyniku ŭ akruzie zastaŭsia tolki adzin zarehistravany kandydat ad Libieralna-demakratyčnaj partyi.
Vidavočna, što ŭłady mieli inšyja płany i puskać u parłamient «nie svajho» nie chacieli. Dla taho, kab vybary ŭ akruzie nie adbylisia, na joj možna była namalavać jaŭku, mienšuju za 50%. Ale ž ułady jaŭna nie chacieli stvarać taki precedent, bo jon kazaŭ by pra častkovy bajkot vybaraŭ vybarcami, chaj tolki na adnoj akruzie. Tamu ŭłady vybrali inšuju stratehiju, jakaja ŭdałasia dziakujučy znoŭ-taki fantastyčnym ličbam.
Pavodle aficyjnych vynikaŭ, na Navabielickaj akruzie ažno bolej za 80% vybarcaŭ (ci 34200 čałaviek), što addali svoj hołas, prahałasavali «suprać usich», a niepažadany kandydat zajmieŭ tolki 13,2%.
Na paźniejšych paŭtornych vybarach u akruzie ŭ parłamient trapiŭ pažadany ŭładami kandydat, tradycyjna nabraŭšy bolej za pałovu hałasoŭ u pieršym tury.
Spasyłki na analizavanyja aficyjnyja dadzienyja:
Daterminovaje hałasavańnie na vybarach-2012 pa akruhach: sajt CVK, dublikat
Jak źmianałasia jaŭka ŭ asnoŭny dzień hałasavańnia pa akruhach: sajt CVK, dublikat
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty52
Kamientary