Dva śviety, dva čempijanaty

U śviecie – padrychtoŭka da pieravybaraŭ prezydenta FIDE i abjadnalnaha matču Tapałaŭ–Kramnik, u nas – čempijanaty krainy siarod VNU i klubaŭ.

Biełaruskaja šachmatnaja ŭniversijada prajšła ŭ kancy krasavika ŭ Nacyjanalnym techničnym universytecie. Udzieł u spabornictvach brali až 24 kamandy. Došak dla hulni ŭ BNTU nie chapiła, i asobnym hulcam pryjšłosia mihravać u SDIUŠAR-11.

Kolkasny rost supravadžaŭsia padzieńniem jakaści partyjaŭ. Zbornaj Mižnarodnaha instytutu pracoŭnych i sacyjalnych stasunkaŭ, što prajhrała ŭsie sustrečy, udzielniki raili padužacca z pensijanerami ŭ parku Čaluskincaŭ… Zrešty, mižnarodny majstar Raman Łaŭrecki, supracoŭnik navučalnaj ustanovy FPB, paabiacaŭ skora pravieści svaich vychavancaŭ «u damki».

Kurjozam skončyłasia adna z «žanočych» partyjaŭ: napačatku partnerki zabyli pamianiać miescami karala i ferzia, a paźniejšy pratest byŭ adchileny. Zhodna z rašeńniem sudździaŭ, jakija spasłalisia na rehlament FIDE, kali ŭ partyi zrobleny try chady, to pamyłka ŭ rasstanoŭcy ličycca «zaihranaj». Heta źbiantežyła niaźmiennaha trenera kamandy BDPU Jurja Tepiera: z-za novych praviłaŭ pedahohi stracili paŭbała.

Najmacniejšymi byli haspadary placoŭki – Mikita Majoraŭ, Alaksandar Skałazubaŭ, Uładzimier Ramanienka, Jaŭhien Lasota, Iryna Bialko, Iryna Kiryk. Druhoje miesca – u BDU, treciaje – u Haradzienskaha dziaržuniveru. Kamanda ŭniversytetu fizvychavańnia nia trapiła ŭ lik pryzeraŭ, bo mieła niaroŭny skład: hrosmajstry – na pieršych doškach, aŭtsajdery – na apošnich.

U klubnym čempijanacie krainy (5–9 traŭnia) kamplektavańniu kamandaŭ uvaha nadavałasia za paŭhodu da imprezy. Sioleta kapitany abyšlisia bieź lehijaneraŭ, adnak čempijonskamu klubu «Viaśnianka» ŭdałosia załučyć da siabie hrosmajstra Alaksieja Fiodarava, a «Vektaru», vice-čempijonu 2004–2005 hh., – rejtynh-favaryta Alaksieja Alaksandrava. U vyniku «Viaśnianka-Hran» pieramahła ŭva ŭsich siamioch turach, «Vektar» prajhraŭ tolki adzin matč. Dobra vystupiła i bieraściejska-haradzienskaja kamanda «Bremar» – padzialiła 3–4 miescy ź mienskim «Neakvartam», sastupajučy jamu pavodle rejtynhu.

VR

❏

Jak by vy zhulali?

Pavialičyć

R. Chołmaŭ — A. Suecin, Jerevan, 1962. Chod biełych.

Adkaz: 1. g6! fg (1…hg 2. Fd8+ i 3. Tf3) 2. Fd8+ Kpf7 3. Td5! i vyjhrali. Abodva hrosmajstry doŭha žyli ŭ Biełarusi, a pamierli ŭ Rasiei (Ratmir Chołmau — 18 lutaha 2006 h. va ŭzroście 80 hadoŭ).

• 0
• 0
• 0
• 0
• 0
• 0
• 0
• 0