«U Biełarusi zastalisia 5800 rasijskich vajskoŭcaŭ». Paśla vučeńniaŭ zakinuty novy fejk 

Ukrainskija sajty znoŭ pišuć: u Biełarusi zastalisia rasijskija vojski paśla vučeńniaŭ «Zachad-2017».

Na hety raz cytujecca načalnik upraŭleńnia vieryfikacyi Hienštaba UZ Ukrainy Andrej Hudź.

Pa słovach Hudzia, «mižnarodnyja naziralniki» «vyjavili» na terytoryi Biełarusi rasijskich vajskoŭcaŭ, a biełaruski bok i sam, maŭlaŭ, nie robić z hetaha tajamnicy.

«Rasijskija vojski na terytoryi Biełarusi jość. U Vienie namieśnik načalnika Hienštaba, načalnik hałoŭnaha apieratyŭnaha ŭpraŭleńnia Respubliki Biełaruś hienierał-major Muraviejka ahučyŭ, što stvorana hrupoŭka stałaha dziejańnia, sumiesnaja biełaruska-rasijskaja, kolkaść 12 tysiač čałaviek, ź ich 5 tysiač 800 — pradstaŭniki Rasijskaj Fiederacyi», — zajaviŭ Hudź, jak pišuć ukrainskija, a ŭśled za imi i asobnyja biełaruskija sajty.

Niedavier da takich zajavaŭ ukrainskich vajennych vyklikaje chacia b toje, što heta ŭžo nie ŭpieršyniu: raniej kiraŭnik ukrainskaha Hienštaba Muženka ŭžo raskazvaŭ, što rasijskija vojski nie viarnulisia da siabie paśla vučeńniaŭ «Zachad-2017» — heta, viadoma, nie paćvierdziłasia.

Hetym razam aŭtaraŭ infarmacyi možna papraknuć u faktyčnych pamyłkach.

Raźbiaremsia: ukrainski pałkoŭnik cytuje namieśnika Biełakonieva, hienierał-majora Muraviejku.

Sapraŭdy, Muraviejka vystupaŭ u Vienie.

Ale kali toje było?

12 lipienia (!) 2017 hoda na forumie ABSIE; Muraviejka tady vystupaŭ pierad zamiežnymi dypłamatami i vajskoŭcami na temu majučych adbycca vučeńniaŭ. Tam i była ahučana kolkaść vojskaŭ u 12 tysiač čałaviek, jakija mieli ŭziać udzieł u «Zachadzie-2017», ź ich tolki 10 tysiač na terytoryi Biełarusi, siarod jakich i 3000 rasijskich vajskoŭcaŭ. Astatnija dźvie tysiačy treniravalisia ŭ Rasii. I taja hrupoŭka ŭ 12 tysiač — heta tolki pavodle aficyjnaha scenaru vučeńniaŭ.

Što datyčyć «mižnarodnych inśpiekcyj» — to heta, vidać, tyja naziralniki, jakich nie ŭ poŭnaj miery aznajomili z chodam vučeńniaŭ u čas ich praviadzieńnia.

Ciažka ŭjavić, što amierykanskija spadarožniki i OSINT-raźviedka nie zmahli b vyjavić toje, što zdoleŭ vyjavić ukrainski pałkoŭnik Hudź na padstavie słovaŭ Muraviejki čatyrochmiesiačnaj daŭniny.

Da taho ž, u ramkach Damovy ab zvyčajnych uzbrajeńniach u Jeŭropie krainy NATA (i my, adpaviedna, naadvarot) mohuć zaprasić inśpiekcyju ŭ Biełaruś i pieraličyć kožnaha sałdata na adpaviednaść kolkaści, što praduhledžana damovaj — jak bačym, z boku NATA da nas pretenzij niama.

Dyk navošta takija ŭkidy treba?

«Kaniečnie, heta ŭkid. Prosta ciapier Ukraina maje patrebu ŭ padtrymcy ZŠA, — miarkuje vajskovy ekśpiert Alaksandr Alesin. — Im važna pakazać, što jość stałaja pahroza z uschodu i poŭnačy. Nas naŭprost jany abvinavacić nie mohuć, a voś Rasiju, jakaja moža napaści z našaj terytoryi — całkam. Tamu hetyja słovy raźličanyja najpierš na zachodnija vušy. Ale, kali b tut sapraŭdy byli rasijskija vojski, to heta byŭ by skandał. Ale takija zajavy kiepskija dla imidžu Ukrainy — jany pakazvajuć, što ŭkrainskija hienierały «nie adkazvajuć za bazar», — padsumavaŭ Alesin.

U pres-słužbie Minabarony «Našaj Nivie» čarhovy raz zajavili, što ŭsie rasijskija vojski paśla vučeńniaŭ viarnulisia dadomu.

• 0
• 0
• 0
• 0
• 0
• 0
• 0
• 0