Były palitviazień Juryj Rubcoŭ: U Niamieččynie pracuju pamočnikam majstra za 68 jeŭra ŭ miesiac
Hamialčuk, jaki paprasiŭ palityčny prytułak, raspavioŭ «Narodnaj Voli» pra toje, kali budzie razhledžana jaho apielacyja, i čym jon zajmajecca ciapier u Niamieččynie.
Nahadajem, Hiermanija admoviła ŭ palityčnym prytułku biełarusu, byłomu palitviaźniu Juryju Rubcovu. Taki adkaz jon atrymaŭ jašče 1 červienia paśla bolš čym hadavoha čakańnia pryniaćcia rašeńnia pa hetym pytańni. Adnak biełarus padaŭ apielacyju na rašeńnie niamieckich uładaŭ i ciapier čakaje novaha sudovaha razboru.
— Majoj spravaj zajmajucca advakaty, zastajecca tolki čakać suda, — raspaviadaje Jury Rubcoŭ. — Try razy na tydzień chadžu na kursy niamieckaj movy. Padzarablaju pamočnikam chatniaha majstra ŭ internacie, u jakim žyvu. Žyćcio adnastajnaje. Adno možna skazać — materyjalnych ciažkaściaŭ niama. Krychu bolš za miesiac tamu zrabili apieracyju na kalenie, prajšoŭ kurs lačebnaj himnastyki.
— Što ŭvachodzić u abaviazki pamočnika chatniaha majstra?
— Mianiaju pieraharełyja lampački, pałamanyja zamki ŭ dźviarach. Dvojčy vyłamvaŭ dźviery ŭ pakoi, u jakich niespadziavana začynilisia małyja, a adamknuć zamok nie mahli. Źbiraju meblu žycharam, likvidujem zasory ŭ kanalizacyi na kuchni i praciečki vady. Navat vientylacyju čyściŭ. Adnym słovam, dahladaju ŭvieś dom. Susiedzi, hramadzianie Hiermanii, časam prosiać dapamohu, tak što im taksama nie admaŭlaju. Mianiaju koły na aŭto, časam dapamahaju zanieści meblu. Tamu mocna sumavać nie davodzicca. Saču za tym, kab u domie ŭsio funkcyjanavała.
— U vas jość niejkaja fiksavanaja zarpłata?
— Jość dapamoha — 315 jeŭra. I nie vielmi vialiki zarobak, choć pracuju aficyjna. Naohuł, u Hiermanii minimalnaja apłata adnoj hadziny — nie mienš za 8 jeŭra. Ale ja — nie hramadzianin Hiermanii, tamu prapanujecca padpracoŭka, jakaja apłačvajecca pa 80 centaŭ za hadzinu, a pracavać možaš čatyry hadziny na dzień. U vyniku ŭ miesiac vychodzić 68 jeŭra. Heta hramadskaja nahruzka ź nievialikaj vypłataj. Ja, ščyra kažučy, nie chacieŭ hetym zajmacca, ale majstar, ubačyŭšy maje vyraby z dreva, nastajaŭ na tym, kab mienavita mianie ŭziali da jaho pamočnikam, choć byli i inšyja achvotnyja na hetaje miesca.
— Juryj, kali prykładna razhledziać vašu apielacyju?
— Pra heta mnie ničoha nie viadoma. U Niamieččynie niama žorstkich abmiežavańniaŭ pa časie pasiadžeńnia suda z momantu padačy zajavy. Tamu čakajem…
Kamientary