Da 5 000 hadoŭ: jakija drevy žyvuć daŭžej za ŭsich? FOTY
My ŭžo raspaviadali pra žyvioł-rekardsmienaŭ, jakija pieražyvajuć čałavieka na niekalki sotniaŭ hod. Ale navat žyćcio hrenłandskaj palarnaj akuły praciahłaściu 500 hod — ništo ŭ paraŭnańni ź niekatorymi raślinami.
Pieražyła svoj roskvit i zaniapad staražytnaja jehipieckaja cyvilizacyja, naradziŭsia Chrystos, utvaryłasia pieršaja biełaruskaja dziaržava — Połackaje kniastva, była adkryta elektryčnaść, minuła Druhaja suśvietnaja vajna, a niekatoryja z hetych drevaŭ prajšli praz tysiačahodździ i dahetul stajać, zastajučysia adzinymi śviedkami ŭsich padziej, što adbyvalisia na našaj płaniecie.
U hetym artykule my raspaviadziem pra drevy, praciahłaść žyćcia jakich zdolnaja ŭrazić kožnaha.
1. Mafusaił — 4847 hadoŭ
Tak nazyvajecca aściukavataja mižhornaja sasna, samaje staroje ź viadomych žyvych drevaŭ, jakoje raście ŭ amierykanskaj Kalifornii. U 2012 hodzie była znojdzienaja inšaja takaja sasna, čyj uzrost jašče bolšy — da 5000 hod. U Šviecyi, darečy, raście zvyčajnaja jełka, uzrost jakoj aceńvajuć u 9550 hod. Ale nasamreč jana maje ŭzrost tolki niekalki stahodździaŭ i źjaŭlajecca viehietatyŭnym naščadkam, što raście nad pamierłaj jełkaj.
2. Siekvojadendran — 3500 hadoŭ
Dla viečnazialonych ihličnych drevaŭ siekvojadendran siamiejstva kiparysavyja žyć pa try-čatyry tysiačy hod — zvyčajnaja sprava. Šmatlikija ekzemplary majuć navat svaje ŭłasnyja imiony.
Ciapier hetych vielizarnych raślin zastałosia nie tak i šmat. U pryrodzie jany sustrakajucca ŭ Kalifornii, kultyvujucca taksama ŭ Jeŭropie.
3. Džaja Šry Macha Bodchi — 2300 hadoŭ
Dreva ŭ Šry-Łancy, jakoje, pavodle padańnia, było vyraščanaje z adrostka Dreva Bodchi, pad jakim prync Haŭtama dasiahnuŭ praśviatleńnia i staŭ Budam. Hetaje dreva taksama ličycca samym starym u śviecie drevam, pasadžanym čałaviekam.
4. Jadłoviec Bienieta — 2200 hadoŭ
Jašče adzin doŭhažychar z Kalifornii — zachodni jadłoviec — adnosicca da siamiejstva Kiparysavych, dla jakich, jak užo zhadvałasia vyšej, doŭhažycharstva — praviła, a nie vyklučeńnie.
5. Dub u Biełarusi — 800 hadoŭ
Samym starym drevam u Biełarusi ličycca Car-dub, jaki raście ŭ Małaryckim rajonie Bresckaj vobłaści. Jahony ŭzrost navukoŭcy aceńvajuć u 800 hadoŭ, i, varta adznačyć, vyhladaje jon jašče davoli badziora.
Čytajcie taksama: 152, 250, 512 hadoŭ: jakija istoty žyvuć daŭžej za ŭsich?
Ciapier čytajuć
Aryštavany 75‑hadovy Źmicier Sańko — vieteran-vydaviec1
Kamientary