Za paŭhoda da śmierci Alaksandra Koržyča ŭ toj ža vajskovaj čaści №43064 u Piečach zahinuŭ jašče adzin vajskoviec terminovaj słužby Alaksandr Statujeŭ. Pa aficyjnych źviestkach, jon straciŭ prytomnaść u kazarmie na vačach sasłužyŭcaŭ — spyniłasia serca, padrabiaznaści zdareńnia nadrukavała «Jeŭraradyjo».
«18 lutaha 2017 hoda padčas ranišniaha padjomu, padčas pastrajeńnia asabistaha składu ŭ 6 hadzin 05 chvilin vajennasłužačy ŭpaŭ, straciŭšy prytomnaść, — padrychtavaŭ adrazu paśla zdareńnia «Źviestki ab hibieli Alaksandra Statujeva» dziažurny pa 72 hv. ANC, padpałkoŭnik Tumiłovič. — Dziažurny pa navučalnaj batarei małodšy siaržant Nikicienka S.A. nieadkładna vyklikaŭ dziažurnaha lekara miedycynskaj roty. U 6 hadzin 25 chvilin u padraździaleńnie prybyŭ dziažurny lekar. Padčas ahladu doktaram u vajennasłužačaha adsutničała dychańnie i sardečnaja dziejnaść. Lekar akazvaŭ reanimacyjnyja dziejańni da 6 hadzin 50 chvilin, paśla čaho kanstatavaŭ śmierć vajennasłužačaha. Papiaredni dyjahnaz — parušeńnie sardečna-sasudzistaj dziejnaści».
Staršy śledčy druhoha śledčaha adździaleńnia Barysaŭskaha rajonnaha adździeła Śledčaha Kamiteta, major justycyi Matusievič pravodzić pravierku, ale nie znachodzić pryčyn dla ŭzbudžeńnia kryminalnaj spravy. Śledčy paviedamlaje pra heta 18 sakavika, roŭna praź miesiac paśla trahičnaha zdareńnia. Za dzień da hetaha sudmiedekśpiert Siarhiej Zolin zaviaršaje ekśpiertyzu i addaje jaje vyniki:
«Śmierć Statujeva A. A. nastupiła ad vostraj sardečnaj niedastatkovaści pa pryčynie išemičnaj chvaroby serca ŭ spałučeńni z drobnaačahovym sieroznym mijakardytam. Padčas daśledavańnia na ciele Statujeva A. A. jakich-niebudź cialesnych paškodžańniaŭ nie vyjaŭlena».
Cikavaje apisańnie sudmiedekśpierta taho, što było apranutaje na chłopcy: zimovaja dy letniaja nižnija saročki, zimovyja dy letnija kalsony, kamuflažnyja štany i škarpetki. Bolš ničoha. Hledziačy pa dvajnym kamplekcie bializny, u kazarmach nie vielmi ciopła. Pry hetym padobna, što Alaksandr apranaŭsia paśla snu, ale ŭ 6:05 da pastrajeńnia hatovy jašče nie byŭ.
«Vierahodna, abumoŭlena źmienami ŭmovaŭ žyćcia, režymu pracy i adpačynku»
Atrymlivajecca, što chłopca pryzvali ŭ vojska ź išemičnaj chvarobaj serca!? Śledčy taksama zadajecca hetym pytańniem i atrymlivaje adkaz ad Upraŭleńnia achovy zdaroŭja mahiloŭskaha abłvykankama. Na momant pryzyvu Alaksandr Statujeŭ byŭ pryznany pryhodnym da słužby ŭ vojsku ź niaznačnymi abmiežavańniami. Pry hetym abmiežavańni abumoŭlenyja mižpazvanočnym asteachandrozam.
Pra prablemy z sercam Upraŭleńnie achovy zdaroŭja adkazvaje, što ŭ dziacinstvie ŭ Alaksandra Statujeva «mieła miesca arteryjalnaja hipiertenzija pubiertatnaha pieryjadu, jakaja nie mieła patreby ŭ pryjomie preparataŭ». Ale pa vynikach nieadnarazovych abśledavańniaŭ śpiecyjalistaŭ «u tym liku i kardyjołaha, patałahičnych źmienaŭ nie znojdziena».
Miedyki niekalki razoŭ źviartajuć uvahu na toje, što dziejańni pryzyŭnoj miedkamisii nie vychodzili za miežy zakanadaŭstva i dadajuć:
«Zachvorvańnie (išemičnaja chvaroba serca) u Statujeva A. A. raźviłasia vostra, biez skarhaŭ kardyjałahičnaha charaktaru padčas słužby ŭ šerahach Uzbrojenych Sił, i prajaviłasia ŭ vyhladzie ŭstojlivych spazmaŭ karanarnych arteryj, vierahodna, abumoŭlenaje źmienami ŭmovaŭ žyćcia, režymu pracy i adpačynku, značnym pavieličeńniem fizičnych nahruzak».
Alaksandra Statujeva pryzvali 24 listapada 2016 hoda. Atrymlivajecca, što mienš, čym za try miesiacy ŭ chłopca raźvivajecca surjoznaje zachvorvańnie, jakoje prachodzić bieź simptomaŭ i skarhaŭ na zdaroŭje. Za miesiac da śmierci, z 13 pa 19 studzienia Alaksandr lažyć z anhinaj u miedčastcy, ale i ŭ hety čas chłopiec nie skardzicca na prablemy z sercam, nie zaŭvažajuć ich i daktary.
«Jaho zaprašali ŭ milicyju na pracu, — raspaviadaje Jeŭraradyjo krynica, blizkaja da zahinułaha vajskoŭca. — Atrymlivajecca, što pierad samym pryzyvam jon prajšoŭ miedkamisiju ŭ paliklinicy MUS, i byŭ całkam pryhodny. Jon sutki nasiŭ admysłovy prybor, jaki aŭtamatyčna viadzie bieśpierapynnuju rehistracyju elektrakardyjahramy. Jon byŭ pryhodny dla słužby ŭ MUS, ale pieradumaŭ. Tamu, kali sapraŭdy niešta zdaryłasia z sercam, to tolki praz toje, što jaho zahaniali i nie davali adpačyvać».
U morhu, kali svajaki ahladali cieła, nijakich śladoŭ pabojaŭ zaŭvažna nie było. «Ale heta byŭ vizualny ahlad, pierakanańnia, što jon nie byŭ zahrymavany, niama», — kaža krynica.
«Adzinaje, syn kazaŭ, što niestatutnyja adnosiny, a bolš ničoha nie kazaŭ»
Maci ad syna pra dziedaŭščynu nie čuła ničoha:
«Syn nikoli mnie ni na što nie skardziŭsia, — kaža Lilija Statujeva. — Bo jon mianie škadavaŭ. Zaŭsiody kazaŭ: usio, mama, dobra! Nakont hrošaj — taksama, nie šmat ja jamu davała. 200 rubloŭ, kali jeździła na prysiahu, i ŭ Piečy da jaho jeździła taksama, 200 rubloŭ dała. Na kartcy jašče byli hrošy, ale jon ich nie ŭsie patraciŭ. Jon u mianie nikoli ničoha nie prasiŭ! Tamu nie budu brać hrech na dušu i kazać pra dziedaŭščynu. Adzinaje, jon kazaŭ, što niestatutnyja adnosiny, a bolš ničoha nie kazaŭ. Ja nie viedaju, što i dumać».
Paśla hibieli ŭ Piečach Alaksandra Koržyča staršynia Śledčaha kamiteta Ivan Naskievič zapatrabavaŭ dla dadatkovaj pravierki ŭsie materyjały pa faktach śmierci i naniasieńni cialesnych paškodžańniaŭ vajennasłužačym za apošnija šeść hadoŭ. Nie zastałasia biez uvahi i sprava Alaksandra Statujeva, pravierka pa spravie adnoŭlenaja 10 kastryčnika. Ale vieści jaje daručajuć tamu ž majoru justycyi Matusieviču H.Je., jaki raniej užo nie znajšoŭ pryčyn dla ŭzbudžeńnia kryminalnaj spravy.
Na nastupny dzień, 11 kastryčnika śledčy daručaje Centralnaj vajenna-ŭračebnaj kamisii Uzbrojenych sił RB pravieści paśmiarotnuju vajenna-ŭračebnuju ekśpiertyzu. Jaje meta — daviedacca, ci pakutavaŭ Alaksandr Statujeŭ na niejkija zachvorvańni padčas pryzyvu ŭ vojska, ci byŭ nasamreč pryhodny dla słužby i ci nie pamylilisia daktary padčas abśledavańnia chłopca. To bok, usio toje, što spadar Matusievič niekalki miesiacaŭ tamu ŭžo prasiŭ zrabić upraŭleńnie achovy zdaroŭja mahiloŭskaha abłvykankama. A jašče praź dzień, 12 kastryčnika śledčy Matusievič prypyniaje pravierku, pakul nie buduć hatovyja vyniki ekśpiertyzy. Ni słova pra dziedaŭščynu ci paŭtornuju sud-miedekśpiertyzu.
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary