Baćki Viki Papčeni, jakaja zahinuła na bulbie pad Maładziečnam, padali pazoŭ na 50 tysiač ab spahnańni maralnaj škody

U Maładziečnie baćki 13-hadovaj vučanicy SŠ №11 Viki Papčeni, jakaja zahinuła na bulbie ŭ vieraśni 2016 hoda, damahajucca ŭ sudzie kampiensacyi maralnaj škody. Suma pazovu — 50 tysiač rubloŭ, piša kraj.by

Vika zahinuła 29 vieraśnia 2016 hoda na bulbianym poli sielskahaspadarčaha pradpryjemstva «Uschod-Ahra» paśla taho, jak na dziaŭčynku zadnim chodam najechaŭ hruzavik MAZ, jaki pieravoziŭ bulbu.

U sudzie Maładziečanskaha rajona 26 i 27 śniežnia prajšli dva pasiadžeńni pavodle pazovu Aleha i Julii Papčenia. Čarhovaje, treciaje pasiadžeńnie, pryznačanaje na 17 studzienia.

— My padali pazoŭ da adździeła adukacyi, sportu i turyzmu Maładziečanskaha rajvykankama, AAT «Choŭchłava», jakomu naležaŭ MAZ, jaki najechaŭ na maju dačku, i AAT «Uschod-Ahra», na pole jakoha Vika zahinuła. My ličym hetyja try arhanizacyi vinavatymi ŭ trahiedyi. I prosim sud vynieści rašeńnie ab tym, kab jany sumarna pakryli nam pazoŭ u pamiery 50 tysiač rubloŭ, — patłumačyŭ Aleh Papčenia.

Intaresy baćkoŭ dziaŭčynki pradstaŭlaje ŭ sudzie pravavy inśpiektar niezaležnaha prafsajuzu REP Juryj Bielakoŭ. Jon raspavioŭ, što ŭ pieršyja dva pasiadžeńni 26 i 27 śniežnia sud apytvaŭ pazoŭnika, adkazčykaŭ i trecich asob.

Juryj Bielakoŭ adznačyŭ:

— Pazoŭnik prosić spahnać maralnuju škodu tolki z adździeła adukacyi, sportu i turyzmu rajvykankama, a taksama sielhaspradpryjemstvaŭ «Uschod-Ahra» i «Choŭchłaŭ». Niahledziačy na heta, sudździa Ihar Haranovič pryciahvaje da pakryćcia maralnaj škody taksama SŠ №11, dzie vučyłasia Vika, vadziciela Paŭła Cybina, jaki kiravaŭ MAZam, i nastaŭnikaŭ dziaŭčynki Irynu Apanasievič i Volhu Zavadskuju, jakija byli ź Vikaj ŭ toj dzień na bulbie.

Nahadajem, Pavieł Cybin asudžany da 3 hadoŭ abmiežavańnia voli z nakiravańniem u vypraŭlenčuju ŭstanovu adkrytaha typu i pazbaŭleńniem prava kiravańnia transpartnymi srodkami na praciahu piaci hadoŭ.

Prysud Irynie Apanasievič i Volzie Zavadskaj — pa dva hady abmiežavańnia voli biez nakiravańnia ŭ vypraŭlenčuju ŭstanovu adkrytaha typu i štraf u pamiery 100 bazavych vieličyń kožnaj (2 300 rubli). Taksama na praciahu dvuch hadoŭ jany nie majuć prava zajmacca piedahahičnaj pracaj.

— Paśla taho, jak sudździa pryciahnuŭ u jakaści suadkaźnika škołu, kiroŭcu i nastaŭnikaŭ, my, u svaju čarhu, padali chadajnictva ab pryciahnieńni da pakryćcia škody staršyni Maładziečanskaha rajvykankama Alaksandra Jachnaŭca, načalnika adździeła adukacyi, sportu i turyzmu rajvykankama Inu Drapieza i byłoha namieśnika dyrektara SŠ №11 Dzianisa Kurca, jakija adpraŭlali dziaciej na bulbu. A taksama kiraŭnika i bryhadzira AAT «Uschod-Ahra», jakija ich tam prymali, — skazaŭ pravavy inśpiektar Juryj Bielakoŭ.

• 0
• 0
• 0
• 0
• 0
• 0