Normy biazmytnaha ŭvozu tavaraŭ dla asabistaha karystańnia pačynajuć źmianšacca — dojdzie da 500 jeŭra na čałavieka

U krainach JEAES urazajuć limity na ŭvoz tavaraŭ z-za miažy.

Pavialičyć

Siońnia ŭstupaje ŭ siłu rašeńnie Rady Jeŭrazijskaj ekanamičnaj kamisii №107 «Ab asobnych pytańniach, źviazanych z tavarami dla asabistaha karystańnia». U dakumiencie havorycca ab źnižeńni normy biaspošlinnaha ŭvozu tavaraŭ dla asabistaha karystańnia.

Tak, da kanca 2018 hoda žychary krain JEAES, jakija vandrujuć naziemnym transpartam, jašče zmohuć pryvozić tavaraŭ na 1500 jeŭra i pa vazie da 50 kiłahramaŭ.

Z 2019 hoda normy buduć pastupova iści ŭ bok panižeńnia. Tak, užo ŭ nastupnym hodzie možna budzie ŭvozić 50 kiłahramaŭ tavaru, ale na sumu nie bolš za 1000 jeŭra. U 2020-m — sumki turystaŭ pavinny schudnieć da 35 kiłahramaŭ, a rečy ŭ ich patańnieć da 750 jeŭra. U 2021 hodzie pryvozić možna budzie tolki 25 kiło tavaraŭ nie bolej čym na 500 jeŭra.

Kali čałaviek budzie vieźci niešta zvyš limitu, jamu pryjdziecca zapłacić myta — 30% ad koštu tavaru, ale nie mienš jak 4 jeŭra za kožny lišni abo bolš darahi kiłahram.

Mytniki nahadvajuć, što ŭsie hetyja normy nie buduć raspaŭsiudžvacca na nianovyja rečy, jakija ludzi ŭziali z saboj u darohu.

Limity na ałkahol zastajucca takimi ž — nie bolš za 3 litry, u tym liku piva, na adnaho paŭnaletniaha čałavieka. Kali vieźci bolš, treba zapłacić 10 jeŭra źvierchu za kožny lišni litr. A pravozić bolš za 5 litraŭ na adnaho čałavieka naohuł zabaroniena.

Zaraz vierchniuju miažu norm i biaspošlinnaha ŭvozu tavaraŭ dla fizičnych asob, i limity na mižnarodnyja pasyłki ŭstaloŭvaje JEEK. Ale krainy, jakija ŭvachodziać u JEAES, mohuć źmianšać ich na nacyjanalnym uzroŭni. Jakija kankretna źmieny čakajuć biełarusaŭ?

— U suviazi z ustupleńniem u siłu Mytnaha kodeksa Jeŭrazijskaha ekanamičnaha sajuza i šerahu rašeńniaŭ JEEK narmatyŭna-pravavyja akty Respubliki Biełaruś taksama znachodziacca na stadyi raspracoŭki, — adkazali nam u Dziaržaŭnym mytnym kamitecie. — Pakul rana kazać, jakija kankretna źmieny i kali buduć u nas. Usie piać krain, jakija ŭvachodziać u JEAES, znachodziacca na pierachodnaj stadyi.

Nahadajem, biełarusy, jakija jeździać za miažu nie čaściej čym raz u try miesiacy, mohuć pravieźci tavar dla asabistaha karystańnia vahoj da 50 kh i koštam nie vyšej za 1500 jeŭra. A tyja, chto jeździć čaściej, — na 20 kh i 300 jeŭra.

• 0
• 0
• 0
• 0
• 0
• 0