Lidary arhanizacyi biełarusaŭ Polščy śviatkavali 9 Maja z hieorhijeŭskaj stužkaj, biełaruskija dypłamaty — biez
Kiraŭniki Biełaruskaha hramadzka-kulturnaha tavarystva ŭ Polščy Jan Syčeŭski i jahony namieśnik Vasil Siehień adznačyli Dzień Pieramohi ŭ Biełastoku z hieorhijeŭskimi stužkami. Biełaruskija dyplamaty admovilisia ich načapić, piša Radyjo Svaboda.
Uračystaści 9 traŭnia prajšli na vajskovych mohiłkach u Biełastoku, dzie pachavanyja savieckija žaŭniery. Akcyju arhanizavała biełaruskaje konsulstva. Da jaho dałučylisia miascovyja biełarusy i pradstaŭniki Rasiejskaha kulturna-aśvietnaha abjadnańnia.
Na fatazdymkach, jakija apublikavaŭ u svaim Fejsbuku žurnalist Polskaha Radyjo Biełastok Jarasłaŭ Ivaniuk, bačnyja Jan Syčeŭski i Vasil Siehień z hieorhijeŭskimi stužkami na pinžakach. Ich prynieśli na mohiłki siabry Rasiejskaha kulturna-aśvietnaha abjadnańnia.
Paśla rasiejskaj vajennaj ahresii va Ŭkrainie hetyja kolery stali symbalem «ruskaha miru» i ahresiŭnaj rasiejskaj palityki stasoŭna svaich susiedziaŭ. «Hieorhijevskaja lentočka» słužyć vobrazam adnoŭlenaj rasiejskaj imperskaj identyčnaści na postsavieckaj prastory.
U interviju Jarasłavu Ivaniuku Vasil Siehień skazaŭ:
«Heta tolki symbal. A jaki inšy symbal byŭ by lepšy? Mnie zdajecca, što my ŭschodnija słavianie, prynamsi ja asabista, adčuvaju bolšuju suviaź z hetym ruskim miram, duchoŭnym miram, niezaležna ad palityki. Hetaja suviaź adčuvajecca na kožnym kroku navat u sučasnaści. Kali ja jedu ŭ Biełaruś, pierasiakaju miažu, to zusim inšaje adčuvańnie, čym u kantaktach ź inšymi bratami-słavianami na Zachadzie, u Polščy, naprykład», — skazaŭ Vasil Siehień.
Prysutnyja na mierapryjemstvie biełaruskija dyplamaty nie zachacieli čaplać stužki ad arhanizataraŭ.
Konsuł Biełarusi ŭ Biełastoku Ała Fiodarava ŭ interviju Radyjo Biełastok zajaviła: «Heta nia našaja tradycyja. Nie tradycyja Biełarusi. U Biełarusi ŭ nas inšyja stužki, ź dziaržaŭnymi symbalami».
Prakamentavać vykarystańnie hieorhijeŭskich stužak Svaboda paprasiła Jana Syčeŭskaha, šmathadovaha kiraŭnika BHKT. Jon viadomy sympatyjaj da Alaksandra Łukašenki, braŭ udzieł va Ŭsiebiełaruskim źjeździe. U 2001 u Miensku vykazaŭsia suprać intehracyi Polščy ŭ Eŭraźviaz i nazvaŭ Biełaruś uzoram demakratyi.
— Spadar Syčeŭski, hetyja kolery siońnia symbalizujuć ahresiŭnuju palityku Rasiei va Ŭkrainie, heta symbal «ruskaha miru». Čamu vy zhadzilisia nadzieć hetyja stužki?
— Ciažka mnie heta patłumačyć. Hałoŭnym inicyjataram śviata było rasiejskaje tavarystva (arhanizataram było Hieneralnaje konsulstva Biełarusi. — RS.). Hety symbal maje hłybokuju rasiejskuju tradycyju. Jon symbalizuje zakančeńnie vajny.
— Ale siońnia jon symbal vajny Rasiei suprać Ukrainy.
— Hetaja stužka nia maje antyŭkrainskaj historyi. Dla mianie jana maje inšaje značeńnie. Nas vyzvaliŭ SSSR. Eŭropa sama nas by nia vyzvaliła. I čamu ŭsio, što rasiejskaje, kiepska?
— A čamu vy nie ŭziali z saboju stužku z kolerami dziaržaŭnaha ściaha Biełarusi, jakaja vykarystoŭvajecca na Dzień Pieramohi ŭ Miensku?
— My nie arhanizatary mierapryjemstva i nia možam dyktavać svaich praviłaŭ.
— Ale biełaruskija dyplamaty nia mieli hieorhijeŭskich stužak. Dyk mo praz hod vy zrobicie na ichny ŭzor?
— Navošta? Heta symbal pieramohi. U jaho hłybokaja tradycyja, navat carskaja jašče.
— Tradycyja, jakaja źmianiłasia i siońnia stała symbalem vajny va Ŭkrainie. Ich čaplajuć na aŭtamaty bajeviki, jakija zabivajuć ukraincaŭ, bratoŭ-słavian.
— Ja ničoha pra heta nia viedaju i nia bačyŭ, kab hetyja stužki čaplali bajeviki.
***
Biełaruskaje hramadzka-kulturnaje tavarystva ŭ Polščy — heta najstarejšaja hramadzkaja arhanizacyja biełarusaŭ u Polščy, zasnavanaja ŭ 1956 hodzie, pravodzić kulturna-aśvietnuju rabotu siarod biełaruskaha nasielnictva Polščy. Pry tavarystvie pracujuć biblijateki, kluby, kalektyvy mastackaj samadziejnaści. BHKT jość zasnavalnikam tydniovika biełarusaŭ Polščy «Niva».
Ciapier čytajuć
U Biełarusi znajšli kopiju šviejcarskich Alpaŭ — ale turystaŭ tam nie čakajuć2
Kamientary