«Tvoi hłaza mienia plenili»: mužčyna na sudzie čytaŭ vieršy sužycielcy, jakuju žorstka źbiŭ. Prysutnyja navat puścili ślazu
U Vałožynie sud vynies vyrak 46-hadovamu mužčynu, jakoha pryznali vinavatym u pryčynieńni ciažkich cialesnych paškodžańniaŭ sužycielcy, a taksama ŭ kradziažy ruchavikoŭ u Minskim i Vałožynskim rajonach, paviedamlaje kraj.by.
Viadoma, što abvinavačany žyŭ u Dziaržynsku, pracavaŭ u indyvidualnaha pradprymalnika. U lutym u Fanipali źbiŭ siabroŭku, ź jakoj žyŭ šeść hadoŭ. Pavaliŭ žančynu na padłohu i nanios niekalki ŭdaraŭ. Udary byli kvalifikavanyja jak ciažkija cialesnyja paškodžańni.
Znachodziačysia pad vartaj, mužčyna pakajaŭsia, što ź listapada 2017 pa studzień 2018 hoda kraŭ ruchaviki ź sielhaspradpryjemstvaŭ Minskaha i Vałožynskaha rajonaŭ, ździejśniŭšy čatyry kradziažy. Ahulnaja suma naniesienaj škody skłaŭ 16 079 rubloŭ 12 kapiejek.
Abvinavačany ŭ sudzie całkam pryznaŭ svaju vinu. A, pramaŭlajučy apošniaje słova, klaŭsia ŭ kachańni i prasiŭ u jaje prabačeńnia.
— Jon navat vieršy pačaŭ čytać. Niešta nakštałt: «Tvoi hłaza mienia plenili…» — raspaviała pamočnik prakurora Nadzieja Radzievič.
Naohuł, usio było vielmi kranalna. Sužycielka płakała i prasiła sud stroha jaho nie karać. Pracadaŭca, indyvidualny pradprymalnik, taksama puściŭ ślazu.
Abiacaŭ, što kali sud nie pazbavić jaho rabotnika svabody, jon pavysić jamu zarobak, vypłacić premiju, i jany sumiesna buduć kampiensavać škodu, pryčynienuju sielskahaspadarčym pradpryjemstvam.
Sud u vyniku pryniaŭ rašeńnie nie adpraŭlać dziaržynca ni ŭ kałoniju, ni ŭ vypraŭlenčuju ŭstanovu adkrytaha typu.
Abvinavačany atrymaŭ usiaho tolki čatyry hady chatniaj «chimii» i byŭ vyzvaleny z-pad varty ŭ zale suda.
Prysud pakul nie ŭstupiŭ u zakonnuju siłu. Jon moža być abskardžany i apratestavany ŭ Minski abłasny sud.
Kamientary