Apieratarka i režysiorka Jula Viačerskaja pra toje, čamu nie vytrymała na dziaržaŭnym telebačańni i pačała zdymać videa sama
Tradycyjna kožnuju niadzielu raspytvajem biełarusak pra piać lubimych rečaŭ, jakija majuć niamałaje značeńnie ŭ ich žyćci.
Siońnia pra svaje talismany i štodzionnych pamočnikaŭ raspaviadaje videaapieratarka, režysiorka, u minułym — madel i televiadučaja Julija Viačerskaja.
— Apošnim maim aficyjnym miescam pracy pierad tym, jak ja adkryła IP, byŭ telekanał Minsk 24DOK (siońnia heta MinskTV), dzie ja była viadučaj. Niahledziačy na toje, što tam pracujuć ludzi z dypłomami, jany nie zdolnyja vyjści za peŭnyja miežy. Tyja ž apieratary, zdajecca, viedajuć svaju spravu, ale jany robiać usio technična, biez emocyj, pa starych praviłach. Pierad samym zvalnieńniem ad usiaho hetaha ŭva mnie zakipała nie na žart. Ja maryła: voś by samoj uziać u ruki kamieru i pačać rabić, jak chočacca mnie. Pa padobnych pryčynach ja syšła i z madelnaha biznesu: nizki ŭzrovień arhanizacyi, adsutnaść aficyjnych damoŭ na pakazach…
Ja pačała bolš uvažliva sačyć za kalehami, raspytvać ich pra ramieśnictva i adkładać pa sto dalaraŭ z kožnaha zarobku, niedzie padpracoŭvała jak madel — tak i nakapiła na svaju pieršuju kamieru.
Praz toje, što moj muž hraje ŭ hurcie «Radyjochvala», pacichu pačała znajomicca ź ludźmi, jakija pracujuć u śfiery videavytvorčaści. Jany brali mianie z saboj na zdymki to režysioram, to pradziusaram. Tak ja nabrałasia niejkaha dośviedu i pačała atrymlivać pieršyja zakazy.
Kali syšła choć i ź nizkaapłatnaj, ale z pracy sa stabilnym zarobkam, było ciažka. Asabliva kali zachvareŭ muž. Ale taja žyćciovaja situacyja vielmi zahartavała, źjaviłasia razumieńnie taho, što zaŭsiody treba mieć niejkuju finansavuju padušku na čorny dzień.
Z pracaj na dziaržtelebačańni narmalna adkładać hrošy nie atrymlivałasia: nijakija pierapracoŭki nie apłačvalisia. Heta prablema sistemy: ty hatovy rabić šmat, ale tabie nie hatovy płacić za heta. Takoje staŭleńnie padšturchnuła mianie niešta źmianić, ryzyknuć sa svajoj spravaj. Ty robiš krok — i źjaŭlajecca daroha.
Siońnia ja razumieju, što kali i rabić svajo šou, to tolki na jutubie, dakładna nie na biełaruskim telebačańni. Ja pierastała vieryć u aŭdytoryju i jakaść apošniaha.
U Biełarusi pakul mała jutub-kanałaŭ z karysnaj infarmacyjaj u styli Utopia Show, jakoje raźvienčvaje mify. Mnie b chaciełasia raźvivać svoj kanał z uchiłam u parady dla padletkaŭ; jak rabić toje, što im padabajecca, vieryć u siabie i nie zdavacca. Mnie ŭ svoj čas nie chapiła darosłaha čałavieka pobač, jaki moh by sa mnoj padzialicca svaim dośviedam. Pakul ja vykłała na svoj kanał niekalki videa na temu «Jak abrać sabie prafiesiju i zrazumieć, kim ty chočaš być». Paśla ich publikacyi mnie pisali dziaŭčaty-padletki, zadavali pytańni — my ź imi bolš padrabiazna raźbirali žyćciovuju situacyju kožnaj. U hetaj śpiecyficy ja i płanuju raźvivać svoj kanał.
Top-5 lubimych rečaŭ
Kamiera
Maja lubimka, ź jakoj ja nie raźvitvajusia navat padčas adpačynku. Navokał tak šmat pryhožaha, što mnie pastajanna chočacca heta zafiksavać na pamiać.
Niahledziačy na toje, što kamiery siońnia lahčejšyja, u prafiesijnym asiarodździ pa vytvorčaści videa pracuje bolš mužčyn. U čymści ja razumieju, čamu tak: ja zajmajusia sportam, ale ŭsio adno adčuvaju vialikuju stomlenaść paśla taho, jak ceły dzień ciahaju videaabstalavańnie.
Lubimyja srodki pa dohladzie
Zubnaja nitka amal zaŭsiody sa mnoj u sumcy, ja karystajusia joj minimum try razy na dzień. Dla mianie vielmi važna, kab zuby byli čystyja, kab ich zdaroŭje zachavałasia na doŭhija hady. Dla kahości heta vyhladaje dziŭna. Biełarusam, na moj pohlad, uvohule nie chapaje kultury hihijeny ŭ hetym płanie: niekatoryja mohuć nie čyścić zuby pa niekalki dzion i paśla majuć šmat prablem ci niepryhožyja ŭśmieški. A mnie zdajecca, mienavita ŭśmieška robić nas žyvymi i maładymi.
Kremy, i efirnyja alei ja vielmi lublu. Z uzrostam razumieješ, što, jak minimum, uvilhatniać skuru vielmi važna. Efirny ž alej zdolny supakoić i padniać mnie nastroj adnym tolki vodaram.
Varta adznačyć, što ja nie nabyvaju darahija kaśmietyčnyja srodki. Ja ŭpeŭnienaja, što naša pryhažość i źniešni vyhlad bolš zaležać ad stanu zdaroŭja, fizičnaha i psichałahičnaha.
Iholnica
Moj stary śniehavičok, jaki padaryła dobraja ŭniviersiteckaja siabroŭka. Siońnia ja vykarystoŭvaju hetuju cacku jak iholnicu. Znajomyja, jakija prychodziać da nas u hości, dumajuć, što heta lalka-vudu. Ale ničoha padobnaha! Z cackaj u mianie źviazanyja vyklučna pazityŭnyja ŭspaminy i emocyi — prosta jana vykonvaje misiju.
Elektronnaja knižka
Hady čatyry tamu mnie padaryŭ elektronnuju knižku muž. Spačatku ja była nastrojenaja skieptyčna: usio žyćcio čytała papiarovyja vydańni i nie źbirałasia niešta mianiać. Ale kali adnojčy pierajazdžała, zrazumieła, jak šmat knižak u mianie nakapiłasia. Što ź imi rabić dalej, kali jany pračytanyja? A heta ž niekalki zahublenych dreŭ! Tady ja asensavała, što nie chaču svaje patreby zadavalniać takim nieekałahičnym čynam. I da elektronki chutka pryzvyčaiłasia: vielmi kłasna mieć pad rukoj usiaho adnu pryładu, jakaja źmiaščaje ŭ sabie dziasiatki knižak!
Apošniaj ja pračytała pracu Žaka Sałamie «Pazbaŭsia adzinoty: cud kamunikacyi». Rekamienduju usim: čytvo pra toje, čamu my łajemsia ź blizkimi i kanfliktujem na pustym miescy, pra toje, što my vielmi časta zamoŭčvajem prablemy, a paśla rezka vybuchajem.
Hadzińnik, jaki nie idzie
Kali ŭ muža pamior baćka, jon staŭ nasić jaho hadzińnik. A ja, u svaju čarhu, uziała sabie voś hety hadzińnik muža.
U dadzieny momant jon nie pracuje, a ŭ mianie ŭsio nijak nie staje času adnieści jaho ŭ ramont. Ale dla mianie hałoŭnaje adčuvać, što mianie niešta «trymaje» za ruku. Kali ja chvalujusia i mnie patrebnaja padtrymka, jon dapamahaje mnie na psichałahičnym uzroŭni — byccam, sa mnoj pobač nie hadzińnik, a rodny čałaviek.
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy11
Kamientary