Vital Rymašeŭski: Nie pajšli na kanfrantacyju z uładaj. Rychtujem forum u padtrymku žurnalistaŭ

Čamu nie adbyŭsia Marš salidarnaści z žurnalistami?

Nahadajem: ideja praviadzieńnia masavaj akcyi ŭźnikła paśla taho, jak Śledčy kamitet raspačaŭ tak zvanuju «spravu BIEŁTA». Na dopyty byli vyklikany žurnalisty šerahu niezaležnych ŚMI. U toj ža čas u sudzie razhladali spravu prafsajuzaŭ, abvinavačanymi pa jakoj prachodzili lidary REP Hienadź Fiadynič i Ihar Komlik.

Karaciej, padstavy dla ŭsplosku spraviadlivaha narodnaha abureńnia, zdajecca, byli.

Była navat nazvana kankretnaja data praviadzieńnia Maršu — 15 vieraśnia. Ale ni ŭ nazvany dzień, ni paźniej nijakaj akcyi ŭ stalicy nie adbyłosia.

«Apazicyja ŭ čarhovy raz papijaryłasia i ničoha nie zrabiła», — hučali paproki na adras arhanizataraŭ Maršu salidarnaści.

«Narodnaja vola» vyrašyła vyśvietlić, čamu nasamreč nie adbyłasia akcyja.

— Pradstaŭniki arhkamiteta — a ŭ jaho, akramia chryścijanskich demakrataŭ, uvachodzili jašče niekalki demakratyčnych struktur, — u tym liku i pradstaŭniki prafsajuza REP, źviarnulisia ŭ Minharvykankam, kab atrymać aficyjny dazvoł na praviadzieńnie Maršu salidarnaści, — raspaviadaje Vital Rymašeŭski. — My chacieli, kab usio było pa zakonie.

Płanavałasia, što mierapryjemstva projdzie ŭ centry Minska — na płoščy Paryžskaj kamuny. Adnak Minharvykankam nie dazvoliŭ pravieści hetuju akcyju tam, dzie my chacieli. Staličnyja ŭłady spasłalisia na toje, što zajaŭka nie adpaviadaje pieraliku miescaŭ dla praviadzieńnia masavych mierapryjemstvaŭ.

Pry hetym, jak heta zvyčajna byvaje, nam navat nie prapanoŭvali pravieści mierapryjemstva na płoščy Banhałor.

— Arhkamitet pahadziŭsia b na takuju prapanovu?

— Nie. U Minsku jość try lehalnyja placoŭki dla praviadzieńnia mitynhaŭ. Akramia placoŭki ŭ rajonie płoščy Banhałor, heta Kijeŭski skvier i park imia 50-hodździa Kastryčnika.

Pravodzić mierapryjemstva na «zadvorkach» my nie źbiralisia, pra što i paviedamili haradskim uładam, nastojvajučy na tym, što Marš pavinien adbycca vyklučna ŭ centry stalicy.

U Minharvykankamie nas papiaredzili: kali my zładzim mierapryjemstva tam, dzie zapłanavana, — buduć aryšty.

Paśla hetaha adbyłosia pasiadžeńnie arhkamiteta. Vyrašalny hołas tam byŭ za siabrami prafsajuza REP. U vyniku było vyrašana nie iści na kanfrantacyju z uładaj, nie padstaŭlać ludziej pad dubinki…

Zaraz my šukajem inšyja formy dla padtrymki niezaležnych žurnalistaŭ. Płanujecca, što ŭ Minsku projdzie forum u padtrymku žurnalistaŭ niezaležnych ŚMI. Zaraz mierapryjemstva ŭ stadyi padrychtoŭki.

• 0
• 0
• 0
• 0
• 0
• 0
• 0
• 0