Mužčyna skraŭ mašynu na vulicy Matusieviča praz try hadziny paśla vychadu z zały suda Frunzienskaha rajona. Tam jaho za ŭčynieny try miesiacy tamu ŭhon prysudzili da 4 hadoŭ abmiežavańnia voli z nakiravańniem va ŭstanovu adkrytaha typu, paviedamiła pres-słužba minskaj milicyi.
«Skradzieny «Pasat» mužčyna pakinuŭ u lesie la Starych Daroh. Na nastupny dzień mužčyna skraŭ mašynu anałahičnaj marki z vulicy Šaranhoviča, u hety raz aŭto jon pakinuŭ u dvary doma pa vulicy Vyšaleskaha. Praź niekalki dzion skraŭ «Falksvahien Transporter» z vulicy Adzincova, mašynu pryparkavaŭ kala rynku ŭ Dziaržynsku», - raspaviali ŭ HUUS.
Apieratyŭniki vyśvietlili, što vykradzienyja mašyny fihurant źbiraŭsia pierahnać ŭ Rasiju. «Na adnoj z mašyn jon pryjechaŭ da miažy i staŭ pytacca u ludziej u čarzie, jak dajechać da Smalenska. Adzin mužčyna paviedamiŭ, što pamiežniki pravodziać pilny dahlad. Heta spałochała złamyśnika, i jon vyrašyŭ nie sprabavać vyjechać za miežy Biełarusi», - adznačyli ŭ milicyi.
Ekśpierty pry ahladach aŭto znajšli adbitki palcaŭ. U vyniku było ŭstanoŭlena supadzieńnie z zatrymanym, što paćvierdziła dačynieńnie fihuranta da ździajśnieńnia złačynstvaŭ. Usie try aŭtamabili ŭ technična spraŭnym stanie viernutyja ŭładalnikam.
Kamientary