Sidorski abviaściŭ kaniec epochi tannaha hazu?

2 červienia Pałata pradstaŭnikoŭ adnahałosna ŭchvaliła prahramu ŭradu. Za hetaha hałasavali ŭsie 104 deputaty, jakija ŭdzielničali ŭ pasiedžańni. Usia pracedura abmierkavańnia planaŭ dziejnaści na bližejšyja piać hadoŭ zaniała paŭtary hadziny.

Siarod hałoŭnych kirunkaŭ dziejnaści ŭradu Siarhiej Sidorski razam ź pieravodam ekanomiki na inavacyjny šlach nazvaŭ nieabchodnaść žorstkaj ekanomii enerhanośbitaŭ i pošuku enerhaaščadnych technalohijaŭ.

Heta dało padstavu dla aktualnaha ciapier pytańnia: jak iduć pieramovy z «Hazpromam»?

Kiraŭnik uradu paviedamiŭ deputatam:

(Sidorski: ) «Učora my skončyli čarhovy raŭnd pieramovaŭ z «Hazpromam». Jany iduć u dobraj kanstruktyŭnaj formie. My zadavolenyja ich chadoj. Učora «Hazprom» paćvierdziŭ, što chacieŭ by źniać pytańni ź «Biełtranshazam», jak subjektam haspadarańnia. I heta dobry pasył. A taksama «Hazprom» ličyć, što ceny dla Biełarusi, jak i dla inšych dziaržavaŭ, musiać być kamercyjnyja. Uzrovień cenaŭ vyznačajecca ŭ pieramoŭnym pracesie».

Premjer taksama skazaŭ, što na pieramovach vypracoŭvajecca technalahičny łancuh – ad udziełu Biełarusi ŭ zdabyčy hazu na terytoryi Rasiei (12–15 miljardaŭ kubičnych metraŭ), u jaho transpartyroŭcy, u trymańni ŭ schoviščach, da realizacyi paliva, u tym liku j na ekspart. I hetaja pazycyja, pavodle Siarhieja Sidorskaha, pryniataja «Hazpromam».

Viadomy biełaruski ekanamist Leanid Złotnikaŭ ličyć, što ceny na enerhanośbity, pieradusim na haz, vielmi mocna buduć upłyvać na ekanomiku. Pavodle jahonych raźlikaŭ, padvyšeńnie koštu hazu da 120–140 dalaraŭ uzdymie košt pradukcyi jak najmieniej na 15–20%.

(Złotnikaŭ: ) «A kali 200 dalaraŭ, dyk heta ŭžo budzie trahična. Tamu što biełaruskija tavary ŭžo i tak niekankurentazdolnyja ŭ mnohich halinach vytvorčaści».

Nia vieryć spadar Złotnikaŭ i ŭ stvareńnie hazavaha łancužka, pra jaki kazaŭ biełaruski premjer. Pa-pieršaje, na dumku ekanamista, rasiejcy prosta nie zachočuć dapuścić luboha zamiežnika da zdabyčy hazu. A pa-druhoje:

(Złotnikaŭ: ) «Heta nie takaja ŭžo prostaja sprava – usio heta arhanizavać. I patrebna ŭličvać nieabchodnaść vialikaha pieršapačatkovaha kapitału. I kali padličyć sabiekošt plus pieršapačatkovyja ŭkładańni, dyk, maja acenka: heta nia budzie ekanamična vyhadna dla Biełarusi».

Jašče adzin ekanamist, Jarasłaŭ Ramančuk, źviartaje ŭvahu na toje, što premjer Sidorski faktyčna ahučyŭ tolki tyja zadačy, što abmiarkoŭvalisia na Trecim usiebiełaruskim narodnym schodzie:

(Ramančuk: ) «Jon pavinien byŭ kankretyzavać tyja zadačy, jakija pastaviŭ Łukašenka. Sidorski hetaha rabić nia moža. Bo kali b jon pačnie liberalizacyju, dyk heta ŭvojdzie ŭ kanflikt ź idealohijaj samoha režymu».

Radyjo Svaboda

• 0
• 0
• 0
• 0
• 0
• 0
• 0
• 0