U Biełarusi źjaviŭsia ŭžo druhi atrad rasijskaj «Junarmii», jakuju błasłaviŭ Pucin
Dvaccać vosiem dziaciej rasijskich dypłamatyčnych rabotnikaŭ, a taksama rasijskich zamiežnych ustanovaŭ u Biełarusi 11 lutaha prymali klatvu viernaści arhanizacyi «Junarmija». Mierapryjemstva prachodziła ŭ muziei Vialikaj Ajčynnaj vajny.
Novy atrad atrymaŭ nazvu «Hvardziejec» imia hieroja SSSR Andreja Mielnikava. Heta ŭradženiec Mahilova, jaki zahinuŭ 20-hadovym junakom u Afhanistanie ŭ 1988 hodzie padčas apieracyi «Mahistral». Prysutničaŭ na minskaj imprezie i načalnik hałoŭnaha štaba «Junarmii», lotčyk-kasmanaŭt Raman Ramanienka.
«Junarmiejcy ŭ čarhovy raz dakazvajuć, što dla ich nie isnuje nijakich miežaŭ i adlehłaściaŭ. Navat udalečyni ad doma jany abjadnoŭvajucca, majuć znosiny i padtrymlivajuć adzin adnaho. Heta i jość patryjatyzm i hramadzianskaść, sapraŭdnaja luboŭ da svajoj Radzimy. Da taho ž u ich jość dobry prykład u asobie baćkoŭ, jakija pryśviačajuć svajo žyćcio dypłamatyčnamu słužeńniu i abaronie svajoj Ajčyny», — padkreśliŭ Raman Ramanienka.
Prysutničaŭ pry klatvie pasoł Rasii ŭ Biełarusi Michaił Babič, pra heta paviedamlaje sajt «Junarmii».
Michaił Babič zaznačyŭ nastupnaje: «My budziem razam spaznavać historyju Biełarusi, našu sumiesnuju historyju dvuch narodaŭ, jak razam my abaraniali našu Radzimu, jak razam my pieraadolvali ŭsie niahody i stvarali pryhožuju vialikuju krainu».
Heta ŭžo nie pieršy atrad «Junarmii» ŭ Biełarusi. Jašče ŭ pačatku listapada dzieci vajenasłužačych rasijskaj vajskovaj častki ŭ Hancavičach prymali anałahičnuju klatvu.
Hety atrad maje imia hieroja Rasii Ramana Filipava, lotčyka, jaki letaś zahinuŭ u Siryi. Na dadzieny momant u atradzie 45 čałaviek.
Ruch «Junarmija» źjaviŭsia ŭ Rasii ŭ 2016 hodzie. Jahonaja meta — «patryjatyčnaje vychavańnie rasijan va ŭzroście ad 8 hadoŭ».
Inicyjataram stvareńnia «Junarmii» byŭ ministr abarony Rasii Siarhiej Šajhu, a padtrymaŭ inicyjatyvu asabista Uładzimir Pucin. Na siońnia ŭ składzie «Junarmii» naličvajecca bolš za 200 tysiač čałaviek.
«Dla Kijeva było b lepš, kab Biełarusi nie isnavała naohuł». Vialikaja razmova z ukrainskim palitołaham Jaŭhienam Mahdam8
Kamientary