Sfarmavany šort-list premii Syrycy za 2018 hod, u jaho uvajšli šeść pradstaŭnikoŭ roznych rehijonaŭ Biełarusi. Łaŭreata abiare Rada Ruchu «Za Svabodu».
Premija była zasnavanaja Radaj Ruchu «Za Svabodu» ŭ śniežni 2016 hoda ŭ pamiać pra vybitnaha dziejača nacyjanalna-demakratyčnaha ruchu Biełarusi Viktara Syrycu. Syryca pracavaŭ vykładčykam u Baranavičach i byŭ dušoju mnohich haradskich inicyjatyŭ.
Premijaj uhanaroŭvajucca aŭtary najlepšych rehijanalnych inicyjatyvaŭ pa papularyzacyi biełaruščyny pa vynikach minułaha hodu.
U šort-list za 2018 hod uvajšli:
- Viktoryja Anochava-Žuraŭlova («Lohkija čytańni» — litaraturnyja čytańni dla miascovych školnikaŭ u Pružanach, Bresckaja vobłaść)
- Uładzisłaŭ Zołataŭ (stvareńnie «Leśvicy-vyšyvanki» ŭ Mahilovie)
- Juryj Kazakievič i Uładzimir Hundar (arhanizacyja Dnia vyšyvanki ŭ Baranavičach)
- Ihar Stankievič (kampanija ŭšanavańnia pamiaci achviaraŭ stalinskich represijaŭ — Hramadskaja inicyjatyva «Kabylaki. Rasstralanyja ŭ Oršy»)
- Inna Chomič (stvareńnie multymiedyjnaha prajekta z mapaj dyjalektnych havorak)
- Volha Damaskina (arhanizacyja ŭ Połacku sieryi sustrečaŭ u miežach «Žyvoj movy»).
«Viktar Syryca ŭsio žyćcio addaŭ samaachviarnaj pracy pa nacyjanalnym adradžeńni. Uručeńniem premii Ruch «Za Svabodu» namahajecca źviarnuć uvahu na padobnuju dziejnaść, jakaja praciahvajecca siońnia ŭ rehijonach i nie zaŭsiody zaŭvažnaja na nacyjanalnym uzroŭni. Dumaju, što adznačeńnie dasiahnieńniaŭ addanych rupliŭcaŭ na nivie biełaruščyny daść im dadatkovy impet praciahvać svaju pracu», — adznačyŭ staršynia Ruchu «Za Svabodu» Juryj Hubarevič.
U hetym hodzie arhanizacyja znoŭ zapuskaje nie tolki hałasavańnie siarod siabraŭ Rady, ale i t.zv. hramadskaje, u jakim moža pryniać udzieł luby achvotny. Hetaje hałasavańnie budzie mieć kansultacyjny charaktar.
Usie achvotnyja mohuć addać svaje hałasy za lepšuju inicyjatyvu, zapoŭniŭšy formu.
Hałasavańnie praciahniecca da 25 lutaha.
Kamientary