Kampanija «Jeŭrahandal», jakoj naležyć najbujniejšaja sietka kramaŭ «Jeŭraopt», padała ŭ sud na Ministerstva antymanapolnaha rehulavańnia i handlu (MARH).
Pieradsudovaje pasiadžeńnie prajšło 19 červienia ŭ Viarchoŭnym sudzie.
«Jeŭratorh» niezadavoleny rašeńniem ministerstva ab parušeńniach kampanijaj antymanapolnaha zakanadaŭstva. Kampanija choča abskardzić hetaje rašeńnie.
U 2017 hodzie homielskaja kampanija «Šyrokich» paskardziłasia na «Jeŭrahandal». Raźbiralnictva išło dva hady, u vyniku MARH vyrašyŭ, što «Jeŭrahandal» parušaje zakanadaŭstva.
Sutnaść pretenzij nastupnaja: kali ŭ kankurentaŭ cana na tavary była nižejšaja, čym u «Jeŭraopcie», kampanija cisnuła na pastaŭščykoŭ, kab tyja padnimali ceny dla kankurentaŭ ci spyniali im pastaŭki tavaraŭ.
«Antymanapolny orhan nie acaniŭ usie dokazy i tamu niapravilna prymianiŭ normy zakona da kampanii. «Jeŭrahandal» nie ździejśniŭ toje, u čym jaho abvinavačvajuć», — paviedamiŭ na pasiadžeńni pradstaŭnik kampanii. Maŭlaŭ, pamyłkovaje rašeńnie MARH moža niehatyŭna skazacca na reputacyi «Jeŭrahandla».
Raniej homielskaja kampanija «Šyrokich» pradastaviła antymanapolščykam svaju pierapisku z pastaŭščykami. Pradstaŭnik «Jeŭrahandala» nastojvaje, što da pierapiski jość pytańni, maŭlaŭ, paśla pastaŭščyki tłumačyli svaje słovy i ź ich tłumačeńniaŭ nie vynikaje fakt cisku na ich z boku «Jeŭrahandla».
Voś tolki MARH nastojvaje, što ŭsio było naadvarot. I što słovy pastaŭščykoŭ pra adsutnaść cisku — i jość vynik cisku na ich z boku «Jeŭrahandla», bo pastaŭščyki bajacca stracić supracu z bujnoj kampanijaj.
Jašče adzin momant, jaki adznačyli pradstaŭniki Minhandlu: niaredka pastaŭščyki pastaŭlali tavary dla «Šyrokich» pa vyšejšych koštach, čym dla «Jeŭratorha». Voś tolki pa vyniku na palicach u kramach «Šyrokich» tavar usio adno kaštavaŭ tańniej. A «Jeŭrahandal» chacieŭ mieć canavuju dystancyju 10% — to bok kab u kankurentaŭ tavary kaštavali minimum na 10% daražej, čym u «Jeŭraoptach», nastojvajuć pradstaŭniki MARH.
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty47
Kamientary