Eks-namieśnika kiraŭnika Minska Damarackaha prysudzili da 12 hadoŭ za chabar $3500
Bolš za dva miesiacy sud Centralnaha rajona Minska razhladaŭ kryminalnuju spravu ŭ dačynieńni da eks-čynoŭnika Andreja Damarackaha, piša Tut.by.
Jamu było pradjaŭlenaje abvinavačvańnie pa č.3 art. 430 (Atrymańnie chabaru ŭ asabliva bujnym pamiery), č.3 art. 424 (Złoŭžyvańnie ŭładaj abo słužbovymi paŭnamoctvami), č.1 art. 210 KK (Kradziež šlacham złoŭžyvańnia słužbovymi paŭnamoctvami). Užo padčas pracesu prakuror zajaviŭ, što admaŭlajecca ad častki abvinavačvańniaŭ — i vyklučyŭ škodu horadu na 3 miljony rubloŭ. Dziaržabvinavaŭca patrabavaŭ dla abvinavačanaha 13 hadoŭ kałonii.
Siońnia sud Centralnaha rajona Minska abviaściŭ vyrak. Byłoha namieśnika kiraŭnika Minska Andreja Damarackaha pryznali vinavatym i prysudzili da 12 hadoŭ kałonii va ŭmovach ŭzmocnienaha režymu z kanfiskacyjaj majomaści — buduć kanfiskavanyja iPhone, marazilnaja kamiera, posudamyjnaja mašyna, mikrachvalevaja pieč, hrošy. Ad aryštu sudździa Taćciana Akavitaja vyzvaliła mašynu Kia, Playstation z dvuma džojścikami. Taksama abvinavačany pavinien vypłacić štraf u 3 tysiačy rubloŭ. Sud pastanaviŭ hramadzianski pazoŭ prakurora zadavolić pamieram 5122 rubloŭ.
Andreja Damarackaha abvinavačvali pa troch karupcyjnych złačynstvach.
Pa viersii śledstva, jon atrymaŭ chabar u 2,5 tysiačy dalaraŭ za dapamohu ŭ spryjalnym vyrašeńni pytańnia pa raźmiaščeńni letniaha kafe Golden coffee na vulicy Kirava ŭ Minsku. Damarackaha nie zatrymlivali z dokazami złačynstva, pakazańni suprać jaho daŭ biznesmien Vasil Sadoŭski, ale padčas dopytu ŭ sudzie admoviŭsia ad svaich słoŭ. Jon raspavioŭ, pryznalnyja pakazańni napisaŭ pad dyktoŭku śledčaha, bo chacieŭ chutčej viarnucca ź SIZA KDB dadomu.
Jašče adzin epizod abvinavačańnia — Andrej Damaracki niezakonna atrymaŭ premii ŭ adnu tysiaču dalaraŭ za štučna zavyšanyja pakazčyki raboty HUSR. Premiju, darečy, uzhadniŭ były mer Minska Andrej Šorac. Damaracki viarnuŭ premiju za dva miesiacy da jaho zatrymańnia, jak tolki ŭbačyŭ, što nie sychodziacca pakazčyki. Buchhałtar pryniała hrošy, heta dakumientalna paćvierdžana.
— Kali my pa nadumanych abvinavačvańniach budziem asudžać kiraŭnikoŭ, nikoha nie zastaniecca, ich i tak užo nie chapaje, — kazaŭ raniej u sudzie advakat Dźmitryj Haračka, jaki pradstaŭlaje intaresy Damarackaha. — My padryvajem vieru ludziej u kadravuju palityku kiraŭnika dziaržavy. Čamu Damarackamu nie byli pradjaŭlenyja abvinavačvańni jašče ŭ 2015 hodzie, kali AAC ŭžo tady prasłuchoŭvaŭ telefon Vaładźko, mieŭ na rukach usie materyjały? Zrazumieła čamu. Kali b takija dokazy pradjavili Łukašenku, jon by nikoli nie daŭ zhodu na zatrymańnie (u 2015-m Damaracki jašče zajmaŭ pasadu namieśnika kiraŭnika Minska, na jaho zatrymańnie, pa zakonie, spatrebiŭsia b dazvoł Łukašenki, bo čynoŭnik uvachodziŭ u kadravy rejestr kiraŭnika dziaržavy).
U svaim apošnim słovie Andrej Damaracki prasiŭ vynieści spraviadlivy i sumlenny prysud:
— Za 20 hadoŭ majoj pracy sa mnoj takoje ŭpieršyniu. Niahledziačy na toje, što adbyvałasia padčas papiaredniaha śledstva, ja vieryŭ, što ŭ našaj krainie pieramahaje zakonnaść i prava. Ja nie ździajśniaŭ złačynstvaŭ.
Kamientary