«Ludziej trucić nie budziem» — kiraŭnik Bieraściejščyny pra akumulatarny zavod
Pazicyja pa budaŭnictvie akumulatarnaha zavoda ŭ Breście niaźmiennaja: zavod nie budzie ŭviedzieny ŭ ekspłuatacyju z parušeńniami zakanadaŭstva. Pra heta na telekanale ANT zajaviŭ staršynia Bresckaha abłvykankama Anatol Lis, paviedamlaje BiełTA.
Pavodle jaho słoŭ, jak pačałosia budaŭnictva zavoda, miascovyja ŭłady nieadnarazova papiaredžvali inviestara ab tym, što zavod pavinien być pabudavany biez usialakich parušeńniaŭ pryrodaachoŭnaha zakanadaŭstva. Čakałasia, što heta budzie vartaje pradpryjemstva pa vytvorčaści poŭnaha cykłu akumulataraŭ, jakoha ŭ respublicy niama. A taki zavod krainie patrebny. «Ale, na žal, inviestar pajšoŭ pa šlachu zavualiravańnia niekatorych momantaŭ, jakija vyklikali abureńnie siarod nasielnictva», — prainfarmavaŭ Lis.
Jon raskazaŭ, što, vystupajučy pierad nasielnictvam i ŭ srodkach masavaj infarmacyi, adznačaŭ, što kali na zavodzie buduć vyjaŭleny parušeńni, to jon pracavać nie budzie. «I kali Ministerstva pryrodnych resursaŭ i achovy navakolnaha asiarodździa zrabiła zamiery i paćvierdziła heta, mnoj było pryniata rašeńnie ab prypynieńni budaŭnictva i ŭvodu jaho ŭ ekspłuatacyju. Ludziej trucić nie budziem», — padkreśliŭ jon.
Akumulatarny zavod TAA «AjPauer» mahutnaściu 2 młn umoŭnych akumulatarnych batarej u hod uźviedzieny ŭ SEZ «Brest» u rajonie aeraporta. Rasparadžeńniem staršyni Bresckaha abłvykankama ad 14 červienia budaŭnictva spyniena da likvidacyi niedachopaŭ.
Budaŭnictva akumulatarnaha zavoda pablizu Bresta vyklikała masavyja pratesty žycharoŭ. Na praciahu hoda ludzi kožny tydzień źbiralisia ŭ centry horada, kab vykazać svaju niazhodu i pryciahnuć uvahu ŭłady da hetaj temy.
Kamientary