Baćka chłopčyka, na jakoha z partaj kidałasia nastaŭnica: Ja nie liču, što maty ŭ bok dziaciej — heta norma
Baćka 9-hadovaha školnika, na jakoha kidałasia z partaj nastaŭnica, aburany reakcyjaj darosłych, jakija vinavaciać jaho syna ŭ incydencie. Jon ličyć, što zvalnieńnie nastaŭnicy — «minimalnaje, što treba było zrabić u takoj sytuacyi». Ź im pahavaryła Radyjo Svaboda.
U milicyju žychar Homla źviartacca nia budzie, bo nia choča brać na siabie adkaznaść za los inšaha čałavieka.
«Ja nastaŭnicu tołkam nia viedaju, jana pieršy raz u nas była na zamienie. Razumieju, kali b dzicia niešta systematyčna parušała, u nastaŭnicy by nazapašvałasia heta. Tut jana bačyć dzicia 20 chvilin — i ŭžo takoje sabie dazvalaje», — zaznačyŭ baćka školnika.
Mužčyna nie razumieje, «što mahło zrabić dzicia, kab da jaho prymianić takoje ŭździejańnie».
«U majoj hałavie nie ŭkładvajecca, kali inšyja baćki kazali: «Nu i my matam na dziaciej kryčym, što ŭ hetym takoha?» Jany ličać, što heta norma. Ja tak nie liču. Nielha matam na dzicia, jano azłobicca. Ź dziciem treba razmaŭlać», — upeŭnieny baćka.
Surazmoŭca padkreśliŭ, što jahony syn nia staviŭ nastaŭnicy padnožku: heta versija karystalnikaŭ internetu.
«Ja prasiŭ baćkoŭ z našaj klasy pahutaryć ź dziećmi, i jany skazali što nijakaj padnožki nie było, nijakich kubkaŭ z farbaj ci vadoj moj syn nia kidaŭ, — śćviardžaje jon. — Ja tak zrazumieŭ z usioj sytuacyi, što hety kubak stajaŭ na stale, upaŭ, i vada raźliłasia. Ludzi pahadžajucca na toje, što maty ŭ bok dziciaci — heta narmalna. Ja takoha nie razumieju.
Nie było b hetaha videa, druhim razam inšy nastaŭnik pačaŭ by takim čynam svaje emocyi vykazvać u bok dziaciej, i dzieci buduć usprymać heta za normu. Nu padumaješ, nastaŭnica matam łajecca! Dzicia nie abražała nastaŭnicu, na videa vidać, što jon prosta pytaŭsia: «Jakija hadaści ja vam zrabiŭ?». Nastaŭnica adkazała: «Iržaŭ jak koń!» Ale heta emocyi. Dyk što, kazać dziciaci, što «paniasuć ciabie na mohiłki?»
Homielski partał «Silnyje novosti» 13 vieraśnia apublikavaŭ videa, źniataje ŭ siaredniaj škole № 15 Homla. Na im nastaŭnica kryčyć i maciukajecca padčas uroku rasiejskaj movy ŭ 4-j klasie. Jana pahražała vučniu, što stuknie jaho partaj, łajałasia i abražała małaletniaha. Taksama vidać, jak nastaŭnica padniała partu i kaža: «Ja pajdu ŭ turmu, a tabie [maciuki]».
Kamientary