«My ŭsie byli na roŭnych». Były polski mytnik z Babroŭnikaŭ raskazaŭ pra ŭdzieł u kantrabandzie cyharet ź Biełarusi
Ciapier jaho i jašče vosiem čałaviek sudziać u Biełastoku.
Były supracoŭnik Padatkova-mytnaj słužby Polščy (KAS), jaki pracavaŭ na pamiežnym pierachodzie ŭ Babroŭnikach, pryznaŭsia ŭ sudzie Biełastoka va ŭdziele ŭ kantrabandzie cyharet ź Biełarusi. Jon zajaviŭ, što atrymaŭ 65 tysiač jeŭra chabaru, piša MOST.
Mužčyna prachodzić pa spravie dzieviaci čałaviek, siarod jakich vosiem byłych supracoŭnikaŭ KAS. Pa viersii prakuratury, jany za hrošy dapamahali prapuskać praz hranicu aŭtamabili z kantrabandnymi cyharetami.
Śledstva ličyć, što arhanizavanaja hrupa dziejničała z vosieni 2018 hoda da viasny 2020 hoda ŭ Padlaskim i Mazavieckim vajavodstvach. Cyharety ŭvozili ŭ Polšču ŭ tym liku praz pamiežny pierachod u Babroŭnikach.
Pa danych prakuratury, hrupa ŭviała ŭ abarot jak minimum 27 młn pačak cyharet. Uron polskamu biudžetu ad niaspłatčanych akcyzaŭ, mytaŭ i PDV acanili ŭ 626,2 młn złotych ($168 młn pa siońniašnim kursie).
Ahulnaja suma chabaraŭ, jakaja fihuruje ŭ abvinavačvańniach, składaje amal 4,9 młn złotych ($1,3 młn pa siońniašnim kursie).
Były mytnik pryznaŭ vinu nie całkam. Jon zajaviŭ, što prakuratura pamyłkova ličyć jaho niefarmalnym lidaram hrupy.
«My ŭsie byli na roŭnych, usie adnolkava supracoŭničali i adnolkava atrymlivali hrošy», — skazaŭ jon u sudzie.
Mužčyna taksama nazvaŭ vystaŭlenuju jamu sumu chabaraŭ «zavyšanaj, nierealnaj i absurdnaj». Jon pryznaŭsia ŭ atrymańni 65 tysiač jeŭra.
Raniej prakuratura paviedamlała, što siarod padazravanych pa bolš šyrokaj spravie pra kantrabandu praz Babroŭniki i Tarespal jość taksama hramadzianie Biełarusi.
Abvinavačanym pahražaje da dziesiaci hadoŭ pazbaŭleńnia voli i bujnyja štrafy.
Kamientary