Makiej: Padčas abmierkavańnia płana intehracyi z rasijskaha boku hučali «absalutna nieprymalnyja prapanovy»
U karcie intehracyi Rasii i Biełarusi nie idzie razmovy pra adziny emisijny centr, zajaviŭ u intervju RBK ministr zamiežnych spraŭ Uładzimir Makiej.
«Pierš čym kazać pra ŭviadzieńnie niejkaj adzinaj valuty, stvareńnie adzinaha emisijnaha centra, treba spačatku naładzić narmalnaje handlova-ekanamičnaje ŭzajemadziejańnie i likvidavać usie barjery i pieraškody», — skazaŭ jon.
Dakumient taksama nie praduhledžvaje pahłyblenuju palityčnuju intehracyju. «Nijakich palityčnych momantaŭ, źviazanych sa stvareńniem fiederacyi, kanfiederacyi tam niama i nie budzie. Ja jašče raz paŭtaraju, što suvierenitet dla abiedźviuch dziaržaŭ, heta śviatoje, i Biełaruś nie maje namieru achviaravać im va ŭhodu niejkich kanjunkturnych mierkavańniaŭ», — padkreśliŭ ministr.
Razam z tym, adznačyŭ Makiej, u karcie budzie praduhledžana rabota nad adzinym padatkovym kodeksam. «Ale siońnia heta vyhladaje, ja b skazaŭ, jak palityčnaja meta, praca nad kodeksam pavinna vieścisia na praciahu jak minimum niekalkich miesiacaŭ, a to i hadoŭ. Ale tym nie mienš meta hetaja paznačanaja. I ja dumaju, što našy śpiecyjalisty adpracujuć usie pytańni, źviazanyja z padrychtoŭkaj hetaha dakumienta», — rastłumačyŭ ministr.
Pa słovach Makieja, padčas abmierkavańnia płana intehracyi z rasijskaha boku hučali «absalutna nieprymalnyja» prapanovy. Naprykład, ab stvareńni niekalkich nadnacyjanalnych struktur.
«Ale prezidenty na sustrečy ŭ Sankt-Pieciarburhu [18 lipienia. — RBK] abmierkavali hetyja prapanovy i adnaznačna vyrašyli, što jany nie adpaviadajuć pałažeńniam dahavora, tamu treba skancentravacca na ekanamičnaj prablematycy, na pahłybleńni handlova-ekanamičnaha ŭzajemadziejańnia, na ŭzhadnieńni praviłaŭ, źviazanych z mytnym zakanadaŭstvam, ź siertyfikacyjaj, standartyzacyjaj i inšaje. My pavinny nadać bolš uvahi praviadzieńniu ŭzhodnienaj sielskahaspadarčaj i pramysłovaj palityki — heta samaje hałoŭnaje», — skazaŭ jon.
Makiej taksama dapuściŭ, što 8 śniežnia prezidenty Rasii i Biełarusi Uładzimir Pucin i Alaksandr Łukašenka mohuć užo padpisać dakumient. «Prezidenty damovilisia ab sustrečy z nahody 20-hodździa Sajuznaj damovy i pastavili zadaču ŭradam abiedźviuch krain padrychtavać adpaviednyja «darožnyja karty» pa ŭrehulavańni adpaviednych prablemnych pytańniaŭ. Budziem spadziavacca, što heta adbudziecca», — adznačyŭ Makiej.
Adnak jon dadaŭ, što pierad tym, jak pačynać pahłyblenuju intehracyju, treba vyrašyć aktualnyja prablemy, a heta: «padatkovy manieŭr (u Rasii), likvidacyja pieraškodaŭ u pastaŭkach sielskahaspadarčaj, pramysłovaj pradukcyi, pieramovy ab urehulavańni sprečnych momantaŭ, źviazanych z cenami na haz i naftu, i hetak dalej».
«Abodva baki zaraz aktyŭna pracujuć nad realizacyjaj usich prapanoŭ. Ale ja jašče raz padkreślivaju, što dla nas vielmi adčuvalnymi źjaŭlajucca pytańni ŭrehulavańnia aktualnych prablem», — skazaŭ jon.
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty49
Kamientary