Dyrektarka konkursu pryhažości plus-sajz: «My zmahajemsia za talerantnaść źniešniuju, dyk nie, nas abvinavacili ŭ nacyjanalnaj»
Skandał na konkursie pryhažości «Karaleva XL» razhareŭsia paśla taho, jak adna z paŭfinalistak, biełaruska afrykanskaha pachodžańnia Vanesa Marskaja, pryznałasia ŚMI, što budzie pradstaŭlać na mižnarodnym podyumie nie Biełaruś, a Nihieryju.
Dyrektarka biełaruskaha konkursu, Jaŭhienija Ciulenieva, prakamientavała «Kamsamolskaj praŭdzie», što, kali mułatka Marskaja budzie pradstaŭlać Biełaruś, heta moža vyklikać u hramadstvie šmat niehatyŭnych vodhukaŭ:
«Vanesa jarkaja i ŭzrušajučaja, adrazu spadabałasia ŭsim členam žury! Ale my padumali, što budzie dziŭna adpraŭlać jaje ad Biełarusi. Sam konkurs dla publiki — užo vyklik. A kali my jašče adpravim mułatku ad Biełarusi, razumieju, što narviemsia na šmat niehatyŭnych vodhukaŭ».
«Našaj Ninie» Jaŭhienija Ciulenieva patłumačyła:
«Aj, nu śmiešna! My zmahajemsia za talerantnaść źniešniuju, dyk nie, nas abvinavacili ŭ nacyjanalnaj! Ja vielmi rada, što naša hramadstva nastolki talerantnaje, što hatovaje nazvać ciemnaskuruju mułatku pamieru plus-sajz samaj pryhožaj biełaruskaj, heta ščyra. A što datyčycca ŭdziełu Vanesy ŭ konkursie ad Nihieryi, heta było čatyrochbakovaje rašeńnie: arhanizataraŭ ad Biełarusi, Vanesy, nihieryjskaha boku i arhanizataraŭ mižnarodnaha konkursu. My padumali, što heta budzie idealnaje rašeńnie, jakoje zadavolić usich, tym bolš što Nihieryja litaralna z ruk vyryvała našu Vanesu», — raskazvaje Jaŭhienija Ciulenieva.
Konkurs pryhažości Top of the World Plus Size 2019 adbudziecca ŭ Kijevie ŭ pačatku listapada.
«Heta kruta, što hramadzianka Biełarusi budzie pradstaŭlać inšuju krainu. Nu hladzicie: čamu na «Jeŭrabačańnie» ad Biełarusi jeździać i ŭkraincy, i rasijanie, a biełarusam nielha pradstavić inšuju krainu? Navat kali pieramoža Nihieryja, i konkurs, i karona pieramožcy pryjedzie ŭ Biełaruś. I ŭ nas ciapier bolš šancaŭ. Ź Biełarusi jedzie nie piać, a šeść pryhažuń», — adkazvaje Jaŭhienija Ciulenieva.
Vanesa Marskaja: «Kali b konkurs byŭ nietalerantnym, u top-12 ja b nie trapiła»
Vanesa raskazvaje, što da rašeńnia pradstaŭlać Nihieryju jaje naohuł padšturchnuli svajaki.
«Jak było. Kali na sajcie «Kamsamołki» pravodziłasia hałasavańnie za toje, chto ź dziaŭčat trapić u paŭfinał, ja padniała ŭsiu svaju radniu hałasavać za mianie. Proźvišča taty — Umieńnie, vielmi pavažanaje ŭ Nihieryi, u nas tam šmat svajakoŭ, tamu za mianie prahałasavaŭ amal uvieś horad. Tady mnie stali zvanić i pytacca: «Vanesa, što za spravy? Čamu ty nie pradstaŭlaješ našu krainu na konkursie?» Ja padzialiłasia hetymi dumkami ź Jaŭhienijaj Ciulenievaj, i jana mianie padtrymała», — kaža Vanesa Marskaja.
A pra toje, što konkurs nietalerantny, Vanesa, pačuŭšy heta, raśśmiajałasia:
«Śmiešna. Kab kahości na hetym konkursie biantežyła maja źniešnaść, ja b nie trapiła ŭ top-12», — padsumavała Vanesa Marskaja.
Ciapier čytajuć
Pamiatajecie byłoha pamiežnika, jaki staŭ dalnabojščykam i ŭ Hiermanii pryznavaŭsia ŭ lubovi da Łukašenki? Ź im biada15
Kamientary